ଅହମଦାବାଦ, ୧୩।୬: ଗୁଜୁରାଟର ଅହମଦାବାଦରେ ଏକ ଭୟାବହ ବିମାନ ଦୁର୍ଘଟଣାରେ ଅତି କମରେ ୨୬୫ ଜଣଙ୍କର ମୃତ୍ୟୁ ହୋଇଛି। ଏୟାର ଇଣ୍ଡିଆର ବୋଇଙ୍ଗ ୭୮୭-୮ ଡ୍ରିମଲାଇନର (ଫ୍ଲାଇଟ ନମ୍ବର AI-171), ଯାହା ଅହମଦାବାଦରୁ ଲଣ୍ଡନ ଯାତ୍ରା କରୁଥିଲା, ସରଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଭରିବାର କିଛି ମିନିଟ ପରେ ମେଘାନୀନଗର ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ବିମାନରେ ୨୩୦ ଜଣ ଯାତ୍ରୀ ଏବଂ ୧୨ ଜଣ କ୍ରୁ ସଦସ୍ୟ ଥିଲେ। ଦୁର୍ଘଟଣାରେ କେବଳ ଜଣେ ଯାତ୍ରୀ, ବିଶ୍ୱାସ କୁମାର ରମେଶ, ଅଳ୍ପକେ ବଞ୍ଚିଛନ୍ତି।
ଗୁରୁବାର ଅପରାହ୍ନ ପ୍ରାୟ ୧:୩୦ରେ ବିମାନଟି ଉଡ଼ାଣ ଭରିବା ପରେ କିଛି ସମୟରେ ମେଘାନୀନଗରର ଏକ ଆବାସିକ ଅଞ୍ଚଳରେ ଥିବା ବି.ଜେ. ମେଡିକାଲ କଲେଜର ହଷ୍ଟେଲ ମେସ ଉପରେ ପଡ଼ିଥିଲା। ଏହି ଦୁର୍ଘଟଣାରେ ବିମାନରେ ଥିବା ୨୪୧ ଜଣଙ୍କ ସହ ୫ ଜଣ ମେଡିକାଲ ଛାତ୍ରଙ୍କର ମୃତ୍ୟୁ ହୋଇଛି। ବିମାନରୁ ନିଆଁ ଲାଗି ଘନ କଳା ଧୂଆଁ ଉଠୁଥିବା ଦୃଶ୍ୟ ସୋସିଆଲ ମିଡିଆରେ ଭାଇରାଲ ହୋଇଛି।
ଏହି ସମୟରେ, ଗୁରୁବାର ସକାଳେ ଏକ ଖବରକାଗଜରେ ପ୍ରକାଶିତ ଏକ ବିଜ୍ଞାପନର ଏକ ଫଟୋ ସୋସିଆଲ ମିଡିଆରେ ଭାଇରାଲ ହେଉଛି। ବିଜ୍ଞାପନରେ ଏକ ଏୟାର ଇଣ୍ଡିଆ ବିମାନର ଗୋଟିଏ ଅଂଶ ଏକ କୋଠା ଭିତରେ ପଶିଯାଇଥିବାର ଦେଖାଯାଇଛି। ଆଶ୍ଚର୍ଯ୍ୟର କଥା, ସେହି ଦିନ, ଅହମ୍ମଦାବାଦରେ ପ୍ଲେନକ୍ରାଶ୍ ହୋଇ ମେଡିକାଲ କଲେଜ ହଷ୍ଟେଲ କୋଠା ଭିତରେ ପଶିଯାଇଥିଲା । ଏବେ ସୋସିଆଲ ମିଡିଆରେ କିଛି ଲୋକ ଏହି ବିଜ୍ଞାପନକୁ ଏକ ସଂଯୋଗ ବୋଲି ବିବେଚନା କରୁଛନ୍ତି ଯେତେବେଳେ କିଛି ଲୋକ ଏହାକୁ ଏୟାର ଇଣ୍ଡିଆ ଦୁର୍ଘଟଣାର ପୂର୍ବାନୁମାନ ବୋଲି କହୁଛନ୍ତି। ଯଦିଓ ଏହି ବିଜ୍ଞାପନଟି ଅହମଦାବାଦ ଦୁର୍ଘଟଣା ସହିତ ଜଡିତ ବୋଲି ନିଶ୍ଚିତ ହୋଇନାହିଁ, ତଥାପି ଏହାକୁ ଏକ ସଂଯୋଗ ବୋଲି ବିବେଚନା କରାଯାଉଛି।
କଂଗ୍ରେସ ନେତା ସୁରେନ୍ଦ୍ର ରାଜପୁତ ଟ୍ୱିଟରରେ ବିଜ୍ଞାପନର ଫଟୋ ସେୟାର କରି କ୍ୟାପସନରେ ଲେଖିଛନ୍ତି, ‘ସଂଯୋଗ, ଏ ହେଉଛି ଆଜି ପ୍ରକାଶିତ ମିଡ୍ ଡେ ଖବରକାଗଜର ପ୍ରଥମ ପୃଷ୍ଠା। ଖବରକାଗଜରେ, ଦୁର୍ଘଟଣାଗ୍ରସ୍ତ ହୋଇ ଏୟାର ଇଣ୍ଡିଆକୁ ଏକ କୋଠାରୁ ଝୁଲି ରହିଥିବା ଦେଖାଯାଉଛି। ପୂର୍ବାହ୍ନରେ ସମାନ ଘଟଣା ଘଟିଛି, ଏୟାର ଇଣ୍ଡିଆ ବିମାନ ଦୁର୍ଘଟଣାଗ୍ରସ୍ତ ହୋଇ ମେଡିକାଲ କଲେଜ କୋଠାରୁ ଝୁଲି ରହିଛି। ଏହା ଏକ ବଡ଼ ସଂଯୋଗ…..’
ଏହି ଫଟୋ ଦେଖି ଲୋକମାନେ ଆଶ୍ଚର୍ଯ୍ୟ ହେଉଛନ୍ତି ଓ ଏହା ବହୁତ ମାତ୍ରାରେ ସେୟାର ହେଉଛି। ଏହି ଅଜବ ସଂଯୋଗକୁ ନେଇ ସୋସିଆଲ ମିଡିଆରେ ବହୁତ ଆଲୋଚନା ହେଉଛି। ସକାଳେ ମିଡ୍ ଡେ ଖବରକାଗଜର ପ୍ରଥମ ପୃଷ୍ଠାରେ ଛପା ବିଜ୍ଞାପନରେ ଦେଖାଯାଇଥିବା ବିମାନଟି ଅହମ୍ମଦାବାଦ ଦୁର୍ଘଟଣାରେ ଦେଖାଯାଇଥିବା ବିମାନ ପରି ଥିଲା। ମିଡ୍ ଡେର ବିଜ୍ଞାପନର ଚିତ୍ର ଓ ଦୁର୍ଘଟଣା ମଧ୍ୟରେ ସାମଞ୍ଜସ୍ୟକୁ ନେଇ ସୋସିଆଲ ମିଡିଆରେ ହଇଚଇ ସୃଷ୍ଟି କରିଛି। ଲୋକମାନେ ଏହି ସଂଯୋଗ ବିଷୟରେ ଭିନ୍ନ ଭିନ୍ନ କଥା କହୁଛନ୍ତି, କେହି ଏହାକୁ ଏକ ସଂଯୋଗ ବୋଲି କହୁଛନ୍ତି ଓ କେହି ଏହାକୁ ଏକ ଷଡଯନ୍ତ୍ର ବୋଲି କହୁଛନ୍ତି।