ମୁମ୍ବାଇ,୨୪।୧୧: ଚଳିତ ବର୍ଷ ଫିଲ୍ମ ଇଣ୍ଡଷ୍ଟ୍ରି ହେଉ ବା ସିରିୟଲ୍ ଜଗତ ପାଇଁ ଏକ କଳାବର୍ଷ ପାଲଟିଛି। ୨୦୨୦ କେତେକ ବିଶିଷ୍ଟ ଅଭିନେତା ଓ ଅଭିନେତ୍ରୀଙ୍କୁ ପ୍ରଂଶକଙ୍କଠାରୁ ଛଡ଼ାଇନେଇଛି। ଇତିମଧ୍ୟରେ ଜଣାଶୁଣା ଟେଲି ଅଭିନେତା ତଥା ‘ସସୁରାଲ ସିମର କା’ ଫେମ୍ ଆଶିଷ ରୟଙ୍କ ମଙ୍ଗଳବାର ନିଧନ ହୋଇଛି। ମୃତ୍ୟୁ ବେଳକୁ ତାଙ୍କୁ ୫୫ ବର୍ଷ ହୋଇଥିଲା। ଦୀର୍ଘ ସମୟ ଧରି ସେ କିଡ୍ନୀ ରୋଗରେ ପୀଡ଼ିତ ଥିବା ବେଳେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ତାଙ୍କ ବିୟୋଗରେ ବଲିଉଡ୍ ଓ ଟଲିଉଡ୍ ଜଗତରେ ଶୋକର ଛାୟା ଖେଳିଯାଇଛି। ସୂଚନାଯୋଗ୍ୟ, ଚଳିତ ବର୍ଷ କରୋନା ଯୋଗୁ ଆର୍ଥିକ ଅବସ୍ଥା ତାଙ୍କର ସ୍ବଚ୍ଛଳ ନ ଥିବା ବେଳେ ଚିକିତ୍ସା ପାଇଁ ତାଙ୍କୁ ସାହାଯ୍ୟ ଯୋଗାଇଦେବାକୁ ଆଶିଷ ଅନୁରୋଧ କରିଥିଲେ। ସେହି ସମୟରେ ତାଙ୍କର ହସ୍ପିଟାଲରେ ଡାୟଲିସିସ ଚାଲିଥିଲା। ଏହାପୂର୍ବରୁ ଜାନୁଆରୀ ୨୦୧୯ରେ ଆଶିଷଙ୍କୁ ପକ୍ଷାଘାତ ହୋଇଥିଲା। ଏହା ପରଠାରୁ ତାଙ୍କର ସ୍ବାସ୍ଥ୍ୟାବସ୍ଥା ଠିକ୍ ରହୁ ନ ଥିଲା। ତାଙ୍କ କାର୍ଯ୍ୟ କଥା କହିବାକୁ ଗଲେ ସିରିୟଲ୍ ସସୁରାଲ ସିମର କା, ବନେଗି ଅପନି ବାତ୍, ୟେସ୍ ବସ୍, ଜେନି ଅର୍ ଜୁଜୁ, ତୁ ମେରେ ଅଗଲ ବଗଲ ହୈ, ବା ବହୁ ଅର ବେବି, ମେରେ ଅଙ୍ଗନେ ମେଁ ଭଳି କାର୍ଯ୍ୟକ୍ରମରେ କାମ କରି ଆଶିଷ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ। କେବଳ ସେତିକି ନୁହେଁ ସେ ଜଣେ ଭଏସ୍ ଅଭର ଆର୍ଟିଷ୍ଟ ମଧ୍ୟ ଥିଲେ।