ଦାରିଙ୍ଗବାଡି, ୧୧।୧୧ (ଅରୁଣ ସାହୁ): କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଗରିବ ଲୋକଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ଯୋଗାଇଦେଉଛନ୍ତି। ଏଥିପାଇଁ କାର୍ଯ୍ୟାଦେଶ ସହ ଅଗ୍ରିମ ଅନୁଦାନ ମଧ୍ୟ ପ୍ରଦାନ କରୁଛନ୍ତି। ହେଲେ ଏହା ଅନେକ ସମୟରେ ବାଟମଣା ହେଉଥିବା ଆଉ କଛପ ଗତିରେ ଯୋଜନା କାର୍ଯ୍ୟ ହେଉଥିବା ଅଭିଯୋଗ ହେଉଛି। କନ୍ଧମାଳ ଜିଲାପାଳଙ୍କ ଅଭିଯୋଗ ଶୁଣାଣିବେଳେ ମାଳମାଳ ଏଭଳି ଅଭିଯୋଗ ହୋଇଥିଲା।
ସରକାର ବିଧବା, ଦିବ୍ୟାଙ୍ଗ ଅତି ଗରିବ ରେଖାତଳେ ରହିଥିବା ଲୋକଙ୍କୁ ଚି଼ହ୍ନଟ କରି ଅନ୍ତୋଦୟ ଗୃହ ଯୋଜନାରେ ଗୃହ ନିର୍ମାଣ କରିବାକୁ କାର୍ଯ୍ୟାଦେଶ ଦେଇଛନ୍ତି। କିନ୍ତୁ ଅନୁଦାନ ପହଞ୍ଚି ନ ଥିବାରୁ ଗୃହ କାର୍ଯ୍ୟ ଆରମ୍ଭ ହୋଇପାରି ନ ଥିବା ପ୍ଳିହେରୀ ପଞ୍ଚାୟତର ଦିବ୍ୟାଙ୍ଗ ସଲମାନ ପ୍ରଧାନ ଅଭିଯୋଗ କରିଛନ୍ତି। ସେ ୮୦ପ୍ରତିଶତ ଦିବ୍ୟାଙ୍ଗ ରହିଛନ୍ତି। ବାରମ୍ବାର ବ୍ଲକ କାର୍ଯ୍ୟାଳୟକୁ ଆସିବା ସମ୍ଭବ ନ ଥିବାରୁ ଜିଲାପାଳଙ୍କ ଅଭିଯୋଗ ପ୍ରକୋଷ୍ଠକୁ ପ୍ଳିହେରୀ ପଞ୍ଚାୟତର ସରପଞ୍ଚ ପାଉଲ ପ୍ରଧାନ ତାଙ୍କୁ ବ୍ଲକ କାର୍ଯ୍ୟାଳୟକୁ ଆଣିବାକୁ ସହାୟତା କରିଥିଲେ।
ଟ୍ରାଇ ସାଇକଲରେ ବସି ସେ ବ୍ଲକ କାର୍ଯ୍ୟାଳୟ ପହଞ୍ଚିଥିଲେ। କେବଳ ଉକ୍ତ ପଞ୍ଚାୟତର ସଲମାନ ନୁହଁନ୍ତି ସେହି ପଞ୍ଚାୟତର ଝୁନୁ ନାୟକ, ନବଜିନି ପ୍ରଧାନ, ପ୍ରିୟଙ୍କା ମଲିକ, ଏବଂ କିସ୍ତିନା ନାୟକ ପ୍ରମୁଖଙ୍କୁ ଜୁନ ମାସରୁ ଏହି ଯୋଜନାରେ କାର୍ଯ୍ୟାଦେଶ ମିଳିଥିଲେ ମଧ୍ୟ ଅନୁଦାନ ଆସି ନ ଥିବା ନେଇ ଜିଲାପାଳଙ୍କ ନିକଟରେ ଅଭିଯୋଗ ହୋଇଛି । ଏନେଇ ବ୍ଲକ କାର୍ଯ୍ୟାଳୟର ବିପିସି ଜଗନ୍ନାଥ ରଥଙ୍କ ସହ ଯୋଗାଯୋଗ କରାଯିବାରୁ ସେ କହିଛନ୍ତି, କିଛି ହିତାଧିକାରୀଙ୍କ ବ୍ୟାଙ୍କରେ କେୱାସି ନାହିଁ ଆଉ କିଛି ହିତାଧିକାରୀଙ୍କ ଜମି ବିବାଦ ଆଉ କିଛି ହିତାଧିକାରୀଙ୍କ ଆଧାର ସହ ମୋବାଇଲ ନମ୍ବର ଲିଙ୍କ ଭଳି ସମସ୍ୟା ଯୋଗୁ ତାଙ୍କ ଆକାଉଣ୍ଟକୁ ଅଗ୍ରିମ ଅନୁଦାନ ଯାଇପାରୁ ନ ଥିବା ସେ କହିଛନ୍ତି।