ଓ୍ବାଶିଂଟନ,୫ା୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ପୁଣି ଧମକ ଦେଇଛନ୍ତି। ହର୍ମୁଜ ପ୍ରଣାଳୀ ଖୋଲିବା ପାଇଁ ଇରାନକୁ ୧୦ ଦିନର ଅଲ୍ଟିମେଟମ ଦେଇଥିଲେ ଟ୍ରମ୍ପ । ଯାହା ଧିରେ ଧିରେ ଶେଷ ଶେଷ ହେବାକୁ ଯାଉଛି। ଯେଉଁଥିପାଇଁ ଟ୍ରମ୍ପ ପୁଣି ଥରେ ଇରାନକୁ ଧମକ ଦେଇଛନ୍ତି। ସେ ରାଗି କି କହିଛନ୍ତି, ‘ତୁମେ ପାଗଳ ଲୋକମାନେ, ହର୍ମୁଜ ପ୍ରଣାଳୀ ଖୋଲିଦିଅ ନଚେତ୍ ନର୍କକୁ ଯିବ।’
ଟ୍ରମ୍ପ ସୋସିଆଲ ମିଡିଆରେ ଏକ ପୋଷ୍ଟ କରି ଲେଖିଛନ୍ତି, ମଙ୍ଗଳବାର ଇରାନରେ ପାଓ୍ବାର ପ୍ଲାଣ୍ଟ ଦିବସ ଏବଂ ସେତୁ ଦିବସ ଏକାଠି ପାଳନ କରାଯିବ। ଏହା ପୂର୍ବରୁ କେବେ ଏମିତି ହୋଇନାହିଁ!!! ତୁମେ ପାଗଳ ଲୋକମାନେ, ହର୍ମୁଜ ପ୍ରଣାଳୀ ଖୋଲିଦିଅ। ସତର୍କ ରୁହ! ଭଗବାନଙ୍କ ନିକଟରେ ପ୍ରାର୍ଥନା କର।
୪ ଏପ୍ରିଲ ରାତିରେ ଟ୍ରମ୍ପ ଇରାନକୁ ମନେ ପକାଇ ଦେଇଥିଲେ ଯେ, ସେ ସେମାନଙ୍କୁ ଏକ ଚୁକ୍ତିରେ ପହଞ୍ଚିବା କିମ୍ବା ହର୍ମୁଜ ପ୍ରଣାଳୀ ଖୋଲିବା ପାଇଁ ୧୦ ଦିନ ସମୟ ଦେଇଛନ୍ତି। ସେ କହିଥିଲେ, ‘ସମୟ ସରି ଆସୁଛି। ୪୮ ଘଣ୍ଟା ମଧ୍ୟରେ, ଆମେରିକା ଏହା ଉପରେ ବିନାଶ ଆରମ୍ଭ କରିବ।’
ଟ୍ରମ୍ପ ପୂର୍ବରୁ କହିଥିଲେ ଯେ, ଇରାନ ଏହାର ଶକ୍ତି କେନ୍ଦ୍ର ଉପରେ ଆକ୍ରମଣ ଉପରେ ୭ ଦିନ ପାଇଁ ସ୍ଥଗିତ ରଖିବାକୁ ଅନୁରୋଧ କରିଥିଲା, କିନ୍ତୁ ସେ ଏହି ସମୟ ସୀମାକୁ ୧୦ ଦିନ ପର୍ଯ୍ୟନ୍ତ ବୃଦ୍ଧି କରିବାକୁ ନିଷ୍ପତ୍ତି ନେଇଥିଲେ, ଯାହା ଏପ୍ରିଲ ୬ ତାରିଖରେ ଶେଷ ହେଉଛି।
ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି, ତେହରାନ ଅଧିକାରୀମାନେ ତାଙ୍କ ପ୍ରଶାସନ ସହିତ ଯୋଗାଯୋଗ କରିଥିଲେ ଏବଂ କୂଟନୈତିକ ଆଲୋଚନାର ଅଂଶ ଭାବରେ ଅଧିକ ସମୟ ଅନୁରୋଧ କରିଥିଲେ। ସେମାନେ ମୋ’ ଲୋକଙ୍କ ମାଧ୍ୟମରେ ମୋତେ ବହୁତ ବିନମ୍ରତାର ସହିତ ପଚାରିଥିଲେ, ‘ଆମେ ଆଉ ଟିକିଏ ସମୟ ପାଇପାରିବୁ କି? ଯଦି ସେମାନେ ମୋ କଥା ନ ଶୁଣନ୍ତି, ତେବେ ମୁଁ ସେମାନଙ୍କର ଶକ୍ତି କେନ୍ଦ୍ରଗୁଡ଼ିକୁ ନଷ୍ଟ କରିଦେବି ବୋଲି ଟ୍ରମ୍ପ କଡ଼ା ଚେତାବନୀ ଦେଇ କହିଛନ୍ତି।