ଓ୍ବାଶିଂଟନ,୯।୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବୁଧବାର ସକାଳୁ ଭାରତ ଉପରେ ସମ୍ପୂର୍ଣ୍ଣ ଭାବରେ ୨୬% ଶୁଳ୍କ ଲାଗୁ କରିଛନ୍ତି।
ଟ୍ରମ୍ପ ୩ ଏପ୍ରିଲରେ ହ୍ବାଇଟ ହାଉସ ରୋଜ ଗାର୍ଡେନ୍ରୁ ‘ଲିବରେସନ ଡେ’ ଘୋଷଣା ସମୟରେ ଶୁଳ୍କ ଲାଗୁ କରିବାକୁ ନିଷ୍ପତ୍ତି ନେଇଥିଲେ। ଏହି ପଦକ୍ଷେପ ଆମେରିକୀୟ ବାଣିଜ୍ୟ ନୀତିରେ ଏକ ବଡ଼ ପରିବର୍ତ୍ତନ, ଯାହା ବିଶ୍ୱର ଅନେକ ଦେଶକୁ ପ୍ରଭାବିତ କରିବ।
ଟ୍ରମ୍ପ ଏପ୍ରିଲ ୩ରେ ଘୋଷଣା କରିଥିଲେ ଯେ ଆମେରିକା ଏହାର ସମସ୍ତ ବାଣିଜି୍ୟକ ଅଂଶୀଦାରଙ୍କ ଉପରେ ସର୍ବନିମ୍ନ ୧୦% ଟିକସ ଲାଗୁ କରିବ। ସେ କହିଥିଲେ ଯେ ଏହି ଟିକସ ସେହି ଦେଶଗୁଡ଼ିକ ଉପରେ ଅଧିକ ଲାଗୁ ହେବ ଯେଉଁମାନଙ୍କ ସହିତ ଆମେରିକାର ବାଣିଜ୍ୟ ନିଅଣ୍ଟ ଅଛି।
ଭାରତ ବ୍ୟତୀତ, ଟ୍ରମ୍ପ ଭିଏତନାମ ଉପରେ ୪୬%, ତାଇୱାନ ଉପରେ ୩୨%, ଦକ୍ଷିଣ କୋରିଆ ଉପରେ ୨୫%, ଜାପାନ ଉପରେ ୨୪% ଏବଂ ୟୁରୋପୀୟ ସଂଘ ଉପରେ ୨୦% ଶୁଳ୍କ ଘୋଷଣା କରିଥିଲେ।
ଭାରତ ଉପରେ ଆମେରିକା ଦ୍ୱାରା ଲାଗୁ କରାଯାଇଥିବା ୨୬ ପ୍ରତିଶତ ଶୁଳ୍କ ଅନେକ ସାମଗ୍ରୀର ମୂଲ୍ୟ ବୃଦ୍ଧି କରିବ। ମୂଲ୍ୟ ବୃଦ୍ଧି ଭାରତୀୟ ଉତ୍ପାଦଗୁଡ଼ିକର ପ୍ରତିଯୋଗିତାମୂଳକ କ୍ଷମତାକୁ ହ୍ରାସ କରିପାରେ, ବିଶେଷକରି ଯେଉଁ ଦେଶଗୁଡ଼ିକରେ କମ ଶୁଳ୍କ ଅଛି ସେମାନଙ୍କ ତୁଳନାରେ।
ଏହି ନିଷ୍ପତ୍ତି ସମୟରେ ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ‘ଭଲ ବନ୍ଧୁ’ ବୋଲି କହିଥିଲେ ଏବଂ କହିଥିଲେ ଯେ ପ୍ରଧାନମନ୍ତ୍ରୀ ମୋଦି ତାଙ୍କର ବନ୍ଧୁ, କିନ୍ତୁ ‘ଭାରତ ଆମ ସହିତ ଭଲ ବ୍ୟବହାର କରିନାହିଁ।’ ଟ୍ରମ୍ପ କହିଛନ୍ତି, ‘ଭାରତ ଆମଠାରୁ ୫୨% ଟିକସ ଆଦାୟ କରେ, ତେଣୁ ଆମେ ସେମାନଙ୍କଠାରୁ ଅଧା ଟିକସ ଆଦାୟ କରିବୁ, ଅର୍ଥାତ ୨୬%।’
ଏହି ନିଷ୍ପତ୍ତି ପରେ ଭାରତ ସରକାର ପ୍ରତିକ୍ରିୟା ପ୍ରକାଶ କରିଛନ୍ତି ଏବଂ କହିଛନ୍ତି ଯେ ଏହା ଏହି ଘୋଷଣାର ପ୍ରଭାବକୁ ସତର୍କତାର ସହ ନଜର ରଖିଛି।
ଭାରତର ବାଣିଜ୍ୟ ମନ୍ତ୍ରଣାଳୟ କହିଛି ଯେ ଏହି ପରିବର୍ତ୍ତନର ପୂର୍ଣ୍ଣ ମୂଲ୍ୟାଙ୍କନ କରିବା ଏବଂ ଏକ ବିକଶିତ ଭାରତର ଦୃଷ୍ଟିକୋଣରୁ ପରିସ୍ଥିତିର ମୂଲ୍ୟାଙ୍କନ କରିବା ପାଇଁ ଏହା ଭାରତୀୟ ଶିଳ୍ପ ଏବଂ ରପ୍ତାନିକାରୀଙ୍କ ସମେତ ସମସ୍ତ ଅଂଶୀଦାରଙ୍କ ସହ କଥାବାର୍ତ୍ତା କରୁଛି।
ସୂଚନାଯୋଗ୍ୟ, ଚାଇନା ଉପରେ ଅତିରିକ୍ତ ୫୦ ପ୍ରତିଶତ ଶୁଳ୍କ ଲାଗୁ କରାଯିବ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ସୋମବାର କହିଥିଲେ। ବେଜିଂ ଯଦି ୩୪ ପ୍ରତିଶତ ଜବାବୀ ଶୁଳ୍କ ପ୍ରତ୍ୟାହାର ନକରେ ତେବେ ପୂର୍ବରୁ ଘୋଷିତ ଶୁଳ୍କ ସହ ଅତିରିକ୍ତ ୫୦ ପ୍ରତିଶତ ଶୁଳ୍କ ଲାଗିବ ବୋଲି କୁହାଯାଇଥିଲା। ଓ୍ବାଶିଂଟନର ବ୍ଲାକ୍ମେଲ୍ ବିରୋଧରେ ଶେଷ ପର୍ଯ୍ୟନ୍ତ ଲଢ଼େଇ ଜାରି ରହିବ ବୋଲି ବେଜିଂ କହିବା ପରେ ୨ ଦେଶ ମଧ୍ୟରେ ବାଣିଜ୍ୟ ଯୁଦ୍ଧ ତୀବ୍ରତର ହୋଇଛି। ୫୦% ଅତିରିକ୍ତ ଶୁଳ୍କକୁ ମିଶାଇ ଚାଇନା ସାମଗ୍ରୀ ଉପରେ ମୋଟ ୧୦୪ ପ୍ରତିଶତ ଟାରିଫ୍ ବୁଧବାରଠାରୁ ଲାଗୁ ହେବାକୁ ଯାଉଥିବା ହ୍ବାଇଟ୍ ହାଉସ୍ ଘୋଷଣା କରିଛି।