ଓ୍ବାଶିଂଟନ୍,୧୩।୧୧: ଆମେରିକାର ରାଷ୍ଟ୍ରପତି ନିର୍ବାଚନରେ ନିକଟରେ ଏକ ଐତିହାସିକ ବିଜୟ ହାସଲ କରିଛନ୍ତି ଡୋନାଲ୍ଡ ଟ୍ରମ୍ପ। ଏହାକୁ ନେଇ ସାରା ବିଶ୍ୱ ଗଣମାଧ୍ୟମରେ ଆଲୋଚନା କରାଯାଉଛି। କେହି କେହି ତାଙ୍କ ବିଜୟର କାରଣ ବିଷୟରେ କହୁଛନ୍ତି ଏବଂ କେହି କେହି ତାଙ୍କ ଅଭିଯାନ ବିଷୟରେ କଥାବର୍ତ୍ତା ହେଉଛନ୍ତି।
ଏମାନଙ୍କ ବ୍ୟତୀତ ତାଙ୍କ ପରିବାରକୁ କେତେକ ଆର୍ଟିକିଲରେ ମଧ୍ୟ ପ୍ରଶଂସା କରାଯାଉଛି ଏବଂ ଟ୍ରମ୍ପଙ୍କ ବିଜୟରେ ସେମାନେ ମଧ୍ୟ ଏକ ବଡ଼ ଅବଦାନ ରଖିଥିବା କୁହାଯାଉଛି। ତେବେ ତାଙ୍କ ପରିବାରର ଜଣେ ସଦସ୍ୟ ଅଛନ୍ତି ଯିଏ ଏଥର ଚର୍ଚ୍ଚାରେ ଅଛନ୍ତି। ସେ ହେଉଛନ୍ତି ଟ୍ରମ୍ପଙ୍କ ସାନ ପୁଅ ବାରୋନ।
ବାରୋନ ଟ୍ରମ୍ପ ମାର୍ଚ୍ଚ ୨୦, ୨୦୦୬ରେ ଜନ୍ମଗ୍ରହଣ କରିଥିଲେ। ସେ ଜନ୍ମ ହେବା ଦିନରୁ ବିଳାସପୂର୍ଣ୍ଣ ଜୀବନ ବିତାଉଛନ୍ତି। ଟ୍ରମ୍ପ ଟାୱାରର ଏକ ସମ୍ପୂର୍ଣ୍ଣ ମହଲା ତାଙ୍କ ଖେଳ ପଡିଆ ଭାବରେ ତିଆରି କରାଯାଇଥିଲା। ବ୍ୟାରେନ ଡୋନାଲ୍ଡ ଟ୍ରମ୍ପ ଏବଂ ମେଲାନିଆର ସନ୍ତାନ।
ବାରୋନଙ୍କୁ ୧୧ ବର୍ଷ ହୋଇଥିଲାବେଳେ, ତାଙ୍କ ପିତା ଡୋନାଲ୍ଡ ଟ୍ରମ୍ପ ୨୦୧୭ରେ ଆମେରିକାର ରାଷ୍ଟ୍ରପତି ହୋଇଥିଲେ। ସେ ପରିବାର ସହିତ ପେଣ୍ଟହାଉସ ଛାଡି ସିଧା ହ୍ବାଇଟ ହାଉସକୁ ଗଲେ। ଏଠାରେ ସେ ସମସ୍ତ ବିଳାସପୂର୍ଣ୍ଣ ସୁବିଧା ମଧ୍ୟ ପାଇଲେ। ହ୍ବାଇଟ ହାଉସରେ ତାଙ୍କ ପାଇଁ ବିଶେଷ ସୁବିଧା ଥିଲା। ଯେପରିକି ଘରୋଇ ପ୍ରେକ୍ଷାଳୟ, ପୁଲ, ବୋଲିଂ ଆଲି ଏବଂ ଅନ୍ୟାନ୍ୟ।
ଚଳିତବର୍ଷ ବାରୋନଙ୍କୁ ୧୮ ବର୍ଷ ହୋଇଥିଲା ଏବଂ ସେ ବୟସ୍କ ହେବା ମାତ୍ରେ ସେ ଏକ ସ୍ବତନ୍ତ୍ର ଅଭିଯାନରେ କାମ କରିବା ଆରମ୍ଭ କଲେ। ରାଷ୍ଟ୍ରପତି ନିର୍ବାଚନରେ ତାଙ୍କ ପିତା ଡୋନାଲ୍ଡ ଟ୍ରମ୍ପଙ୍କୁ ଜିତାଇବା ଏହି ଅଭିଯାନ ଥିଲା। ଟ୍ରମ୍ପଙ୍କ ନିର୍ବାଚନ ପ୍ରଚାରରେ ବାରୋନ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା କୁହାଯାଉଛି। ଏହା ମଧ୍ୟ ଆଲୋଚନା ହେଉଛି ଯେ, ଟ୍ରମ୍ପ କେବଳ ବାରୋନଙ୍କ ନିର୍ଦ୍ଦେଶରେ ଜୋ ରୋଗାନଙ୍କ ପୋଡକାଷ୍ଟରେ ପହଞ୍ଚିଥିଲେ।