ଦାରିଙ୍ଗବାଡି, ୬।୧ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଜାଗୃତି କାର୍ଯ୍ୟାଳୟ ପରିସର ମଧ୍ୟରେ ସୋମବାର ୨ ଦିନିଆ ଜନଜାତି ସମ୍ମେଳନ ମଙ୍ଗଳବାର ଉଦ୍ଯାପିତ ହୋଇଯାଇଛି। ଦ୍ୱିତୀୟ ଦିନରେ ଏହି ଦିବସରେ ପାରମ୍ପରିକ ବିହନର କିଭଳି ପୁନଃରୁଦ୍ଧାର କରାଯାଇପାରିବ ଓ ତାକୁ କିଭଳି ଗଚ୍ଛିତ ରଖାଯାଇପାରିବ ଏବଂ ହଜିଯାଇଥିବା ବିହନକୁ ପୁନଃରୁଦ୍ଧାର କରି ପାରମ୍ପରିକ ଚାଷକୁ ଗୁରୁତ୍ୱ ଦିଆଯିବାକୁ ଗୁରୁତ୍ୱ ଦିଆଯାଇଥିଲା। ସେହିପରି ଜଙ୍ଗଲର ସୁରକ୍ଷା ଗଛ ବଞ୍ଚାଇବା ଦ୍ୱାରା କ’ଣ ଫାଇଦା ତାକୁ ନେଇ ଗୁରୁତ୍ୱ ପ୍ରଦାନ କରାଯାଇଥିଲା। ପାରମ୍ପରିକ ଖାଦ୍ୟ, ପୋଷାକ, ବାଦ୍ୟ ଯନ୍ତ୍ର, କୁଇ ସଙ୍ଗୀତ ଓ ଭାଷାକୁ ବହୁଳ ବ୍ୟବହାର ଓ ହଜିଯାଇଥିବା ଏହି ସବୁକୁ ପୁନଃରୁଦ୍ଧାର ପାଇଁ କିଭଳି ପ୍ରୟାସ କରାଯିବ ସେ ସମ୍ପର୍କରେ ଆଲୋଚନା ହୋଇଥିଲା । ଉଦଯାପନୀ ଉତ୍ସବରେ ବାଲିଗୁଡା ଆଇଟିଡିଏର ପ୍ରକଳ୍ପ ପ୍ରଶାସକ କୃପାସିନ୍ଧୁ ବେହେରା ମୁଖ୍ୟ ଅତିଥିଭାବେ ଯୋଗଦେଇ ଜନଜାତିଙ୍କ ଏହି ପାରମ୍ପରିକ କୃଷି ଓ ଅନ୍ୟାନ୍ୟକୁ ପୁନଃରୁଦ୍ଧାର କରି ପୁଣି ଜଙ୍ଗଲକୁ ବୃଦ୍ଧି କରି ନିଜ ଜୀବନଜୀବିକାକୁ ସ୍ବାବଲମ୍ବୀ କରିବାକୁ ବାଟ ବତାଇଥିଲେ । ଜୈବିକ ହଳଦୀ, କଫି, ପନିପରିବା, ଶସ୍ୟ ଆଦିକୁ ସେ ଗୁରୁତ୍ୱ ଦେବାକୁ ପରାମର୍ଶ ଦେଇଥିଲେ । କାର୍ଯ୍ୟକ୍ରମକୁ ଜାଗୃତି ସମ୍ପାଦକ କୈଳାଶ ଚନ୍ଦ୍ର ଦଣ୍ଡପାଟ, ଜାଗୃତି କାର୍ଯ୍ୟକ୍ରମ ସଂଯୋଜକ ସଦାନନ୍ଦ ସିଂ, ଧ୍ରୁବ ଚରଣ ନାୟକ, ମନୋଜ ନାୟକ, ପ୍ରଦୀପ କଂହର, ଅନ୍ତରଙ୍ଗ ଯୁବ ମହାସଙ୍ଘର କର୍ମକର୍ତ୍ତାଙ୍କ ସମେତ ଅନ୍ୟମାନେ ପରିଚାଳନା କରିଥିଲେ । କାର୍ଯ୍ୟକ୍ରମରେ ବିଭିନ୍ନ ଉଲ୍ଲେଖନୀୟ କାର୍ଯ୍ୟକ୍ରମ କରି ଜଙ୍ଗଲ ସୁରକ୍ଷା ସମେତ ଜଙ୍ଗଲ ବୃଦ୍ଧି ଗାଁର ବିକାଶ ପାଇଁ କାର୍ଯ୍ୟ ଆଦି କରି ଅଞ୍ଚଳର ବିକାଶରେ ନିଜ ଶ୍ରମ ଦାନ କରିଛନ୍ତି ସେମାନଙ୍କୁ ପ୍ରଂଶସାପତ୍ର ପ୍ରଦାନ କରିବା ସହ ସମ୍ବର୍ଦ୍ଧିତ କରିଥିଲେ।