ମୁମ୍ବାଇ,୧୦।୨: ଚଳିତ ଆଇସିସି ପୁରୁଷ ଟି-୨୦ ବିଶ୍ୱକପ୍ରେ ଶ୍ରୀଲଙ୍କା ଏବଂ ନ୍ୟୁଜିଲାଣ୍ଡ ଦଳକୁ ବଡ଼ ଝଟ୍କା ଲାଗିଛି। ଆହତ ସମସ୍ୟା କାରଣରୁ ଶ୍ରୀଲଙ୍କାର ୱାନିନ୍ଦୁ ହସରଙ୍ଗା ଏବଂ ନ୍ୟୁଜିଲାଣ୍ଡର ମାଇକେଲ ବ୍ରେସୱେଲ୍ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରୁ ବାଦ୍ ପଡ଼ିଛନ୍ତି। ଅନ୍ୟପଟେ, ନାମିବିଆ ଏବଂ ପାକିସ୍ତାନ ବିପକ୍ଷ ମ୍ୟାଚ୍ ପୂର୍ବରୁ ଭାରତୀୟ ଓପନର ଅଭିଷେକ ଶର୍ମା ଅସୁସ୍ଥ ଥିବା ଖବର ସାମ୍ନାକୁ ଆସିଛି।
ଆୟରଲ୍ୟାଣ୍ଡ ବିପକ୍ଷ ମ୍ୟାଚ୍ରେ ହାମଷ୍ଟ୍ରିଙ୍ଗ୍ ଇଞ୍ଜୁରିର ଶିକାର ହୋଇଥିବା ହସରଙ୍ଗାଙ୍କ ସ୍ଥାନରେ ଦୁଷାନ ହେମନ୍ତଙ୍କୁ ଶ୍ରୀଲଙ୍କା ଦଳରେ ସାମିଲ କରାଯାଇଛି। ଗୋଡ଼ର ମାଂସପେଶୀରେ ଆଘାତ କାରଣରୁ ବ୍ରେସୱେଲ୍ ବାଦ୍ ପଡ଼ିଥିବା ବେଳେ ତାଙ୍କ ସ୍ଥାନରେ କୋଲ ମ୍ୟାକକୋଞ୍ଚିଙ୍କୁ ନ୍ୟୁଜିଲାଣ୍ଡ ଦଳରେ ସ୍ଥାନ ମିଳିଛି।
ସେହିପରି ପେଟରେ ସଂକ୍ରମଣ କାରଣରୁ ଅଭିଷେକ ଗୁରୁବାର ଅଭ୍ୟାସ ଅଧିବେଶନରେ ଯୋଗ ଦେଇପାରି ନାହାନ୍ତି। ନାମିବିଆ ବିପକ୍ଷ ମ୍ୟାଚ୍ ପୂର୍ବରୁ ସେ ସୁସ୍ଥ ହେବେ ବୋଲି ଆଶା କରାଯାଉଛି।
ତେବେ ଭାରତ ପାଇଁ ଆଶ୍ୱସ୍ତିର ଖବର ଯେ, ବୁମରା ସମ୍ପୂର୍ଣ୍ଣ ଫିଟ୍ ଜଣାପଡୁଛନ୍ତି। ନେଟ୍ସରେ ସେ ଅଧିନାୟକ ସୂର୍ଯ୍ୟକୁମାର ଯାଦବଙ୍କୁ ବୋଲିଂ କରି ନିଜର ପୁରୁଣା ଲୟ ପ୍ରଦର୍ଶନ କରିଛନ୍ତି। ଆହତ ସମସ୍ୟାରୁ ମୁକୁଳି ୱାଶିଂଟନ ମଧ୍ୟ ଦଳରେ ଯୋଗ ଦେଇଛନ୍ତି ଏବଂ ଧୀରେ ଧୀରେ ଅଭ୍ୟାସ ଆରମ୍ଭ କରୁଛନ୍ତି।
ସୂର୍ଯ୍ୟକୁମାର ଯାଦବ ଏବଂ ତିଲକ ବର୍ମା ଅଭ୍ୟାସ ସମୟରେ ବେଶ୍ ଆକ୍ରମଣାତ୍ମକ ବ୍ୟାଟିଂ କରୁଥିବା ଦେଖିବାକୁ ମିଳିଛି। ପାକିସ୍ତାନ ବିପକ୍ଷ ହାଇ-ଭୋଲଟେଜ୍ ମ୍ୟାଚ୍ ପୂର୍ବରୁ ଖେଳାଳିଙ୍କ ଫିଟନେସ୍ ଭାରତୀୟ ମ୍ୟାନେଜମେଣ୍ଟ ପାଇଁ ମୁଖ୍ୟ ବିଷୟ ପାଲଟିଛି।