ନୂଆଦିଲ୍ଲୀ: କୋଭିଡ୍-୧୯ ଦ୍ୱିତୀୟ ଲହର ଯୋଗୁ ବଜାର ବର୍ତ୍ତମାନ ପ୍ରଭାବିତ ହୋଇରହିଛି। ଏହି ପ୍ରଭାବକୁ କମାଇବା ଲାଗି ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ମିଳିତ ହୋଇ କାମ କରିବେ। ବ୍ୟାଙ୍କଗୁଡିକ ବିଭିନ୍ନ ଋଣ ପ୍ରଡକ୍ଟ ଏବଂ ଅନ୍ୟ ସହାୟତା ପଦକ୍ଷେପ ଯୋଗାଇ ଦେବେ ବୋଲି ଏକ ଭର୍ଚୁଆଲ ବୈଠକରେ ଏସ୍ବିଆଇ ଅଧ୍ୟକ୍ଷ ଦୀନେଶ ଖାରା, ଆଇବିଏ ଅଧ୍ୟକ୍ଷ ରାଜ କିରନ ରାୟ ଏବଂ ଆଇବିଏ ମୁଖ୍ୟ କାର୍ଯ୍ୟନିର୍ବାହୀ ସୁନୀଲ ମେହେଟ୍ଟା ସୂଚନା ଦେଇଛନ୍ତି।
ସରକାର ବର୍ତ୍ତମାନ ଏମର୍ଜେନ୍ସି କ୍ରେଡିଟ୍ ଲାଇନ ଗ୍ୟାରେଣ୍ଟି ସ୍କିମ(ଇସିଏଲ୍ଜିଏସ୍) ସୀମାକୁ ବଢ଼ାଇଛନ୍ତି। ଏଥିରେ ହସ୍ପିଟାଲ, ନର୍ସିଂ ହୋମ ଏବଂ କ୍ଲିନିକଗୁଡିକ ଅନସାଇଟ ଅକ୍ସିଜେନ ଜେନେରେଶନ ପ୍ଲାଣ୍ଟ ସ୍ଥାପନ କ୍ଷେତ୍ରରେ ୨ କୋଟି ଟଙ୍କା ପର୍ଯ୍ୟନ୍ତ ଋଣ ଉପରେ ଏନ୍ସିଜିଟିସି ପକ୍ଷରୁ ୧୦୦% ଗ୍ୟାରେଣ୍ଟି କଭର ଲାଭ କରିବେ। ଇସିଏଲ୍ଜିସି ସୀମାକୁ ସେପ୍ଟେମ୍ବର ଯାଏ ବଢାଯାଇଛି। ଏହି କ୍ଷେତ୍ରରେ ଋଣ ଯୋଗାଣକୁ ଚଳିତ ବର୍ଷ ଶେଷ ଯାଏ ଅନୁମତି ଦିଆଯାଇଛି। ବ୍ୟାଙ୍କଗୁଡିକ ବର୍ଦ୍ଧିତ ଇସିଏଲ୍ଜିଏସ୍ ପଦକ୍ଷେପକୁ କାର୍ଯ୍ୟକାରୀ କରାଇବେ। ସ୍ବାସ୍ଥ୍ୟ ଭିତ୍ତିଭୂମିରେ କାମ କରୁଥିବା ବାଣିଜ୍ୟ ସଂସ୍ଥାଗୁଡିକୁ ଋଣ ଯୋଗାଣ ତ୍ୱରାନ୍ବିତ କରାଯିବ। ସେହିଭଳି କୋଭିଡ୍ ଚିକିତ୍ସା ଖର୍ଚ୍ଚ କ୍ଷେତ୍ରରେ ଋଣ ସହାୟତା ଦେବା ଉପରେ ବ୍ୟାଙ୍କ କାର୍ଯ୍ୟ କରିବେ। ଆର୍ବିଆଇର ଋଣ ସମାଧାନ ପଦକ୍ଷେପ ୨.୦କୁ ନିରନ୍ତର ଲାଗୁ କରିବା ଲାଗି ବ୍ୟାଙ୍କ କାର୍ଯ୍ୟ କରିବେ। ଏଥିରେ ୨୫ କୋଟି ଟଙ୍କା ପର୍ଯ୍ୟନ୍ତ ଋଣ ରିଷ୍ଟକ୍ରଚର ବା ପୁନର୍ଗଠନ ପ୍ରକ୍ରିୟା ଆରମ୍ଭ କରାଯାଇଥିବା ସୂଚନା ମିଳିଛି।
ଆର୍ବିଆଇ ନିୟମ ଅନୁସାରେ ବ୍ୟାଙ୍କ କୋଭିଡ୍ ଲୋନ ବୁକ୍ ପ୍ରସ୍ତୁତ କରିବେ। ଭାକ୍ସିନ ମାନୁଫାକ୍ଚର, ହସ୍ପିଟାଲ, ଡିସପେନ୍ସାରି, ପାଥୋଲାବ୍, ମାନୁଫାକଚର, ଅକ୍ସିଜେନ ଯୋଗାଣକାରୀଙ୍କ ଭଳି କୋଭିଡ୍ ସ୍ବାସ୍ଥ୍ୟ ଭିତ୍ତିଭୂମିରେ କାମ କରୁଥିବା ସଂସ୍ଥାଗୁଡିକୁ ଋଣ ସହାୟତା ଯୋଗାଣ କରାଯିବ। ନୂଆ ହେଲ୍ଥ ଫାସିଲିଟି ସ୍ଥାପନ, ସମ୍ପ୍ରସାରଣ ଏବଂ ହେଲ୍ଥକେୟାର ପ୍ରଡକ୍ଟ ମାନୁଫାକ୍ଚରିଂ ଲାଗି ୧୦୦ କୋଟି ଟଙ୍କା ପର୍ଯ୍ୟନ୍ତ ଋଣ, କୋଭିଡ୍ ଚିକିତ୍ସା ଲାଗି ବିଭିନ୍ନ ବର୍ଗରେ ୨୫ହଜାର ଟଙ୍କାରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ମିଳିବ। ରିହାତି ସୁଧହାରରେ ଏହି ସବୁ ଋଣ ବ୍ୟାଙ୍କ ପ୍ରଦାନ କରିବେ।