ନୂଆଦିଲ୍ଲୀ,୨୭ା୧୧: ହାସ୍ୟ ଅଭିନେତା ସମୟ ରାଇନା ଏବଂ ଅନ୍ୟ ଚାରିଜଣ ହାସ୍ୟ ଅଭିନେତାଙ୍କ ଦ୍ୱାରା ଦିବ୍ୟାଙ୍ଗ (Specially-abled) ଲୋକଙ୍କୁ ପରିହାସ କରିବା ମାମଲାରେ ସୁପ୍ରିମକୋର୍ଟ ଗୁରୁବାର ଏକ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି।
ପ୍ରଧାନ ବିଚାରପତି ସୂର୍ଯ୍ୟକାନ୍ତ ଏବଂ ବିଚାରପତି ଜୟମାଲ୍ୟ ବାଗଚୀଙ୍କ ଖଣ୍ଡପୀଠ ସମୟ ରାଇନାଙ୍କ ସମେତ ଚାରିଜଣ କଳାକାର ବାଲରାଜ ପରମଜିତ୍ ସିଂ ଘାଇ, ସୋନାଲୀ ଠକ୍କର, ଏବଂ ନିଶାନ୍ତ ଜଗଦୀଶ ତନୱାରଙ୍କୁ ଦିବ୍ୟାଙ୍ଗ ବ୍ୟକ୍ତିଙ୍କ ଚିକିତ୍ସା ପାଇଁ ଅର୍ଥ ସଂଗ୍ରହ କରିବାକୁ ଏବଂ ସେମାନଙ୍କ କାର୍ଯ୍ୟକ୍ରମରେ ସେମାନଙ୍କ ସଫଳତାର କାହାଣୀ ପ୍ରଦର୍ଶିତ କରିବାକୁ ନିର୍ଦ୍ଦେଶ ଦେଇଛନ୍ତି।
ଚଳିତ ବର୍ଷ ପ୍ରାରମ୍ଭରେ, ସମୟ ରାଇନା ତାଙ୍କ ୟୁଟ୍ୟୁବ୍ ଶୋ’ ‘India’s Got Latent’ରେ ସ୍ପାଇନାଲ୍ ମସ୍କୁଲାର୍ ଆଟ୍ରୋଫି (SMA) ରେ ପୀଡ଼ିତ ଶିଶୁ ସମେତ ଅନ୍ୟ ରୋଗୀଙ୍କୁ ପରିହାସ କରିଥିଲେ। ସେ ମଧ୍ୟ ଅନ୍ଧ ଓ ଟେରା ବ୍ୟକ୍ତିମାନଙ୍କୁ ନେଇ ଉପହାସ କରିଥିଲେ।
ପରିହାସ ପରେ କୋର୍ଟ କଳାକାରମାନଙ୍କୁ ଏକାଧିକ ସମନ ଜାରି କରିଥିଲେ ଏବଂ ସେମାନଙ୍କୁ ସେମାନଙ୍କ ପ୍ଲାଟଫର୍ମରେ ସର୍ବସାଧାରଣରେ କ୍ଷମା ମାଗିବାକୁ ନିର୍ଦ୍ଦେଶ ଦେଇଥିଲେ। ଗତ ଅକ୍ଟୋବରରେ ସମସ୍ତ ହାସ୍ୟ ଅଭିନେତା ଏକ ମିଳିତ ବିବୃତ୍ତିରେ ଦୁଃଖ ପ୍ରକାଶ କରିଥିଲେ।
ଗୁରୁବାର ଶୁଣାଣି ସମୟରେ, ପ୍ରଧାନ ବିଚାରପତିଙ୍କ ଖଣ୍ଡପୀଠ ପରାମର୍ଶ ଦେଇଥିଲେ ଯେ ହାସ୍ୟ ଅଭିନେତାମାନେ ସେମାନଙ୍କ ପ୍ଲାଟଫର୍ମକୁ SMAରେ ପୀଡ଼ିତ ବ୍ୟକ୍ତିବିଶେଷଙ୍କ ସମେତ ଦିବ୍ୟାଙ୍ଗମାନଙ୍କୁ ଆମନ୍ତ୍ରଣ କରନ୍ତୁ ଏବଂ କଳାକାରଙ୍କ ଓକିଲ ଏହାକୁ ପାଳନ କରିବାକୁ ରାଜି ହୋଇଥିଲେ।
ପ୍ରଧାନ ବିଚାରପତି ସୂର୍ଯ୍ୟକାନ୍ତ ଏହି ଅବସରରେ ଦିବ୍ୟାଙ୍ଗଙ୍କୁ ଅପମାନିତ କରୁଥିବା ପରିହାସକୁ ଦଣ୍ଡନୀୟ ଅପରାଧ କରିବା ପାଇଁ SC/ST ଆଇନ ଭଳି ଏକ କଠୋର ଆଇନ ଆଣିବାକୁ ପ୍ରସ୍ତାବ ଦେଇଥିଲେ।
ସେ ସଲିସିଟର ଜେନେରାଲଙ୍କୁ ପ୍ରଶ୍ନ କରିଥିଲେ, “SC/ST ଆକ୍ଟ ଧାରା ଭଳି ଏକ ଆଇନ ଆଣିବା କଥା କାହିଁକି ବିଚାର କରାନଯିବ?” ସେ ଆହୁରି କହିଥିଲେ, “ଦେଶ ଭିତରେ ହେଉ କିମ୍ବା ବାହାରେ, ଆପଣ ଓ ଆପଣଙ୍କ ଟିମ୍ ଭବିଷ୍ୟତରେ ବହୁତ ସତର୍କ ରହିବା ଦରକାର।”