ଗଞ୍ଜାମ,୨୦ା୩(ବିଦ୍ୟାଧର ସାହୁ): ଗଞ୍ଜାମ ସହରସ୍ଥିତ ବ୍ରାହ୍ମଣ ଢମଣା ସାହିରେ ପୂୂଜା ପାଉଥିବା ଶ୍ରୀମଦନ ମୋହନଙ୍କ ବଡ଼ବଜାରଠାରେ ଥିବା ଜାଗାକୁ ଦୀର୍ଘବର୍ଷ ହେଲା ଏକ ପରିବାର ଜବରଦଖଲ କରି ରଖିଥିଲେ। ଏ ନେଇ ଅଭିଯୋଗ ପରେ କୋର୍ଟରେ ମାମଲା ଚାଲିଥିଲା। କୋର୍ଟଙ୍କ ନିର୍ଦ୍ଦେଶ ପରେ ଶୁକ୍ରବାର ମାଜିଷ୍ଟ୍ରେଟ ତଥା ତହସିଲଦାର ସୁକାନ୍ତ ଚନ୍ଦ୍ର ମିଶ୍ରଙ୍କ ଉପସ୍ଥିତିରେ ଆରଆଇ ସୀତାରାମ ସାହୁ ମାପଚୂପ କରବା ପରେ ଠାକୁରଙ୍କ ଜାଗା ଚି଼ହ୍ନଟ ହୋଇଛି। ଉକ୍ତ ସ୍ଥାନରେ ଜବରଦଖଲ କରାଯାଇ ହୋଇଥିବା ୨ଟି ଦୋକାନ ଗୃହରେ ଛତ୍ରପୁର କୋର୍ଟ କର୍ମଚାରୀ ତାଲା ପକାଇ ସାହି କମିଟି ସଭାପତି ପ୍ରଭାକର ପାଣିଗ୍ରାହୀଙ୍କୁ ଚାବି ହସ୍ତାନ୍ତର କରିଛନ୍ତି । ଏଥିସହ ସଂମ୍ପୃକ୍ତ ପରିବାର ରହୁଥିବା ଘରକୁ ମଧ୍ୟ ସିଲ କରାଯାଇଛି। ଶନିବାର ପୂର୍ବାହ୍ନ ୧୦ଟା ସୁଦ୍ଧା ଘର ଖାଲି କରିବାକୁ କୁହାଯାଇଥିବା ତହସିଲଦାର ମିଶ୍ର ଗଣମାଧ୍ୟମକୁ ସୂଚନା ଦେଇଛନ୍ତି। ମାପଚୁପ ବେଳେ ଆଇନ ଶୃଙ୍ଖଳାକୁ ଦୃଷ୍ଟିରେ ରଖି ଥାନା ଆଇଆଇସି ସୁମିତ୍ରା ପାତ୍ର, ଏସଆଇ ଅନିରୁଦ୍ଧ ସ୍ବାଇଁ, ଏଏସଆଇ ସୁଦୀପ୍ତ ସାହୁଙ୍କ ସମେତ ପୋଲିସ ଫୋର୍ସ ମୁୂତୟନ ଥିଲେ। ଜବର ଦଖଲକାରୀ ଗୋପାଳ ମହାରଣା ଅନୁପସ୍ଥିତ ଥିଲେ ବୋଲି ଆଇଆଇସି କହିଛନ୍ତି।
ବ୍ରାହ୍ମଣ ଢମଣା ସାହି କମିଟି ସଭାପତି ପାଣିଗ୍ରାହୀଙ୍କ ସୂଚନାନୁଯାୟୀ, ୨୦୦୦ ମସିହାରୁ ସଂମ୍ପୃକ୍ତ ବ୍ୟକ୍ତିଙ୍କୁ ଠାକୁରଙ୍କ ଜାଗା ଖାଲି କରିବାକୁ ସାହି ପକ୍ଷରୁ ବାରମ୍ବାର କୁହାଯାଇଥିଲେ ମଧ୍ୟ ସେ କର୍ଣ୍ଣପାତ କରୁନଥିଲେ। ତେଣୁ ଆଇନର ଆଶ୍ରୟ ନିଆଯାଇଥିଲା। ଜବରଦଖଲକାରୀ ଗୋପାଳ ମଧ୍ୟ ହାଇକୋର୍ଟରେ କେସ ଫାଇଲ କରିଥିଲେ। ୨୦୨୨ରେ କୋର୍ଟ ତାହା ନାକଚ କରିଦେଇଥିଲେ। ଗୋପାଳ କୋର୍ଟଙ୍କୁ ଏକ ମାସ ମହଲତ ମାଗିଥିଲେ। ସାହିବାସିନ୍ଦା ୨୦୨୪ରେ ପୁଣି କୋର୍ଟର ଆଶ୍ରୟ ନେଇଥିଲେ। ବର୍ତ୍ତମାନ ରାୟ ଆସିଥିବାରୁ ସାହି ବାସିନ୍ଦା ଖୁସି ବ୍ୟକ୍ତ କରିଛନ୍ତି। ସୂଚନାଯୋଗ୍ୟ, ବଡ଼ବଜାରରେ ଠାକୁର ମଦନ ମୋହନଙ୍କ ୫୦/୬୦ ହାତ ଜାଗା ଅଛି।