ବେଜିଂ,୧।୯:ଚାଇନାର ତିଆନଜିନରେ ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ଚମତ୍କାର ବନ୍ଧୁତା ଦେଖିବାକୁ ମିଳିଥିଲା। ଉଭୟ ନେତା ଖୁସିର ସହ ଭେଟିଥିଲେ ଏବଂ ପରସ୍ପରକୁ ଆଲିଙ୍ଗନ କରିଥିଲେ। ପରେ ସେମାନେ ଚାଇନାରେ ଦ୍ୱିପାକ୍ଷିକ ଆଲୋଚନା ପାଇଁ ଯିବା ପୂର୍ବରୁ ଗୋଟିଏ କାରରେ ଏକାଠି ଯାତ୍ରା କରିଥିଲେ, ଯାହା ବିଶ୍ୱରେ ଖବର ପାଲଟିଛି।
ଯେଉଁ ବ୍ୟକ୍ତି(ରୁଷିଆା ରାଷ୍ଟ୍ରପତି)ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଠ ମାସ ଧରି ଭେଟିବାକୁ ଇଚ୍ଛା କରୁଥିଲେ, ପ୍ରଧାନମନ୍ତ୍ରୀ ମୋଦି ସେହି ବ୍ୟକ୍ତିଙ୍କୁ ଗତ ଚାରି ଘଣ୍ଟା ମଧ୍ୟରେ ମୋଟ ଆଠ ଥର ଭେଟିଛନ୍ତି। ଏଥିରୁ ଅନୁମାନ କରାଯାଇପାରେ ଯେ, ଦୁଇ ଦେଶ ମଧ୍ୟରେ ସମ୍ପର୍କ କେତେ ମଜଭୁତ। ଚାଇନାରେ ମୋଦି ଏବଂ ପୁଟିନଙ୍କ ସାକ୍ଷାତ ଆମେରିକା ଏବଂ ସମଗ୍ର ବିଶ୍ୱକୁ ଏକ ବାର୍ତ୍ତା ଦେଇଛି।
ଏହାସହିତ, ଭାରତ ଏବଂ ଚାଇନା ମଧ୍ୟରେ ସମ୍ପର୍କରେ ମଧ୍ୟ ବହୁତ ଉନ୍ନତି ଦେଖାଯାଇଛ। ଭାରତ ସହିତ ସମ୍ପର୍କକୁ ମଜଭୁତ କରିବାକୁ ରାଷ୍ଟ୍ରପତି ପୁଟିନ ଲଗାତାର ଚାଇନାକୁ କହୁଛନ୍ତି। ଏହି ବୈଠକରେ ଯୋଗ ଦେବା ପୂର୍ବରୁ, ପୁଟିନ, ପ୍ରଧାନମନ୍ତ୍ରୀ ମୋଦି ଏବଂ ସି ଜିନପିଙ୍ଗ, ତିନି ନେତା ଏକାଠି ସାକ୍ଷାତ କରିଥିଲେ। ତିନି ନେତା ପ୍ରାୟ ୨ ମିନିଟ ପାଇଁ କଥାବାର୍ତ୍ତା କରିଥିଲେ। ଏହି ସମୟରେ, ତିନି ନେତା ବହୁତ ଖୁସି ଦେଖାଯାଉଥିଲେ।
ପ୍ରଧାନମନ୍ତ୍ରୀ ମୋଦି ରାଷ୍ଟ୍ରପତି ପୁଟିନଙ୍କ ସହ କିଛି ଫଟୋ ଶେୟାର କରିଛନ୍ତି, ଯାହା ମଧ୍ୟରୁ ଗୋଟିଏରେ ଉଭୟ ନେତା କଥାବାର୍ତ୍ତା କରୁଥିବା ଏବଂ ଅନ୍ୟଟିରେ ଆଲିଙ୍ଗନ କରୁଥିବାର ଦେଖାଯାଉଛି। ଫଟୋ ଶେୟାର କରି ପ୍ରଧାନମନ୍ତ୍ରୀ ମୋଦି ଟୁଇଟ୍ କରିଛନ୍ତି, ରାଷ୍ଟ୍ରପତି ପୁଟିନଙ୍କୁ ଭେଟିବା ସର୍ବଦା ଖୁସିର କଥା। କିଛି ଘଣ୍ଟା ପରେ, ସେ ଏକ କାରର ପଛ ସିଟରେ ବସିଥିବା ଦୁଇ ନେତାଙ୍କ ଏକ ଫଟୋ ମଧ୍ୟ ଶେୟାର କରିଛନ୍ତି। ସେ କହିଛନ୍ତି, SCO ସମ୍ମିଳନୀ ସ୍ଥାନରେ ସାକ୍ଷାତ ପରେ, ରାଷ୍ଟ୍ରପତି ପୁଟିନ ଏବଂ ମୁଁ ଏକାଠି ଆମର ଦ୍ୱିପାକ୍ଷିକ ବୈଠକ ସ୍ଥାନକୁ ଗଲୁ। ତାଙ୍କ ସହ ଆଲୋଚନା ସର୍ବଦା ଜ୍ଞାନଦାୟକ।
ଦୁଇ ନେତାଙ୍କ ମଧ୍ୟରେ ଏହି ସୁଖଦ ସାକ୍ଷାତ ଏପରି ଏକ ସମୟରେ ହୋଇଛି ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟ ଆମଦାନୀ ଉପରେ ୫୦ ପ୍ରତିଶତ ଟାରିଫ୍ ଲାଗୁ କରିଛନ୍ତି, ଯାହାର ଅଧା ରୁଷିଆ ସହିତ ବ୍ୟବସାୟ କରିବା ପାଇଁ ଦଣ୍ଡ ସୱରୂପ ଲାଗୁ କରାଯାଇଛି।