ନୂଆଦିଲ୍ଲୀ,୧୫।୧୨: ବହୁତ ଦିନ ଧରି ବଡ଼ ସ୍କୋର କରିବାକୁ ସଂଘର୍ଷ କରୁଥିବା ଭାରତୀୟ ଟି-୨୦ ଅଧିନାୟକ ସୂର୍ଯ୍ୟକୁମାର ଯାଦବ ଦକ୍ଷିଣ ଆଫ୍ରିକା ବିପକ୍ଷରେ ତୃତୀୟ ଟି-୨୦ ଅନ୍ତର୍ଜାତୀୟ ମ୍ୟାଚ୍ରେ ୭ ଉଇକେଟେରେ ବିଜୟ ପରେ କହିଥିଲେ, ସେ ରନ କରିପାରି ନାହାଁନ୍ତି, କିନ୍ତୁ ଏପରି ନୁହେଁ ଯେ ସେ ଫର୍ମରେ ନାହାନ୍ତି।
ମ୍ୟାଚ ପରେ ପ୍ରେଜେଣ୍ଟେସନ ସମାରୋହରେ ସୂର୍ଯ୍ୟକୁମାର କହିଥିଲେ, ମୁଁ ନେଟ୍ସରେ ଚମତ୍କାର ବ୍ୟାଟିଂ କରୁଛି। ଯେତେବେଳେ ରନ ଆବଶ୍ୟକ ହୁଏ, ସେଗୁଡ଼ିକ ସ୍କୋର ହେବ। ସୂର୍ଯ୍ୟକୁମାର ଏହି ସିରିଜ୍ର ତିନୋଟି ମ୍ୟାଚ୍ରେ ୧୨, ୫ ଏବଂ ୧୨ ରନ କରିଛନ୍ତି।
ସେ କହିଥିଲେ,ଏହା ନୁହେଁ ଯେ ମୁଁ ଫର୍ମରେ ନାହିଁ, କିନ୍ତୁ ମୁଁ ରନ କରିପାରି ନାହିଁ। ପୂର୍ବ ମ୍ୟାଚ୍ର ପରାଜୟରୁ ଶିକ୍ଷା ନେଇ ଦଳ ଭଲ ପ୍ରତ୍ୟାବର୍ତ୍ତନ କରିଛି।
ସେ କହିଥିଲେ, କ୍ରୀଡା ଆପଣଙ୍କୁ ବହୁତ କିଛି ଶିଖାଏ। ଏହିପରି ଫେରିବା ବହୁତ ଭଲ। ଗତ ମ୍ୟାଚ ପରେ ଆମେ ବହୁତ କିଛି ଶିଖିଲୁ। ଆଜି ଏବଂ କଟକରେ ଆମେ ଯାହା କଲୁ ତାହା ଆଶ୍ଚର୍ଯ୍ୟଜନକ ଥିଲା।
ଦକ୍ଷିଣ ଆଫ୍ରିକାକୁ ୧୧୭ ରନରେ ଅଲଆଉଟ କରିବା ପରେ ଭାରତ ୨୫ ବଲ ବାକି ଥାଇ ୭ ଉଇକେଟରେ ବିଜୟୀ ହୋଇ ସିରିଜରେ ୨-୧ରେ ଆଗୁଆ ହୋଇଛି। ଭାରତୀୟ ଅଧିନାୟକ କହିଛନ୍ତି, ଆମେ ବିଜୟର ମଜା ନେବୁ ଏବଂ ଆସନ୍ତାକାଲି ଲକ୍ଷ୍ନୌ ପହଞ୍ଚିବା ପରେ, ଆମେ ବସି ପରବର୍ତ୍ତୀ ମ୍ୟାଚ ପାଇଁ ଆମର ଯୋଜନା ବିଷୟରେ ଆଲୋଚନା କରିବୁ।