ଲାଞ୍ଜିଗଡ଼,୨।୨(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ବିଶନାଥପୁର ଥାନା ଅନ୍ତର୍ଗତ ଢେପଗୁଡ଼ା ପୋଲରେ ପୁଣି ଏକ କୋଇଲା ବୋଝେଇ ଟ୍ରକ୍ ପୋଲ ତଳକୁ ଖସିପଡ଼ିଛି। ଭବାନୀପାଟଣା ଠାରୁ ରାୟଗଡ଼ାକୁ ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥର ଢେପଗୁଡ଼ା ଏକ ଅଣ ଓସାରିଆ ପୋଲରେ ଭାରସାମ୍ୟ ହରାଇ ୧୫ ଫୁଟ ତଳକୁ ଖସିପଡିଛି ଏକ ଏପି-୩୫- ଟିବି ୫୮୮୫ ନମ୍ବର ବିଶିଷ୍ଟ କୋଇଲା ବୋଝେଇ ଟ୍ରକ୍। ଫଳରେ ଡ୍ରାଇଭର ଓ ହେଲ୍ପର ଗୁରୁତର ଆହତ ହୋଇଛନ୍ତି। ସୂଚନାଯୋଗ୍ୟ, କୋଇଲା ବୋଝେଇ ଟ୍ରକ୍ଟି ବିଶାଖାପାଟଣାଠାରୁ ଭବାନୀପାଟଣା ପଟେ ଯାଉଥିବାବେଳେ ଭାରସାମ୍ୟ ହରାଇ ପୋଲ ତଳକୁ ଖସି ପଡିଥିଲା। ରାସ୍ତାରେ ଯାଉଥିବା ଲୋକେ ଡ୍ରାଇଭର ଓ ହେଲପର୍ଙ୍କୁ ଗୁରୁତର ଭାବେ ଉଦ୍ଧାର କରି ଡାକ୍ତରଖାନା ପଠାଇଥିଲେ। ଘଟଣା ସମ୍ପର୍କରେ ଖବରପାଇ ବିଶ୍ୱନାଥପୁର ପୋଲିସ ତଦନ୍ତ କରୁଛି। ଏହି ଅଣ ଓସାରିଆ ପୋଲରେ ପ୍ରତିଦିନକିଛି ନା କିଛି ଦୁର୍ଘଟଣା ଘଟୁଛି। ଏଥିରେ କାହାରି ଜୀବନ ଯାଉଛି ତ ଆଉ କାହାରି ହାତଗୋଡ଼ ଭାଙ୍ଗୁଛି। ଆଜି ଏହି ଦୁର୍ଘଟଣାରେ ପୋଲର ସୁରକ୍ଷା ବାଡ଼ ସମ୍ପୂର୍ଣ୍ଣ ଭାଙ୍ଗିଯାଇଥିବାବେଳେ ଏହି ପୋଲକୁ ବାରମ୍ବାର ନିମ୍ନମାନର ମରାମତି କରୁଛି ବିଭାଗ। ତେବେ ଏହି ପୋଲକୁ ନୂତନ ଭାବେ ନିର୍ମାଣ ପାଇଁ ଅଭିଯୋଗ ହେଇଆସୁ ହେଁ ଏଥିପ୍ରତି ଦୃଷ୍ଟି ଦେଉ ନାହିଁ କଳାହାଣ୍ଡି ପୂର୍ତ୍ତ ବିଭାଗ। ଏଥିପ୍ରତି ଜିଲା ପ୍ରଶାସନ ତଥା ରାଜ୍ୟ ସରକାର ଦୃଷ୍ଟି ଦେଇ ନୂତନ ପୋଲ ନିର୍ମାଣ କରିବା ପାଇଁ ଦାବି ହେଉଛି।