ଲୋଇସିଂହା,୧୩।୩(ସୁଶାନ୍ତ ବାରିକ): ବଲାଙ୍ଗୀର ଜିଲା ଲୋଇସିଂହା ଅଞ୍ଚଳରେ ତାପମାତ୍ରା ୩୫ ଡିଗ୍ରୀ ଉପରେ ରହୁଛି ା ଅସ୍ବାଭାବିକ ତାପମାତ୍ରା ବୃଦ୍ଧି ନେଇ ଜନଜୀବନ ଅସ୍ତବ୍ୟସ୍ତ ହେବାରେ ଲାଗିଲାଣି। ପିଇବା ପାଣିର ଚାହିଁଦା ବୃଦ୍ଧି ପାଇଛି। କିନ୍ତୁ ପଞ୍ଚାୟତ ପକ୍ଷରୁ ଖୋଲାଯାଉଥିବା ପାଣିଛତ୍ର ଦେଖାମିଳୁନାହିଁ। ବାଟଘାଟରେ ପିଇବା ପାଣି ନ ପାଇ ପଥଚାରୀମାନେ ହଟହଟା ହେଉଛନ୍ତି। ଲୋଇସିଂହା ବ୍ଲକ ପ୍ରଶାସନ କିମ୍ବା ନବ ଗଠିତ ଲୋଇସିଂହା ଏନଏସି କତ୍ତୃପକ୍ଷଙ୍କ ତରଫରୁ ଗ୍ରୀଷ୍ମ ମୁକାବିଲା ପ୍ରସ୍ତୁତି କରିନାହାନ୍ତି। ଜନସାଧାରଣ ବିଭିନ୍ନ କାର୍ଯ୍ୟ ପାଇଁ ଲୋଇସିଂହା ମୁଖ୍ୟାଳୟରେ ଥିବା ବ୍ଲକ, ତହସିଲ,ଡାକ୍ତରଖାନା, କୋର୍ଟ ଆଦିକୁ ଆସୁଛନ୍ତି। ହେଲେ ବାଟରେ ଜଳଛତ୍ର ଖୋଲା ହୋଇ ନ ଥିବାରୁ ପିଇବା ପାଣି ନ ପାଇ ହଟହଟା ହେଉଛନ୍ତି। ଏସମ୍ପର୍କରେ ବିଡିଓ ଅକ୍ଷୟ ପାଣି ଉଦ୍ଦୁଙ୍କୁ ପଚାରିବାରୁ କହନ୍ତି, ଜନପ୍ରତିନିଧିଙ୍କୁ ନେଇ ଗ୍ରୀଷ୍ମ ମୁକାବିଲା ପ୍ରସ୍ତୁତି ବୈଠକ ହୋଇନାହିଁ। ଖୁବଶୀଘ୍ର ବୈଠକ ଡାକି ଆବଶ୍ୟକ ପଦକ୍ଷେପ ନିଆଯିବ ବୋଲି ବିଡିଓ ଉଦ୍ଦୁ କହିଛନ୍ତି।