ଓ୍ବାଶିଂଟନ,୧୯ା୭: ବିଶ୍ୱର ସର୍ବବୃହତ ଟେକ୍ କମ୍ପାନୀ ଆପଲ ପ୍ରସିଦ୍ଧ YouTuber ଜନ ପ୍ରୋସର୍ ଏବଂ ମାଇକେଲ ରାମାସିଓଟିଙ୍କ ବିରୋଧରେ ଗୁରୁତର ଅଭିଯୋଗ ଆଣିଛି। କମ୍ପାନୀ ଆମେରିକାର କାଲିଫର୍ନିଆର ଏକ କୋର୍ଟରେ ମାମଲା ଦାୟର କରିଛି। କମ୍ପାନୀ ଅଭିଯୋଗ କରିଛି ଯେ, ସେମାନେ ଉଭୟ iOS-୨୬ର ସିକ୍ରେଟ୍ ଫିଚର ଚୋରି କରି ଏହାକୁ ସାର୍ବଜନୀନ କରିଛନ୍ତି।
ଆପଲ ଅନୁଯାୟୀ, ମାଇକେଲ ରାମାସିଓଟି ଜଣେ Apple କର୍ମଚାରୀଙ୍କ ଫୋନରୁ iOS-୨୬ ସହ ଜଡ଼ିତ ଗୁପ୍ତ ବିବରଣୀ ଚୋରି କରିଥିଲେ। ଏହା ପରେ ସେ YouTuber ଜନ ପ୍ରୋସରଙ୍କୁ ସେହି ସୂଚନା ଦେଇଥିଲେ, ଯିଏ ତାଙ୍କ ଚ୍ୟାନେଲ ଫ୍ରଣ୍ଟ୍ ପେଜ୍ ଟେକ୍ରେ ଏକ ଭିଡିଓ ମାଧ୍ୟମରେ ଏହା ଉପସ୍ଥାପନ କରିଥିଲେ।
ଏକ ବିବୃତ୍ତିରେ ଜନ କହିଛନ୍ତି, ସେ ଜାଣିଶୁଣି କିଛି ଚୋରି କରିନାହାନ୍ତି, କିମ୍ବା ସେ ଜାଣି ନାହାନ୍ତି ଯେ, ଏହି ସୂଚନା କେଉଁଠାରୁ ଆସିଛି। ସେ କୋର୍ଟରେ ତାଙ୍କର ସତ୍ୟ ଉପସ୍ଥାପନ କରିବେ।
ଜନ ପ୍ରୋସେର ଜଣେ ପ୍ରସିଦ୍ଧ ଟେକ୍ YouTuber ଯିଏ ଆପଲ ଉତ୍ପାଦ ଏବଂ ଅପଡେଟ୍ ବିଷୟରେ ଲିକ୍ ହୋଇଥିବା ସୂଚନା ପ୍ରଥମେ ଶେୟାର କରିଥିଲେ। ଜାନୁଆରୀରେ ମଧ୍ୟ ସେ iOS-୨୬ ସହ ଜଡ଼ିତ ସୂଚନା ବିଷୟରେ ପ୍ରଥମଥର ପାଇଁ ବିଶ୍ୱକୁ ଜଣାଇଥିଲେ।
ଆପଲ ଅନୁଯାୟୀ, ପ୍ରୋସେର ରାମାସିଓଟିଙ୍କୁ ଆଇଫୋନ ଆକ୍ସେସ କରିବାକୁ କହିଥିଲେ ଯାହା ଜଣେ ଆପଲ ଇଞ୍ଜିନିୟରଙ୍କ ଡିଭାଇସ ଥିଲା। ରିପୋର୍ଟ ଅନୁଯାୟୀ, ଟଙ୍କାର ଆବଶ୍ୟକତା ଯୋଗୁ ରାମାସିଓଟି ଏହି ସୂଚନା ଚୋରି କରିଥିଲେ ଏବଂ ଫେସ୍ଟାଇମ୍ କଲ୍ରେ ପ୍ରୋସେରଙ୍କୁ ଦେଖାଇଥିଲେ। ପ୍ରୋସେର କଲ୍ ରେକର୍ଡ କରିଥିଲେ ଏବଂ ଏକ ଭିଡିଓ ତିଆରି କରିଥିଲେ ଏବଂ ଏହାକୁ ତାଙ୍କ ଚ୍ୟାନେଲରେ ଅପଲୋଡ୍ କରିଥିଲେ, ଯାହା ତାଙ୍କୁ ବିଜ୍ଞାପନରୁ ମଧ୍ୟ ରୋଜଗାର କରିଥିଲା।
iOS-୨୬ର ଏହି ଫିଚରଗୁଡ଼ିକ ପ୍ରୋସେରଙ୍କ ଭିଡିଓରେ ପ୍ରକାଶିତ ହୋଇଥିଲା, ନୂଆ କ୍ୟାମେରା ଆପ୍ ଯେଉଁଥିରେ ଫଟୋ ଏବଂ ଭିଡିଓ ମୋଡ୍ ପରିବର୍ତ୍ତନ କରିବା ସହଜ, ପୁନଃଡିଜାଇନ କରାଯାଇଥିବା ମେସେଜ ଆପ, ଗୋଲ୍ ବଟନ ଏବଂ ନୂଆ କି-ବୋର୍ଡ, ଲିକ୍ୱିଡ ଗ୍ଲାସ ଇଣ୍ଟରଫେସ୍, ଯେଉଁଥିରେ କାଚ ପରି ନରମ ଡିଜାଇନ ଉପାଦାନ ଏବଂ ଷ୍ଟାଇଲିଶ୍ ଟ୍ୟାବ ଥିଲା।
ଆପଲ ଏହି ଲିକକୁ କମ୍ପାନୀର ସୁରକ୍ଷା ବିରୋଧରେ ଏକ ବଡ଼ ବିପଦ ବୋଲି କହିଛି। କମ୍ପାନୀ ଇଥାନ ଲିପନିକ୍କୁ ବହିଷ୍କାର କରି କ୍ଷତିପୂରଣ ଏବଂ ଲିକ୍ ବନ୍ଦ ପାଇଁ କୋର୍ଟଙ୍କ ନିର୍ଦ୍ଦେଶ ଲୋଡ଼ିଛି।