ଜେଲରେ ବାହୁସ୍ଫୋଟ ମାରି ଧରାପଡ଼ିଲେ ମୁଖ୍ୟ ଅଭିଯୁକ୍ତ: ଲୁଟ୍ ଗହଣାରେ ବାନ୍ଧବୀଙ୍କୁ ଖୁସି କରୁଥିଲେ
06 ଭୁବନେଶ୍ୱର,୧୦।୧(ବ୍ୟୁରୋ): ଲକ୍ଡାଉନ୍ ସମୟରେ ଭୁବନେଶ୍ୱର ନୟାପଲ୍ଲୀ ଅଞ୍ଚଳରେ ଲୁଟ୍ ପାଇଁ ତୁଳସୀ ଦେଈ ନାମକ ଜଣେ ବୃଦ୍ଧାଙ୍କୁ ହତ୍ୟା କରାଯାଇଥିଲା। ୫ ମାସ ପରେ ଏହି ହୃଦୟବିଦାରକ ଘଟଣାର ମୁଖ୍ୟ ଅଭିଯୁକ୍ତ ଧରାପଡିଛନ୍ତି। ସେ ଅନ୍ୟ ଏକ ଲୁଟ୍ ଘଟଣାରେ ଜେଲରେ ଥିବାବେଳେ କଏଦୀଙ୍କୁ ଉକ୍ତ ଲୁଟ୍ ଓ ହତ୍ୟା କିପରି ଘଟାଇଥିଲେ କହି ଫସି ଯାଇଛନ୍ତି। ସେ ହେଲେ ଖଣ୍ଡଗିରି ଅଞ୍ଚଳରେ ରହୁଥିବା ଗଞ୍ଜାମ ଜିଲା ପୋଲସରା ଅଞ୍ଚଳର ନାରାୟଣ ମହାନ୍ତି। ଏକଥା କମିଶନରେଟ ପୋଲିସର କାନକୁ ଆସିବା ପରେ ଘଟଣାର ଅଧିକ ଖୋଳତାଡ଼ ଆରମ୍ଭ ହୋଇଛି। ଶନିବାର ଏହି ଘଟଣାରେ ସମ୍ପୃକ୍ତ ସହଯୋଗୀ ସାଗର ପ୍ରଧାନ ଓରଫ ବାବୁଙ୍କୁ ସ୍ପେଶାଲ ସ୍କ୍ବାଡ୍ ଓ ନୟାପଲ୍ଲୀ ଥାନା ପୋଲିସ ଗିରଫ କରିଛି। ତାଙ୍କୁ ପଚରାଉଚରା ପରେ ମୁଖ୍ୟ ଅଭିଯୁକ୍ତ ନାରାୟଣଙ୍କ ଅପରାଧ ସମ୍ପର୍କରେ ବହୁ ଚାଞ୍ଚଲ୍ୟକର ତଥ୍ୟ ପାଇଛି। ତାଙ୍କ ନାମରେ ଭୁବନେଶ୍ୱରର ବିଭିନ୍ନ ଥାନାରେ ୨୫ରୁ ଅଧିକ ମାମଲା ରହିଥିବା ନେଇ ପୋଲିସ ସୂଚନା ଦେଇଛି। ଉଭୟ ମିଳିତ ଭାବେ ସୁନା ଅଳଙ୍କାର ଲୁଟ୍ କରୁଥିଲେ ଓ ଏମାନଙ୍କର ଅନ୍ୟ କେଉଁ କେଉଁ ଘଟଣାରେ ସମ୍ପୃକ୍ତି ରହିଛି ତାହା ଜାଣିବାକୁ ନାରାୟଣଙ୍କୁ ଶନିବାରଠାରୁ ୨ଦିନିଆ ରିମାଣ୍ଡରେ ଆଣି ମାରାଥନ ଜେରା କରୁଛି ପୋଲିସ। ନାରାୟଣଙ୍କ ଆପରାଧିକ ସାମ୍ରାଜ୍ୟରେ ତାଙ୍କ ବାନ୍ଧବୀଙ୍କ ସମ୍ପୃକ୍ତି ଥିବା ଜାଣିବା ପରେ ପୋଲିସ ତାଙ୍କୁ ଟାର୍ଗେଟ କରିଥିବା ସୂଚନା ମିଳିଛି।
ଗତବର୍ଷ ଜୁଲାଇ ୨୬ ସକାଳ ପ୍ରାୟ ୯ଟାରେ ଅଭିଯୁକ୍ତମାନେ ନୟାପଲ୍ଲୀସ୍ଥିତ ଏନ୍-୪ /୨୬୩ରେ ରହୁଥିବା ତୁଳସୀ (୭୦)ଙ୍କ ଘରେ ପଶି ଲୁଟ୍ କରିବା ସହ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ। ଅଭିଯୁକ୍ତମାନେ ଏକ କଟୁରିରେ ତୁଳସୀଙ୍କ ମୁଣ୍ଡକୁ ବାରମ୍ବାର ହାଣିବା ସହ କାନ କାଟି ପିନ୍ଧିଥିବା ୧୦ ଭରିର ସୁନାଚେନ ଓ କାନଫୁଲ ଲୁଟିଥିଲେ। ଗୁରୁତର ଆହତ ତୁଳସୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଡାକ୍ତରଖାନାରେ ୫ଦିନ ଧରି ମୃତ୍ୟୁ ସହ ସଂଘର୍ଷ କରି ଶେଷରେ ଆଖି ବୁଜିଥିଲେ। ଏହି ଘଟଣା ସେତେବେଳେ ଚାଞ୍ଚଲ୍ୟ ସୃଷ୍ଟି କରିଥିବାବେଳେ ବରିଷ୍ଠ ନାଗରିକଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା। ଘଟଣା ପରେ ମଧ୍ୟ ଅଭିଯୁକ୍ତମାନେ ସହରରେ ବୁଲି ଲୁଟ୍ପାଟ୍ କରୁଥିଲେ। ଅଗଷ୍ଟ ୮ରେ ଖଣ୍ଡଗିରି ଥାନା ଅଞ୍ଚଳରେ ଏକ ଛିନ୍ତାଇ ଘଟଣାରେ ଅଭିଯୁକ୍ତ ନାରାୟଣଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଥିଲେ ମଧ୍ୟ ଉକ୍ତ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତପୋଲିସ ପୋଲିସ ଜାଣିପାରି ନ ଥିଲା।
ନାରାୟଣ ଓ ସହଯୋଗୀ ସାଗର ମିଳିମିଶି ସହର ସାରା ଲୁଟ୍ପାଟ କରିବା ସହ ଆତଙ୍କ ଖେଳାଉଥିଲେ। ଏକାକୀ ଯାଉଥିବା ବା ରହୁଥିବା ମହିଳାଙ୍କୁ ଏମାନେ ଟାର୍ଗେଟ୍ କରୁଥିଲେ। ପ୍ରଥମେ ଧମକାଇ ସୁନା ଗହଣା ଦେବାକୁ କହୁଥିଲେ। ନ ମିଳିଲେ ହତ୍ୟା କରିବାକୁ ପଛାଉ ନ ଥିଲେ। ଉଭୟ ଲୁଟ୍ ସୁନା ଗହଣା ଓ ଟଙ୍କାରେ ମଉଜମସ୍ତି କରୁଥିଲେ। କଏଦୀଙ୍କ ଆଗରେ ଗର୍ବରେ ଏସବୁ କହି ବାହୁସ୍ଫୋଟ ମାରୁଥିଲେ। ଏମିତିକି ତାଙ୍କ ପ୍ରେମିକାଙ୍କର ମଧ୍ୟ ଏସବୁ କଳା କାରନାମାରେ ସମ୍ପୃକ୍ତି ଥିବା ସେ କହିଥିଲେ। କିଛି ଘଟଣାରେ ଉଭୟ ପ୍ରେମୀଯୁଗଳ ଲୋକଙ୍କୁ ଲୁଟ୍ ମଧ୍ୟ କରିଥିଲେ। ଏପଟେ ସହଯୋଗୀ ସାଗରଙ୍କୁ ଉଠାଇ ଆଣି ପଚରାଉଚରା କରିବା ପରେ ଆଉକିଛି କଥା ଜଣାପଡିଥିଲା। ଲୁଟ୍ ସୁନା ଉଭୟଙ୍କ ମଧ୍ୟରେ ଅଧା ଅଧା ହେଉଥିଲା। ତେବେ ସୁନା ଅଳଙ୍କାର ନିଜ ବାନ୍ଧବୀଙ୍କୁ ଦେଇ ଖୁସି କରୁଥିଲେ ନାରାୟଣ। ନୟାପଲ୍ଲୀରେ ବୃଦ୍ଧାଙ୍କୁ କଟୁରୀରେ ହାଣି ସୁନା ଗହଣା ଲୁଟ୍ ପରେ ତାହାକୁ ମଧ୍ୟ ନିଜ ବାନ୍ଧବୀଙ୍କୁ ଦେଇଥିଲେ ନାରାୟଣ।