ବାଲିଗୁଡ଼ା,୨୧ା୨(ସଞ୍ଜୟ କୁମାର ପାଣିଗ୍ରାହୀ): ଓଡ଼ିଶାର ସର୍ବ ବୃହତ୍ତମ ଉପଖଣ୍ଡ ରୂପେ ପରିଗଣିତ ହେଉଥିବା କନ୍ଧମାଳ ଜିଲାର ବଡ଼ ବ୍ୟବସାୟିକ ପେଣ୍ଠସ୍ଥଳ ବାଲିଗୁଡ଼ା ସହର ଏବେ ଟ୍ରାଫିକ୍ ସମସ୍ୟା ସହ ଅପରାଧୀଙ୍କ ପେଣ୍ଠସ୍ଥଳୀ ପାଲଟିବାକୁ ଯାଉଛି। ଯାହା ସାଧାରଣ ଜନତାଙ୍କଠାରୁ ଆରମ୍ଭ କରି ପ୍ରଶାସନର ମୁଣ୍ଡ ବ୍ୟଥାର କାରଣ ପାଲଟିଛି। ଏ ସବୁକୁ ଆଖି ଆଗରେ ରଖି ବାଲିଗୁଡ଼ା ଉପଜିଲ୍ଲାପାଳ ଡଃ.ରୀନା ପ୍ରଧାନଙ୍କ ଏକ ଅଧ୍ୟକ୍ଷତାରେ ଏକ ଜରୁରୀ ବୈଠକ ଉପଜିଲାପାଳଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଥିଲା l ଏଥିରେ ଉପଖଣ୍ଡ ଆରକ୍ଷୀ ଅଧୀକ୍ଷକ ରାମେନ୍ଦ୍ର ପ୍ରସାଦ ଉପସ୍ଥିତ ଥିବା ବେଳେ ପ୍ରକଳ୍ପ ପ୍ରଶାସକ ଗଦାଧର ପାତ୍ର ସଭା ପରିଚାଳନା କରିଥିଲେ। ସମ୍ପ୍ରତି ବାଲିଗୁଡ଼ା ସହରରେ ଦିନକୁ ଦିନ ଜନ ସଂଖ୍ୟା ଓ ଯାନବାହନ ବୃଦ୍ଧି ପାଇବା ସହ ଟ୍ରାଫିକ ସମସ୍ୟା, ଚୋରି ଡକାୟତି, ରାହାଜାନି, ଛୋଟ ବଡ଼ ଦୁର୍ଘଟଣା,ଦ୍ରୁତ ଗତିରେ ବାଇକ୍ ଚଳାଇବା ଓ ସହର ମଧ୍ୟରେ ଉଠା ଦୋକାନୀଙ୍କ ସମସ୍ୟା ଉତ୍କଟ ରୂପ ନେଉଛି, ପୋଲିସ ପାଟ୍ରୋଲିଂ, ସହର ମଧ୍ୟରେ ଲାଗିଥିବା ସିସିଟିଭିକୁ ସଚଳ କରିବା ଉପରେ ଆଲୋଚନା ହୋଇଥିଲା। ଉପଜିଲାପାଳ ଡଃ.ରୀନା ପ୍ରଧାନ କହିଛନ୍ତି ଯେ, ସହରକୁ ସୌନ୍ଦର୍ଯ୍ୟକରଣ କରିବାକୁ ବିଭିନ୍ନ ପଦକ୍ଷେପ ନିଆଯାଇଛି। ସହର ମଧ୍ୟରେ ରହିଥିବା ପୋଖରୀ ନିକଟରେ ଫୁଡ କୋର୍ଟ ନିର୍ମାଣ ,ବିଭିନ୍ନ ସ୍ଥାନରେ ଅତ୍ୟାଧୁନିକ ମାର୍କେଟ କମ୍ପ୍ଲେକ୍ସ କରିବା ପାଇଁ ଜାଗା ଚିହ୍ନଟ ସରିଛି, ଫୁଡ କୋର୍ଟ ସାଙ୍ଗକୁ ପରିବା ବଜାର, ମାଛ ମାଂସ ବଜାର ନେଇ ସରକାରଙ୍କୁ ଏକ ପ୍ରସ୍ତାବ ଦିଆଯାଇଛି ତାହା ଅନୁମତି ହୋଇଗଲେ ସହର ମଧ୍ୟରେ ରହିଥିବା ଉଠା ଦୋକାନୀ ସମେତ ଟ୍ରାଫିକ ସମସ୍ୟା ଦୂର ହୋଇଯିବ, ଅଟୋ ଷ୍ଟାଣ୍ଡ ଉପରେ ମଧ୍ୟ ଗୁରୁତ୍ୱ ଦିଆଯାଇଥିଲା ଓ ସୁରକ୍ଷା ସମ୍ପର୍କିତ ଅଭିଯୋଗ ଉପରେ ବାଲିଗୁଡା ଉପଖଣ୍ଡ ଆରକ୍ଷୀ ଅଧିକ୍ଷକ ରମେନ୍ଦ୍ର ପ୍ରସାଦ କହିଛନ୍ତି ସହର ମଧ୍ୟରେ ସିସିଟିଭିକୁ ସଚଳ କରିବା ସହ ସହର ମଧ୍ୟରେ ପେଟ୍ରୋଲିଂ ଓ ରାତ୍ରିକାଳୀନ ପାଟ୍ରୋଲିଂକୁ କଡ଼ାକଡ଼ି କରାଯିବ, ଦୁର୍ଘଟଣା ରୋକିବା ପାଇଁ ସହରର ବିଭିନ୍ନ ସ୍ଥାନରେ ସ୍ପିଡ ବ୍ରେକର ଲଗାଯିବ, ରାତିରେ କୌଣସି ଲୋକ ସନ୍ଦେହଜନକ ଭାବେ ବୁଲିଥିଲେ ତାକୁ ଅଟକ ରଖି ପଚରା ଉଚରା କରାଯିବ l ଏଣୁ ସେପରି ଜରୁରୀ କାମ ନ ଥିଲେ ରାତିରେ କୌଣସି ଲୋକ ନ ବୁଲିବାକୁ କୁହାଯାଇଛି ଓ ବଣିକ ସଂଘକୁ ଅନୁରୋଧ କରାଯାଇ ପ୍ରତ୍ୟେକ ଦୋକାନ ସମ୍ମୁଖରେ ସିସିଟିଭି ଲଗାଯିବା ପାଇଁ କୁହାଯିବ ବୋଲି କହିଛନ୍ତି। ବାଲିଗୁଡ଼ାକୁ ସରସ ସୁନ୍ଦର ଓ ଭୟ ମୁକ୍ତ ସହର କରିବା ଆମ ସମସ୍ତଙ୍କ ସହଯୋଗ ରହିବା ଦରକାର ବୋଲି ମତାପ୍ରକାଶ ପାଇଥିଲା। ଏହି ବୈଠକରେ ବିଭିନ୍ନ ବିଭାଗର ପ୍ରଶାସନିକ ଅଧିକାରୀ,ବିଭିନ୍ନ ବ୍ୟାଙ୍କ ଅଧିକାରୀ, ବଣିକ ସଂଘ, ଅଟୋ ସଂଘ, କ୍ଷୁଦ୍ର ବଣିକ ସଂଘ, ଟ୍ରାକ୍ଟର ସଂଘ, ବୁଦ୍ଧିଜୀବୀ ପ୍ରମୁଖ ଉପସ୍ଥିତ ରହି ନିଜ ନିଜର ସୁଚିନ୍ତିତ ମତାମତ ପ୍ରଦାନ କରିଥିଲେ।