ଭଞ୍ଜନଗର,୧୧ା୧(ବାବୁଲା ପ୍ରଧାନ): ଗଞ୍ଜାମ ଜିଲା ଜଗନ୍ନାଥପ୍ରସାଦ ବ୍ଲକ ରୁଢ଼ାପଦରସ୍ଥିତ ଗ୍ରାମ ବିକାଶ ବିଦ୍ୟା ବିହାରର ୨୩ ତମ ବାର୍ଷିକ ଉତ୍ସବ ଶନିବାର ଅନୁଷ୍ଠିତ ହୋଇଯାଇଛି। ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଉତ୍ସବକୁ ଉଦଘାଟନ କରିଥିଲେ। ଏହି ଅବସରରେ ସେ କହିଥିଲେ ଯେ, ବିଦ୍ୟାଳୟର ଉନ୍ନତି ପାଇଁ ସବୁ ପ୍ରକାର ସହଯୋଗ ଯୋଗାଇ ଦିଆଯିବ। ଛାତ୍ରୀଛାତ୍ର ହେଉଛନ୍ତି ଦେଶର ଭବିଷ୍ୟତ। ସେମାନେ ନିଜ ଭବିଷ୍ୟତ ଗଢି ଦେଶର ବିକାଶରେ ସାମିଲ ହେବାକୁ ବିଧାୟକ ଆହ୍ବାନ କରିଥିଲେ।
ଏଥିସହ ସେ କହିଥିଲେ ଯେ, ଏତେବଡ଼ ଅନୁଷ୍ଠାନ ଏଠାରେ ହେବା ଦ୍ବାରା ଅଞ୍ଚଳର ଛାତ୍ରୀଛାତ୍ର ମାଗଣା ତାହାର ସୁଫଳ ପାଉଛନ୍ତି। ଯାହା ଆମ ସମସ୍ତଙ୍କ ପାଇଁ ଗର୍ବର ବିଷୟ। ଏହି ଅବସରରେ ବିଧାୟକ ବିଜ୍ଞାନ ଲ୍ୟାବ ଏବଂ ସ୍ମାର୍ଟ କ୍ଲାସ ରୁମ୍ ଉଦଘାଟନ କରିଥିଲେ। ଏଥିସହ ବିଭିନ୍ନ ବିଭାଗରେ କୃତିତ୍ୱ ଅର୍ଜନ କରିଥିବା କୃତୀ ଛାତ୍ରୀଛାତ୍ରଙ୍କୁ ପୁରସ୍କୃତ ସେ କରିଥିଲେ। ଉତ୍ସବରେ ବିଦ୍ୟାଳୟ ଅଧ୍ୟକ୍ଷ ଲିଙ୍ଗରାଜ ମିଶ୍ର ସଭାପତିତ୍ୱ କରିଥିଲେ। ବ୍ଲକ ଉପାଧ୍ୟକ୍ଷ ନୀଳାଚଳ ଖିଲାର, କୋକଳବା ଉଚ୍ଚ ବିଦ୍ୟାଳୟର ଅବସରପ୍ରାପ୍ତ ପ୍ରଧାନଶିକ୍ଷକ ପୀତାମ୍ବର ପାଢ଼ୀ, ତାରସିଂ ବିଦ୍ୟାଳୟର ପ୍ରଧାନଶିକ୍ଷକ, ଦେବେନ୍ଦ୍ର ନାଥ ଦାସ, ଶରତ ଚନ୍ଦ୍ର ମହାନ୍ତି, ଦିବାକର ଚୌଧୁରୀ, ଆଇନଜୀବୀ ରଙ୍କନିଧି ପାତ୍ର ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ।
ସଭାକୁ କାହ୍ନୁ ପାଢ଼ୀ ସଂଯୋଜନା କରିଥିବା ବେଳେ ଦେଶବନ୍ଧୁ ସ୍ବାଇଁ ଧନ୍ୟବାଦ ପ୍ରଦାନ କରିଥିଲେ। ଆଜକୁ ୨୩ ବର୍ଷ ଧରି ଆଦିବାସୀ ବହୁଳ ରୁଦ୍ଧାପଦର ଅଞ୍ଚଳରେ ଏହି ଶିକ୍ଷାନୁଷ୍ଠାନ ଖୋଲିଛି। ଗ୍ରାମ ବିକାଶ ଦ୍ୱାରା ତାହା ପରିଚାଳିତ ହେଉଛି। ବର୍ତ୍ତମାନ ସେଠାରେ ୪୭୦ ଛାତ୍ରୀଛାତ୍ର ହଷ୍ଟେଲରେ ରହି ମାଗଣା ପଢୁଛନ୍ତି।