ଦାରିଙ୍ଗବାଡି, ୨/୩(ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଦନେକବାଡି ପଞ୍ଚାୟତ ବିରାଗାଡା ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟର ପୁରୁଣା କୋଠାରେ ଚାଲିଛି ଏକ ଛାତ୍ରାବାସ। ଏହାକୁ ବିଦ୍ୟାଳୟ କର୍ତ୍ତ୍ୟୁପକ୍ଷ ସରକାରଙ୍କଠାରୁ ଅନୁଦାନ ଆଣି ଚଳାଇଥିବା କହୁଥିବାବେଳେ ଏହି ଛାତ୍ରାବାସ ଚାଲିଥିବା ସମ୍ପର୍କରେ ବ୍ଲକ ସମ୍ପ୍ରସାରଣ ଅଧିକାରୀ ବିଶ୍ୱଜିତ ଜାଲି ସିଧା କହିଛନ୍ତି, ଏଭଳି କୌଣସି ଛାତ୍ରାବାସ ଦନେକବାଡି ଅଞ୍ଚଳରେ ଚାଲିଥିବା ତାଙ୍କ ନିକଟରେ କୌଣସି ସୂଚନା ନାହିଁ ବୋଲି କହିଛନ୍ତି। ଏହା ଜିଲା ଶିକ୍ଷା ଅଧିକାରୀଙ୍କଠାରୁ ଅନୁମତି ନେଇ ଚଳାଇ ଥାଇପାରନ୍ତି ବୋଲି କହିଛନ୍ତି।
ପ୍ରକାଶ ଯେ, ଦୁର୍ଗମ ଅଞ୍ଚଳରେ ଏହି ଛାତ୍ରାବାସ ବିଭିନ୍ନ ସମସ୍ୟା ଦେଇ ଗତି କରୁଛି। ପାଣି ଓ ଶୌଚାଳୟର ଅଭାବ ଯୋଗୁ ଛାତ୍ରାବାସରେ ରହିଥିବା ୯୦ଛାତ୍ର ଉକ୍ତ ଛାତ୍ରାବାସଠାରୁ ପ୍ରାୟ ଏକ କିମି ଦୂରତା ଜଙ୍ଗଲରେ ବୋହିଯାଉଥିବା ନଦୀ ଓ ତା’ ନିକଟରେ ରହିଥିବା ଚୁଆ ଓ ପୋଖରୀକୁ ଶୌଚ ପାଇଁ ଯାଉଛନ୍ତି। ରବିବାର ଛୁଟି ରହିଥିବାରୁ ଦଳ ଦଳ ହୋଇ ଛାତ୍ରମାନେ ଜଙ୍ଗଲରେ ବୁଲୁଥିବା ଦେଖିବାକୁ ମିଳିଥିଲା। ଛାତ୍ରଙ୍କ ପ୍ରତିକ୍ରିୟା ନେବାରୁ ସେମାନେ ଶୌଚ ପାଇଁ ଜଙ୍ଗଲକୁ ଯାଉଥିବା ଓ ଛାତ୍ରାବାସରେ ମାତ୍ର ୨ ଟି ଶୌଚାଳୟ ରହିଥିବା ଯୋଗୁ ସମସ୍ୟା ଭୋଗୁଛୁ ବୋଲି କହିଥିଲେ।
ସେହିପରି ଛାତ୍ରାବାସରେ ଛାତ୍ରମାନେ ଏଣେ ତେଣେ ବୁଲି ମଧ୍ୟାହ୍ନ ଭୋଜନ ଖାଉଥିବା ବେଳେ କୁକୁର, କୁକୁଡ଼ା, ଗାଈ, ବଳଦ, ଛେଳି ବିଚରଣ କରୁଥିବା ସ୍ଥାନରେ ଛାତ୍ରଙ୍କୁ ଖାଇବାକୁ ପଡୁଥିବା ଛାତ୍ରମାନେ କହିଛନ୍ତି। ଛାତ୍ରମାନଙ୍କୁ ଅତ୍ୟନ୍ତ ଦୂଷିତ ପରିବେଶ ମଧ୍ୟରେ ଖାଦ୍ୟ ଗ୍ରହଣ ସହ ରାତ୍ରିଯାପନ କରିବାକୁ ପଡୁଛି। ସରକାର କେବଳ ବିଦ୍ୟାଳୟ ଖୋଲିଥିବାବେଳେ ସେଠାରେ କୌଣସି ହଷ୍ଟେଲ ଖୋଲିନାହାନ୍ତି। ତେବେ ସେଠାରେ କୌଣସି ମୌଳିକ ସୁବିଧା ନ ଥାଇ ଛାତ୍ରାବାସ ଚଳାଇବାକୁ କିଭଳି, ଆଉ କିଏ ଅନୁମତି ଦେଇଛି ସେ ସମ୍ପର୍କରେ କାହାରି ନିକଟରେ ସଠିକ ସୂଚନା ନାହିଁ। ଏନେଇ ହଷ୍ଟେଲ ଦାୟିତ୍ୱ ରେ ଥିବା ଉକ୍ତ ବିଦ୍ୟାଳୟର ସହକାରୀ ଶିକ୍ଷକ ବ୍ରଜ କିଶୋର ସିଂ ପଚାରିବାରୁ ସେ କହିଛନ୍ତି, ଉକ୍ତ ଛାତ୍ରାବାସ ପାଇଁ ସରକାର ବର୍ଷକୁ ଥରେ ଅନୁଦାନ ଦେଉଛନ୍ତି ଉକ୍ତ ଅନୁଦାନରେ ହଷ୍ଟେଲ ଚଲାଇବା ସହ ରକ୍ଷଣାବେକ୍ଷଣ କରାଯାଉଛି।
ସେହିପରି ଛାତ୍ରାବାସରେ ରହିଥିବା ପାଣି ଉଠାଉଥିବା ମୋଟରଟି ଅଚଳ ହୋଇପଡିଛି। ଛାତ୍ରମାନେ ତାଙ୍କ ପ୍ରତିକ୍ରିୟାରେ ନିୟମିତ ବାହାରକୁ ଶୌଚ ପାଇଁ ଯାଉଥିବା କହିଛନ୍ତି। ତେବେ ଛାତ୍ର ଏବଂ ଛାତ୍ରାବାସ ଦାୟିତ୍ୱରେ ଥିବା ଶିକ୍ଷକଙ୍କ ମଧ୍ୟରେ କୌଣସି କଥାରେ ତାଳମେଳ ରହୁ ନ ଥିବା ଜଣାପଡିଛି। ସେହିପରି ଛାତ୍ରାବାସରେ ଆଜି ଆମିଷ ରୋଷେଇ ହୋଇଥିବାରୁ କୁକୁର ଓ ଅନ୍ୟ ପ୍ରାଣୀମାନେ ଭିତରକୁ ଆସିଯାଇଥିବା ଶିକ୍ଷକ ସିଂ କହିଛନ୍ତି। ଏନେଇ କନ୍ଧମାଳ ଜିଲା ଶିକ୍ଷାଧିକାରୀ ରାଜେଶ ସ୍ବାଇଁଙ୍କ ସହ ଯୋଗାଯୋଗ କରାଯିବାରୁ ସେ କହିଛନ୍ତି, ସେ ଏବେ ଶୁଣିଲେ। ଉକ୍ତ ବିଦ୍ୟାଳୟରେ ଛାତ୍ରାବାସ ଚଳାଇବାକୁ ସେ ଅନୁମତି ଦେଇଛନ୍ତି କି ନାହିଁ ତାର ଯାଞ୍ଚ କରିବି ଓ ଆବଶ୍ୟକ ଆଇନଗତ ପଦକ୍ଷେପ ନେବି।