ଗଞ୍ଜାମ (ବିଦ୍ୟାଧର ସାହୁ): ଏମିତି ବି ଆସେ ମୃତ୍ୟୁ! ନିଜ ଦାଣ୍ଡ ପିଣ୍ଡାରେ ବସି ଗଛ ଲଗାଇବା ଓ ଅଞ୍ଚଳର ଉନ୍ନତି ପାଇଁ ଚର୍ଚ୍ଚା କରୁଥିବା ବେଳେ ହଠାତ୍ ଚାଲିଗଲା ଜୀବନ। ଗଞ୍ଜାମ ସହରର ପ୍ରତିଷ୍ଠିତ ବ୍ୟବସାୟୀ ତଥା ପରିବେଶ ପ୍ରେମୀ ବିଶ୍ୱନାଥ ସାମନ୍ତରା (୫୭), ଯିଏ କି ସ୍ଥାନୀୟ ଅଞ୍ଚଳରେ ‘ଗଛର ମଣିଷ’ ବିଶୁ ଭାଇ ଭାବେ ବେଶ୍ ପରିଚିତ ଥିଲେ, ତାଙ୍କର ବୁଧବାର ସନ୍ଧ୍ୟାରେ ଆକସ୍ମିକ ଦେହାନ୍ତ ହୋଇଯାଇଛି।
ପ୍ରତିଦିନ ଭଳି ବିଶୁ ଭାଇ ନିଜ ଦୋକାନ ପିଣ୍ଡାରେ ବସି ଅଞ୍ଚଳବାସୀଙ୍କ ସହ ଆଲୋଚନା କରୁଥିଲେ। ବିଶେଷ କରି ଋଷିକୁଳ୍ୟା ନଦୀ ପଠାରେ ଥିବା ମଶାଣି ତୁଠର ଉନ୍ନତିକରଣ ଏବଂ ସେଠାରେ କିପରି ଅଧିକରୁ ଅଧିକ ଗଛ ଲଗାଯାଇ ପରିବେଶକୁ ସୁରକ୍ଷିତ ରଖାଯାଇପାରିବ, ସେନେଇ ସେ ଯୋଜନା କରୁଥିଲେ। ଏହି ସମୟରେ ହଠାତ୍ ସେ ଟଳିପଡ଼ିଥିଲେ। ଉପସ୍ଥିତ ଲୋକେ ତୁରନ୍ତ ତାଙ୍କୁ ଡାକ୍ତରଖାନା ନେଇଥିଲେ ହେଁ, ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ବିଶୁ ଭାଇ କେବଳ ଜଣେ ବ୍ୟବସାୟୀ ନ ଥିଲେ, ବରଂ ଜଣେ ସଚ୍ଚୋଟ ପରିବେଶ କର୍ମୀ ଥିଲେ। ସେ ସଂଘ ପରିବାରର ବିଭିନ୍ନ ଅନୁଷ୍ଠାନ ସହ ଜଡ଼ିତ ରହି ସମାଜସେବାରେ ନିଜକୁ ନିୟୋଜିତ କରିଥିଲେ। ଗଛ ଲଗାଇବା ପାଇଁ ତାଙ୍କର ଯେଉଁ ନିଶା ଥିଲା, ସେଥିପାଇଁ ସାରା ସହର ତାଙ୍କୁ ‘ଗଛର ମଣିଷ’ର ଆଖ୍ୟା ଦେଇଥିଲା। ତାଙ୍କ ମୃତ୍ୟୁ ଖବର ପାଇବା ପରେ ସହରରେ ଶୋକାକୁଳ ପରିବେଶ ସୃଷ୍ଟି ହୋଇଛି। ଋଷିକୁଳ୍ୟା ନଦୀ ଘାଟରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ପୁରୀ ଶଙ୍କରାଚାର୍ଯ୍ୟ ବେଦ ପାଠଶାଳାର ଛାତ୍ର ତଥା ତାଙ୍କ ବଡ଼ ପୁଅ ଓମ୍ ମୁଖାଗ୍ନି ଦେଇଥିଲେ।
ତାଙ୍କ ବିୟୋଗରେ ବିଧାୟକ କୃଷ୍ଣଚନ୍ଦ୍ର ନାୟକ, ପୂର୍ବତନ ବିଧାୟକ ଡଃ ପ୍ରିୟାଂଶୁ ପ୍ରଧାନ,ପୂର୍ବତନ ବିଧାୟକ ସୁବାଷ ଚନ୍ଦ୍ର ବେହେରା,ଗଞ୍ଜାମ ପ୍ରେସ କ୍ଲବ ସଭାପତି ଶବର କୁମାର ତରାଇ ଏବଂ ଅଞ୍ଚଳର ବହୁ ମାନ୍ୟଗଣ୍ୟ ବ୍ୟକ୍ତି, ରାଜନେତା ଓ ସାମାଜିକ କର୍ମୀ ଗଭୀର ଶୋକ ପ୍ରକାଶ କରିବା ସହ ଏହା ଏକ ଅପୂରଣୀୟ କ୍ଷତି ବୋଲି କହିଛନ୍ତି।