ନୂଆଦିଲ୍ଲୀ,୧୭।୨: ଟି-୨୦ ବିଶ୍ୱକପ୍ରେ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଛି। ପାଲେକେଲେରେ ଜିମ୍ବାୱେ ଏବଂ ଆୟରଲାଣ୍ଡ ମଧ୍ୟରେ ହେବାକୁ ଥିବା ମ୍ୟାଚ୍ ବର୍ଷା ଯୋଗୁ ବାତିଲ ହୋଇଯାଇଛି। ଫଳରେ ପୂର୍ବତନ ଚାମ୍ପିୟନ ଅଷ୍ଟ୍ରେଲିଆ ବିଶ୍ୱକପ୍ ଦୌଡ଼ରୁ ବାହାର ହୋଇଯାଇଛି। ମ୍ୟାଚ୍ ବାତିଲ ହେବାରୁ ଜିମ୍ବାୱେକୁ ୧ ପଏଣ୍ଟ ମିଳିଛି, ଯାହା ସେମାନଙ୍କୁ ସୁପର-୮ ପର୍ଯ୍ୟାୟକୁ ନେଇଯାଇଛି।
୨୦୨୧ ବିଶ୍ୱ ବିଜେତା ଅଷ୍ଟ୍ରେଲିଆ ଟିମ୍ ୧୭ ବର୍ଷ ମଧ୍ୟରେ ପ୍ରଥମ ଥର ପାଇଁ ଟି-୨୦ ବିଶ୍ୱକପ୍ର ଗ୍ରୁପ୍ ପର୍ଯ୍ୟାୟରୁ ବିଦାୟ ନେଇଛି। ୩ଟି ମ୍ୟାଚ୍ରୁ ୨ଟିରେ ପରାଜୟ ବରଣ କରିଥିବା ଅଷ୍ଟ୍ରେଲିଆ ଅନ୍ୟ ଦଳର ପ୍ରଦର୍ଶନ ଉପରେ ନିର୍ଭର କରୁଥିଲା। ମାତ୍ର ଆଜିର ମ୍ୟାଚ୍ ବାତିଲ ହେବା ପରେ ଜିମ୍ବାୱେ ୫ ପଏଣ୍ଟ ସହ ଦ୍ୱିତୀୟ ସ୍ଥାନ ଅଧିକାର କରିଛି। ଫଳରେ ଅଷ୍ଟ୍ରେଲିଆ ନିଜର ଶେଷ ମ୍ୟାଚ୍ ଜିତିଲେ ମଧ୍ୟ ସର୍ବାଧିକ ୪ ପଏଣ୍ଟ ପାଇବ, ଯାହା ସେମାନଙ୍କୁ ସୁପର-୮କୁ ନେବା ପାଇଁ ଯଥେଷ୍ଟ ନୁହେଁ।
୨୦୨୪ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିବାରେ ବିଫଳ ହୋଇଥିବା ସିକନ୍ଦର ରଜାଙ୍କ ଜିମ୍ବାୱେ ଦଳ ଚଳିତ ବର୍ଷ ଶକ୍ତିଶାଳୀ ପ୍ରଦର୍ଶନ କରିଛି। ଗ୍ରୁପ୍ ପର୍ଯ୍ୟାୟରେ ଅଷ୍ଟ୍ରେଲିଆକୁ ୨୩ ରନ୍ରେ ପରାସ୍ତ କରିବା ଏହି ଦଳ ପାଇଁ ଟର୍ଣ୍ଣିଂ ପଏଣ୍ଟ ସାଜିଥିଲା। ଏବେ ଶ୍ରୀଲଙ୍କା ସହ ଜିମ୍ବାୱେ ଗ୍ରୁପ୍-ବି ରୁ ପରବର୍ତ୍ତୀ ପର୍ଯ୍ୟାୟକୁ ଉନ୍ନୀତ ହୋଇଛନ୍ତି।
ପାଲେକେଲେରେ ପ୍ରବଳ ବର୍ଷା ଯୋଗୁଁ ଟସ୍ ମଧ୍ୟ ପଡ଼ିପାରିନଥିଲା। ଅମ୍ପାୟାରମାନେ ବହୁ ସମୟ ଅପେକ୍ଷା କରିବା ପରେ ସ୍ଥାନୀୟ ସମୟ ସନ୍ଧ୍ୟା ୫:୩୦ରେ ମ୍ୟାଚ୍କୁ ଆନୁଷ୍ଠାନିକ ଭାବେ ବାତିଲ ଘୋଷଣା କରିଥିଲେ। ଏହି ଫଳାଫଳ ପରେ ଅଷ୍ଟ୍ରେଲିଆ ସହ ଆୟରଲାଣ୍ଡ ଏବଂ ଓମାନ ମଧ୍ୟ ଟୁର୍ଣ୍ଣାମେଣ୍ଟରୁ ବାଦ୍ ପଡ଼ିଛନ୍ତି।
ଆସନ୍ତା ଫେବୃଆରୀ ୧୯ରେ ଜିମ୍ବାୱେ ଏବଂ ଆୟୋଜକ ଶ୍ରୀଲଙ୍କା ମଧ୍ୟରେ ଗ୍ରୁପ୍ର ଶେଷ ମ୍ୟାଚ୍ ଖେଳାଯିବ, ଯେଉଁଥିରେ ଗ୍ରୁପ୍ ଟପର୍ର ନିଷ୍ପତ୍ତି ହେବ।