ଅହମ୍ମଦାବାଦ,୧୮।୨: T20 ବିଶ୍ୱକପ୍ ୨୦୨୬ର ଶେଷ ଗ୍ରୁପ୍ ମ୍ୟାଚ୍ରେ ଭାରତୀୟ ଦଳ ନେଦରଲାଣ୍ଡ ବିପକ୍ଷରେ ୬ ୱିକେଟ୍ ହରାଇ ୧୯୩ ରନ୍ର ଏକ ବଡ ସ୍କୋର ଛିଡ଼ା କରିଛି। ଭାରତୀୟ ମଧ୍ୟକ୍ରମର ବ୍ୟାଟର ଶିବମ ଦୁବେଙ୍କ ଧୂଆଁଧାର ବ୍ୟାଟିଂ ବଳରେ ଦଳ ଏହି ବିଶାଳ ସ୍କୋର କରିବାରେ ସଫଳ ହୋଇଛି।
ପାୱାରପ୍ଲେ ମଧ୍ୟରେ ଓପନରଙ୍କୁ ହରାଇ ଭାରତ ସାମାନ୍ୟ ଚାପରେ ଥିବା ବେଳେ ଶିବମ ଦୁବେ ପଡ଼ିଆର ଚତୁଃପାର୍ଶ୍ୱରେ ଚୌକା ଓ ଛକା ବର୍ଷା କରିଥିଲେ। ସେ ମାତ୍ର ୩୦ ବଲ୍ରୁ ୬୬ ରନ୍ (୪ ଚୌକା, ୬ ଛକା) କରି ଦଳକୁ ଏକ ବଡ଼ ସ୍କୋର ଆଡ଼କୁ ନେଇଥିଲେ। ଅନ୍ୟମାନଙ୍କ ମଧ୍ୟରେ ଅଧିନାୟକ ସୂର୍ଯ୍ୟକୁମାର ଯାଦବ (୩୪), ହାର୍ଦ୍ଦିକ ପାଣ୍ଡ୍ୟା (୩୦) ଏବଂ ତିଲକ ବର୍ମା (୨୮) ଗୁରୁତ୍ୱପୂର୍ଣ୍ଣ ସ୍କୋର କରିଥିଲେ।
ଏହି ମ୍ୟାଚ୍ରେ ଭାରତୀୟ ଓପନର ଅଭିଷେକ ଶର୍ମା ପୁଣିଥରେ ଶୂନ (୦) ରନ୍ରେ ଆଉଟ୍ ହୋଇ ଏକ ଅଲୋଡ଼ା ରେକର୍ଡ କରିଛନ୍ତି। ସେ ଚଳିତ ବିଶ୍ୱକପ୍ରେ ଲଗାତାର ତୃତୀୟ ଥର ପାଇଁ ଖାତା ଖୋଲିବା ପୂର୍ବରୁ ବିଦାୟ ନେଇଛନ୍ତି। ଏହାସହ T20 ବିଶ୍ୱକପ୍ ଇତିହାସରେ ସର୍ବାଧିକ ଥର ଶୂନରେ ଆଉଟ୍ ହୋଇଥିବା ଭାରତୀୟ ବ୍ୟାଟରଙ୍କ ସହ ସେ ସମାନ ସ୍ଥାନରେ ପହଞ୍ଚିଛନ୍ତି।
ଭାରତ ପୂର୍ବରୁ ହିଁ ନିଜର ପ୍ରଥମ ତିନୋଟି ମ୍ୟାଚ୍ ଜିତି ସୁପର-୮ ପାଇଁ ଯୋଗ୍ୟତା ଅର୍ଜନ କରିସାରିଛି। ଅନ୍ୟପଟେ, ପାକିସ୍ତାନ ନାମିବିଆକୁ ପରାସ୍ତ କରି ଗ୍ରୁପ୍-ଏ ରୁ ଦ୍ୱିତୀୟ ଦଳ ଭାବେ ସୁପର-୮ରେ ପ୍ରବେଶ କରିବା ଫଳରେ ନେଦରଲାଣ୍ଡର ଆଶା ଧୂଳିସାତ ହୋଇଛି।