ମୁମ୍ବାଇ: ପୂର୍ବତନ ବିଶ୍ୱସୁନ୍ଦରୀ ତଥା ନୀଳନୟନା ଐଶ୍ୱର୍ଯ୍ୟା ରାୟବଚ୍ଚନଙ୍କୁ ପ୍ରଶଂସକ ଖୁବ୍ ଭଲ ପାଆନ୍ତି। ଖାଲି ଦେଶରେ ନୁହେଁ, ବିଦେଶରେ ମଧ୍ୟ ଐଶ୍ଙ୍କ ଲୋକପ୍ରିୟତା ରହିଛି। ଖାସ୍ ଏଥିପାଇଁ ନେଦରଲାଣ୍ଡର କୁକେନହଫ୍ ଗାର୍ଡେନରେ ଏକ ଫୁଲର ନାମ ଐଶ୍ୱର୍ଯ୍ୟା ରାୟ ଦିଆଯାଇଛି। ଏହା ବ୍ୟତୀତ ଐଶ୍ ପ୍ରଥମ ଭାରତୀୟ ମହିଳା ଯାହାଙ୍କୁ କି ବିଦେଶରେ ଓପ୍ରା ଓ୍ବିନ୍ଫ୍ରେଙ୍କ ଶୋ’ଙ୍କୁ ଡକାଯାଇଥିଲା।
ଐଶ୍ୱର୍ଯ୍ୟା ଯେତେବେଳେ ନବମ ଶ୍ରେଣୀରେ ପଢୁଥିଲେ ତାଙ୍କୁ ପ୍ରଥମଥର କ୍ୟାମେଲିନ୍ ପେନ୍ସିଲ୍ର ଆଡ୍ ଫିଲ୍ମରେ ଅଫର ଆସିଥିଲା। ସେ ମୁମ୍ବାଇରେ ଆର୍କିଟେକ୍ଚରରେ ପାଠପଢ଼ା ଆରମ୍ଭ କରିଥିଲେ। ମାତ୍ର ମଡେଲିଂରେ କ୍ୟାରିୟର ଆରମ୍ଭ କରିବାରୁ ଅଧାରୁ ପାଠପଢ଼ା ଛାଡ଼ି ଦେଇଥିଲେ। ୧୯୯୩ରେ ପେପ୍ସୀ ଆଡ୍ରୁ ତାଙ୍କୁ ସ୍ବତନ୍ତ୍ର ପରିଚୟ ମିଳିଥିଲା। ୧୯୯୪ରେ ମିସ୍ ଓ୍ବାଲର୍ଡ ହୋଇଥିଲେ।
ଐଶ୍ୱର୍ଯ୍ୟା ବିଶ୍ୱସୁନ୍ଦରୀ ସତ ମାତ୍ର ଫିଲ୍ମକୁ ଆସିବା ପାଇଁ ତାଙ୍କୁ ବହୁତ ସଂଘର୍ଷ କରିବାକୁ ପଡ଼ିଥିଲା। ତାଙ୍କୁ ସିଧା ବଲିଉଡ୍ରେ ଏଣ୍ଟ୍ରି ମିଳି ନ ଥିଲା। ୧୯୯୭ରେ ସେ ତାଙ୍କ ଫିଲ୍ମ କ୍ୟାରିୟର ଆରମ୍ଭ କରିଥିଲେ। ଏକ ସାଉଥ୍ ଫିଲ୍ମ ‘ଇରୁବର’ରୁ ସେ ତାଙ୍କର ଯାତ୍ରା ଆରମ୍ଭ କରିଥିଲେ। ଏହି ଫିଲ୍ମର ନିର୍ଦ୍ଦେଶନା ଦେଇଥିଲେ ମଣିରତ୍ନମ। ଏହିବର୍ଷ ହିଁ ସେ ବଲିଉଡ୍ ଫିଲ୍ମ ‘ପ୍ୟାର୍ ହୋ ଗୟା’ରେ ଡେବ୍ୟୁ କରିଥିଲେ।