ରାୟପୁର, ୨ା୧୨: ସ୍ଥାନୀୟ ଶହୀଦ ବୀର ନାରାୟଣ ସିଂ ଇଣ୍ଟରନ୍ୟାଶନାଲ ଷ୍ଟାଡିୟମରୁ ୫ ବର୍ଷ ହେଲା ବିଦ୍ୟୁତ୍ ସଂଯୋଗ କାଟିଦିଆଯାଇଛି।ଏହାସତ୍ତ୍ୱେ ସେଠାରେ ଶୁକ୍ରବାର ଭାରତ-ଅଷ୍ଟ୍ରେଲିଆ ୪ର୍ଥ ଅନ୍ତର୍ଜାତୀୟ ଟି୨୦ କ୍ରିକେଟ ମ୍ୟାଚ ଖେଳାଯାଇଛି। ଏହା କିପରି ସମ୍ଭବ ହୋଇପାରୁଛି ସେ ନେଇ କୌତୂହଳ ସୃଷ୍ଟିହେବା ସ୍ବାଭାବିକ। ଖବର ଅନୁସାରେ, ବିଦ୍ୟୁତ୍ ବିଭାଗ ନିକଟରେ ୨୦୦୯ରୁ ୩.୧୬ କୋଟି ଟଙ୍କା ଷ୍ଟାଡିୟମ କର୍ତ୍ତୃପକ୍ଷଙ୍କ ବିଦ୍ୟୁ୍ତ ଶୁଳ୍କ ବାକି ରହିଛି। ସେଥିପାଇଁ ବିଦ୍ୟୁତ୍ କାଟି ଦିଆଯାଇଛି। ତଥାପି ଏହି ଷ୍ଟାଡିୟମରେ ଶୁକ୍ରବାର ଟି୨୦ ପୂର୍ବରୁ ଇତିମଧ୍ୟରେ ୩ଟି ଅନ୍ତର୍ଜାତୀୟ କ୍ରିକେଟ ମ୍ୟାଚ ଖେଳାଯାଇ ସାରିଛି। ସେତେବେଳେ ମ୍ୟାଚ ପାଇଁ ଛତିଶଗଡ଼ କ୍ରିକେଟ ଆସୋସିଏଶନ (ସିଏସ୍ସିଏ)ର ଅନୁରୋଧ କ୍ରମେ ଅସ୍ଥାୟୀ ବିଦ୍ୟୁତ୍ ସଂଯୋଗ ଦିଆଯାଇଥିଲା, ଯାହାକି କେବଳ ଗ୍ୟାଲେରି ଓ ବକ୍ସକୁ ଆଲୋକିତ କରିବ। ମ୍ୟାଚ୍ ବେଳେ ଫ୍ଲଡ୍ଲାଇଟ୍ ପାଇଁ ଜେନେରେଟରର ସହାୟତା ନିଆଯାଇଥିଲା। ଏଥର କିନ୍ତୁ ଷ୍ଟାଡିୟମରେ କାମଚଳା ବିଦ୍ୟୁତ୍ ସଂଯୋଗ ପରିସରକୁ ବୃଦ୍ଧି କରିବା ଲାଗି କ୍ରିକେଟ ଆସୋସିଏଶନ ସମ୍ପାଦକ ଆବେଦନ କରିଥିବା ରାୟପୁର ରୁରାଲ ସର୍କଲ ଇନ୍ଚାର୍ଜ ଅଶୋକ ଖଣ୍ଡେଲଓ୍ବାଲ ପ୍ରକାଶ କରିଛନ୍ତି। ବର୍ତ୍ତମାନ ଷ୍ଟାଡିୟମରେ ଅସ୍ଥାୟୀ ସଂଯୋଗ କ୍ଷମତା ୨୦୦ କେଭି ରହିଛି। ଏହାର କ୍ଷମତା ୧ ହଜାର କେଭିକୁ ବୃଦ୍ଧି କରିବା ଲାଗି ଆବେଦନ କରାଯାଇଥିଲା। ଏହା ଅନୁମୋଦନ ଲାଭ କରିଥିଲେ ମଧ୍ୟ କାର୍ଯ୍ୟାରମ୍ଭ ହୋଇପାରି ନାହିଁ। ବିଦ୍ୟୁତ୍ ସଂଯୋଗ ନ ଥିବାରୁ ୨୦୧୮ରେ ଏହି ଷ୍ଟାଡିୟମରେ ହାଫ୍ ମାରାଥନରେ ଭାଗ ନେଇଥିବା ପ୍ରତିଯୋଗୀଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ୨୦୦୯ରୁ ବିଦ୍ୟୁତ୍ ଶୁଳ୍କ ପଇଠ କରାଯାଇ ନ ଥିବାରୁ ଏହାର ପରିମାଣ ବୃଦ୍ଧି ପାଇ ୩.୧୬ କୋଟି ଟଙ୍କାରେ ପହଞ୍ଚତ୍ଥିଲା। ଖବର ଅନୁସାରେ ଷ୍ଟାଡିୟମ ନିର୍ମାଣ ପରେ ଏହାର ରକ୍ଷଣାବେକ୍ଷଣା ଦାୟିତ୍ୱ ପୂର୍ତ୍ତ ବିଭାଗକୁ ହସ୍ତାନ୍ତର କରାଯାଇଥିଲା। ଅବଶିଷ୍ଟ ବ୍ୟୟ ଭାର କ୍ରୀଡ଼ା ବିଭାଗ ଉପରେ ନ୍ୟସ୍ତ କରାଯାଇଥିଲା। ବିଦ୍ୟୁତ୍ ବକେୟା ପଡ଼ିଥିବା ବିଲ୍କୁ ନେଇ ଦୁଇ ବିଭାଗ ପରସ୍ପରକୁ ଦୋଷାରୋପ କରିବାରେ ଲାଗିଛନ୍ତି। ବିଦ୍ୟୁତ୍ ବିଲ୍ ପଇଠ କରିବା ଲାଗି ବିଦ୍ୟୁତ୍ କମ୍ପାନୀ ବହୁବାର ପୂର୍ତ୍ତ ବିଭାଗ ଓ କ୍ରୀଡ଼ା ବିଭାଗ ନିକଟକୁ ନୋଟିସ ପଠାଇଛି। ମାତ୍ର ଏ ପର୍ଯ୍ୟନ୍ତ ପାଉଣା ଦାଖଲ କରାଯାଇନାହିଁ। ୨୦୧୮ରେ ଷ୍ଟାଡିୟମରୁ ବିଦ୍ୟୁତ୍ ସଂଯୋଗ କାଟିି ଦିଆଯାଇଥିଲେ ମଧ୍ୟ ତିନୋଟି ଅନ୍ତର୍ଜାତୀୟ କ୍ରିକେଟ ମ୍ୟାଚ ଖେଳାଯାଇଛି।