କାବୁଲ/ବେଜିଂ,୨୩।୫: ଆଫଗାନିସ୍ତାନର ତାଲିବାନ ସରକାର ଚାଇନାକୁ ଆଶ୍ୱାସନା ଦେଇଛନ୍ତି ଯେ ସେମାନେ କୌଣସି ଶକ୍ତିକୁ ଆଫଗାନ ଭୂମି ବ୍ୟବହାର କରି ଚାଇନା ସ୍ବାର୍ଥ ବିରୋଧରେ କାର୍ଯ୍ୟ କରିବାକୁ ଅନୁମତି ଦେବେ ନାହିଁ। ଆଫଗାନିସ୍ତାନର ଅନ୍ତରୀଣ ବୈଦେଶିକ ମନ୍ତ୍ରୀ ଅମିର ଖାନ ମୁତ୍ତାକି ବେଜିଂରେ ଚୀନ୍ର ବୈଦେଶିକ ମନ୍ତ୍ରୀ ୱାଙ୍ଗ ଇଙ୍କ ସହ ଏକ ବୈଠକରେ ଏହି ପ୍ରତିଶ୍ରୁତି ଦେଇଛନ୍ତି। ମୁତ୍ତାକି କହିଛନ୍ତି ଯେ ଆଫଗାନିସ୍ତାନ ଚାଇନା ସୁରକ୍ଷା ଚିନ୍ତାକୁ ଗୁରୁତ୍ୱ ଦେଇଥାଏ ଏବଂ ଚାଇନାକୁ କ୍ଷତି ପହଞ୍ଚିବା ଭଳି ଆଫଗାନ କିଛି କରିବ ନାହିଁ।
ଏହି ଘୋଷଣା ଏପରି ସମୟରେ ଆସିଛି ଯେତେବେଳେ ଚୀନ, ପାକିସ୍ତାନ ଓ ଆଫଗାନିସ୍ତାନ ମଧ୍ୟରେ ତ୍ରିପାକ୍ଷିକ ବୈଠକରେ ଅର୍ଥନୈତିକ ଓ ସୁରକ୍ଷା ସହଯୋଗ ବୃଦ୍ଧି ନେଇ ଆଲୋଚନା ହୋଇଛି। ବୈଠକରେ ଚୀନର ବେଲ୍ଟ ଆଣ୍ଡ ରୋଡ ଇନିସିଏଟିଭ (ବିଆର୍ଆଇ) ଏବଂ ଚାଇନା-ପାକିସ୍ତାନ ଇକୋନୋମିକ କରିଡର (ସିପିଇସି)କୁ ଆଫଗାନିସ୍ତାନ ପର୍ଯ୍ୟନ୍ତ ବିସ୍ତାର କରିବା ନେଇ ସହମତି ହୋଇଛି।
ଚୀନ, ୨୦୨୧ରେ ତାଲିବାନ କାବୁଲ ଅଧିକାର କରିବା ପରେ ତାଲିବାନ ସରକାର ସହିତ କୂଟନୈତିକ ସମ୍ପର୍କ ଜାରି ରଖିଥିବା ପ୍ରଥମ ଦେଶମାନଙ୍କ ମଧ୍ୟରୁ ଅନ୍ୟତମ। ଆଫଗାନିସ୍ତାନର ୱାଖାନ କରିଡର ଚୀନର ସିଙ୍କିଆଙ୍ଗ ପ୍ରଦେଶ ସହିତ ସଂଯୋଗ କରୁଥିବାରୁ ଚୀନ ଏହି ଅଞ୍ଚଳରେ ସୁରକ୍ଷାକୁ ଗୁରୁତ୍ୱ ଦେଇଛି। ଚୀନ ସିଙ୍କିଆଙ୍ଗରେ ଇଷ୍ଟ ତୁର୍କିସ୍ତାନ ଇସ୍ଲାମିକ ମୁଭମେଣ୍ଟ (ଇଟିଆଇଏମ) ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି, ଯାହାର ଇସ୍ଲାମିକ ଷ୍ଟେଟ ଓ ଆଲ-କାଇଦା ସହିତ ସମ୍ପର୍କ ଥିବା ଅଭିଯୋଗ ରହିଛି।
ମୁତ୍ତାକି ଚୀନ ସହିତ ସୁରକ୍ଷା କ୍ଷେତ୍ରରେ ସହଯୋଗ ବୃଦ୍ଧି, ହିଂସାତ୍ମକ ଅପରାଧ ନିୟନ୍ତ୍ରଣ ଏବଂ ଆଞ୍ଚଳିକ ସ୍ଥିରତା ପାଇଁ ଚୀନର ସୱାର୍ଥ ସୁରକ୍ଷା କରିବାକୁ ପ୍ରତିଶ୍ରୁତି ଦେଇଛନ୍ତି। ଏହା ଚୀନର ଆଞ୍ଚଳିକ ପ୍ରଭାବ ବୃଦ୍ଧି ଓ ଆଫଗାନିସ୍ତାନ ସହିତ ଅର୍ଥନୈତିକ ଏବଂ କୂଟନୈତିକ ସମ୍ପର୍କ ଗଭୀର କରିବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି।
ଏହି ପ୍ରତିଶ୍ରୁତି ଦୁଇ ଦେଶ ମଧ୍ୟରେ କ୍ରମଶଃ ବୃଦ୍ଧି ପାଉଥିବା ସହଯୋଗକୁ ସୂଚାଇଥାଏ, ଯେଉଁଠାରେ ଚୀନ ଆଫଗାନିସ୍ତାନରେ ନିବେଶ ଓ ଅବସଂରଚନା ବିକାଶ ପାଇଁ ସକ୍ରିୟ ଭୂମିକା ଗ୍ରହଣ କରୁଛି। ତାଲିବାନର ଏହି ନିଷ୍ପତ୍ତି ଆଞ୍ଚଳିକ ସ୍ଥିରତା ଓ ଚୀନର ସହଯୋଗରେ ଆଫଗାନିସ୍ତାନର ଅର୍ଥନୈତିକ ପୁନରୁଦ୍ଧାରକୁ ଆହୁରି ଶକ୍ତିଶାଳୀ କରିପାରେ।