ଇସଲାମବାଦ,୧୧।୩: ପାକିସ୍ତାନର ବାଲୁଚ ବିଦ୍ରୋହୀମାନେ 400 ଯାତ୍ରୀଙ୍କୁ ନେଇ ଯାଉଥିବା ଜାଫର ଏକ୍ସପ୍ରେସକୁ କବଜା କରିଛନ୍ତି। ସୂତ୍ର ଅନୁଯାୟୀ, ଏହି ଟ୍ରେନରେ ପାକିସ୍ତାନୀ ସେନାର ୧୦୦ ସୈନିକ ଏବଂ ପାକିସ୍ତାନ ଗୁଇନ୍ଦା ସଂସ୍ଥା ISIର ଅନେକ ଅଧିକାରୀ ଉପସ୍ଥିତ ଅଛନ୍ତି। ଏହି ଟ୍ରେନରେ ଶହ ଶହ ସାଧାରଣ ଯାତ୍ରୀ ମଧ୍ୟ ଯାତ୍ରା କରୁଥିଲେ। କୁହାଯାଉଛି ଯେ ଏଥିରେ କ୍ୱେଟାର ସେନା ଅଧିକାରୀମାନେ ବସିଥିଲେ। କ୍ୱେଟା ପାକିସ୍ତାନର ପ୍ରମୁଖ ସାମରିକ ଘାଟି ମଧ୍ୟରୁ ଗୋଟିଏ। ତେଣୁ, ଏହି ଟ୍ରେନରେ ଅନେକ ଗୁରୁତ୍ୱପୂର୍ଣ୍ଣ ବ୍ୟକ୍ତି ରହିବେ ବୋଲି ବିଶ୍ୱାସ କରାଯାଉଛି।
ବିଏଲଏ ଦାବି କରିଛି ଯେ, ଗତ 6 ଘଣ୍ଟା ଧରି 182 ଜଣଙ୍କୁ ବନ୍ଧକ ରଖାଯାଇଛି। ଏହି ଅପରେଶନରେ ଏପର୍ଯ୍ୟନ୍ତ 20 ଜଣ ପାକିସ୍ତାନୀ ଯବାନଙ୍କୁ ହତ୍ୟା କରାଯାଇଛି। ଜାଫର ଏକ୍ସପ୍ରେସ ଟ୍ରେନରେ ହାଇଜାକ୍ ପରେ ଏପରି ବର୍ବରକାଣ୍ଡ ଘଟିଛି। ତେବେ ଟ୍ରେନରେ ଥିବା ୧୮୨ ଯାତ୍ରୀ ପଣବନ୍ଦୀ ଥିବା ସୂଚନା ମିଳିଛି।