ତେହରାନ୍,୬।୩: ଇରାନ-ଆମେରିକା ଯୁଦ୍ଧ ଗୁରୁବାରକୁ ୬ ଦିନ ପୂରିଛି । ଯୁଦ୍ଧର ପ୍ରଭାବ ବେଳକୁ ବେଳ ବିଭିନ୍ନ ଦେଶକୁ ବ୍ୟାପିବା ସହ ତୀବ୍ର ହେବାରେ ଲାଗିଛି। ଏହାମଧ୍ୟରେ ଇରାନ ବିଶ୍ୱର ସର୍ବବୃହତ୍ ଏନର୍ଜି କରିଡର ରୂପେ ପରିଚିତ ହୋର୍ମୁଜ୍ ଷ୍ଟ୍ରେଟ୍ ସାମୁଦ୍ରିକ ପଥକୁ ଆମେରିକା ,ଇସ୍ରାଏଲ,ୟୁରୋପ ଏବଂ ଆମେରିକାର ୟୁରୋପୀୟ ସମର୍ଥନକାରୀ ରାଷ୍ଟ୍ରଙ୍କ ଲାଗି ବନ୍ଦ କରିଦେଇଛି। ଏହି ବାଟ ଦେଇ ଏହିସବୁ ଦେଶକୁ ଯାଉଥିବା କୌଣସି ତୈଳ ପରିବହନକାରୀ ଜାହାଜକୁ ଯିବାକୁ ଦିଆଯିବ ନାହିଁ ବୋଲି ଇରାନର ଆଇଆର୍ଜିସି ଗୁରୁବାର ସ୍ପଷ୍ଟ କରିଛି। ଯଦି ଏହିସବୁ ଦେଶର କୌଣସି ଜାହାଜ ହୋର୍ମୁଜ୍ ଷ୍ଟ୍ରେଟ୍ ଦେଇ ଯାତାୟାତ କରେ, ତେବେ ଇରାନ ତାହା ଉପରେ ଆକ୍ରମଣ କରିବ।
ଯୁଦ୍ଧ ସମୟରେ ଅନ୍ତର୍ଜାତୀୟ ଆଇନକୁ ନେଇ ପାରିତ ପ୍ରସ୍ତାବ ଅନୁସାରେ ଇରାନ ଏଭଳି ପଦକ୍ଷେପ ନେବା ଅଧିକାର ରହିଛି ବୋଲି ଇରାନର ସରକାରୀ ଗଣମାଧ୍ୟମ ସଂସ୍ଥା ଆଇଆର୍ଆଇବି କହିଛି। ତେବେ ହୋର୍ମୁଜ୍ ଷ୍ଟ୍ରେଟ୍ ଦେଇ ଭାରତକୁ ତୈଳ ପରିବହନ କ୍ଷେତ୍ରରେ କୌଣସି ପ୍ରତିବନ୍ଧକ ନାହିଁ ବୋଲି ଇରାନ ସ୍ପଷ୍ଟ କରିଛି। ପୂର୍ବରୁ ଚାଇନା ପାଇଁ ଇରାନ କୌଣସି ପ୍ରତିବନ୍ଧକ ଲଗାଇ ନ ଥିଲାବେଳେ ଏବେ ଭାରତ ପାଇଁ ମଧ୍ୟ ସମାନ ନୀତି ଆପଣାଇଛି। ଫଳରେ ଉପସାଗରୀୟ ଦେଶଗୁଡିକରୁ ଭାରତକୁ ତୈଳ ଯୋଗାଣ ନେଇ ଯେଉଁ ଆଶଙ୍କା ରହିଥିଲା, ତାହା ଦୂର ହୋଇଛି।
ସେପଟେ ମଧ୍ୟପ୍ରାଚ୍ୟ ସ୍ଥିତିକୁ ନେଇ ତୈଳ ଯୋଗାଣ କ୍ଷେତ୍ର ପ୍ରଭାବିତ ହେବା ଆଶଙ୍କାରେ ରୁଷ ଭାରତକୁ ପର୍ଯ୍ୟାପ୍ତ ତୈଳ ଯୋଗାଇବାକୁ କହିଛି। ଭାରତକୁ ପ୍ରାୟ ୯.୫ ନିୟୁତ ବ୍ୟାରେଲ୍ ତୈଳ ଯୋଗାଇଦେବାକୁ ରୁଷିଆ କହିଥିଲାବେଳେ ସପ୍ତାହକ ମଧ୍ୟରେ ଏହା ଭାରତରେ ପହଞ୍ଚିବା ନେଇ ସୂଚନା ଦେଇଛି।