କୋକସରା, ୨୭।୩ (ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲ୍ଲା କୋକସରା ବ୍ଲକର ପ୍ରସିଦ୍ଧ ପର୍ଯ୍ୟଟନ ତଥା ଧାର୍ମିକ ପୀଠ ଗୁଡହାଣ୍ଡି ଡୋକରୀଚଞ୍ଚରାଠାରେ ଚଳିତ ବର୍ଷ ଶ୍ରୀରାମ ନବମୀ ପର୍ବ ଅତ୍ୟନ୍ତ ନିରାଡ଼ମ୍ବର ଭାବେ ପାଳିତ ହୋଇଯାଇଛି। ଦୁଇ କମିଟି ମଧ୍ୟରେ ଚାଲିଥିବା ବିବାଦ ଯୋଗୁ ପ୍ରଶାସନ ପକ୍ଷରୁ ମନ୍ଦିର ବାହାରେ ପୂଜା କରାଯାଇଥିବା ବେଳେ, ହଜାର ହଜାର ଭକ୍ତ ଭଗବାନଙ୍କ ଦର୍ଶନ ନପାଇ ନିରାଶରେ ଫେରିଛନ୍ତି।
ଡୋକରୀଚଞ୍ଚରା ଉନ୍ନୟନ ସମିତି ଏବଂ ବନ ବିଭାଗ ଦ୍ୱାରା ଗଠିତ ନୂତନ କମିଟି (ETG) ମଧ୍ୟରେ ପରିଚାଳନା ଦାୟିତ୍ୱକୁ ନେଇ ଦୀର୍ଘ ଦିନରୁ ବିବାଦ ଲାଗିରହିଛି। ଏହି ମାମଲା ବର୍ତ୍ତମାନ ଉଚ୍ଚ ନ୍ୟାୟାଳୟରେ ବିଚାରାଧୀନ ଅଛି। କୌଣସି ସମାଧାନ ନ ବାହାରିବାରୁ ପ୍ରଶାସନ ପକ୍ଷରୁ କେବଳ ପୂଜାର୍ଚ୍ଚନା ପାଇଁ ଅନୁମତି ଦିଆଯାଇଥିଲା ଏବଂ କୌଣସି ବଡ଼ ଧରଣର ଉତ୍ସବ କରାଯାଇ ନ ଥିଲା।
ଶୁକ୍ରବାର ଅତିରିକ୍ତ ଜିଲାପାଳ ତନ୍ମୟ ଦରୱାନ, ଧର୍ମଗଡ଼ ଉପଜିଲାପାଳ ପ୍ରେକ୍ଷା ଅଗ୍ରୱାଲ ଉପଖଣ୍ଡ ପୋଲିସ ଅଧିକାରୀ ଭର୍ସିତା ଆଡେପୁ, ଧର୍ମଗଡ଼ ତହସିଲଦାର କୀର୍ତ୍ତିଚନ୍ଦ୍ର ପ୍ରଧାନ, କୋକସରା ତହସିଲଦାର ଚୋଡଗଙ୍ଗ ପ୍ରଧାନ, ଗୋଷ୍ଠୀ ଉନ୍ନୟନ ଅଧିକାରୀ ଡ଼ଃ ହିମାଞ୍ଚଳ ମାଝୀ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ମାତ୍ର ମନ୍ଦିରର ମୁଖ୍ୟ ଦ୍ୱାର ବନ୍ଦ ଥିବା କାରଣରୁ ପ୍ରଶାସନକୁ ବାହାରେ ହିଁ ପୂଜା କରିବାକୁ ପଡ଼ିଥିଲା। ଆଇନ ଶୃଙ୍ଖଳା ରକ୍ଷା ପାଇଁ ଆମପାଣି ଥାନା ପକ୍ଷରୁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା।
ବନ ବିଭାଗ ପକ୍ଷରୁ ଏସିଏଫ୍ ଓମକାର ଦାସ, ଧର୍ମଗଡ଼ ରେଞ୍ଜ ଅଧିକାରୀ ଭବାନୀ ଶଙ୍କର କାଉର, ବନପାଳ ରାଜେନ୍ଦ୍ର ନାଏକ ଓ କର୍ମଚାରୀ ମାନେ ଉପସ୍ଥିତ ରହିଥିବାବେଳେ ଆମପାଣି ଥାନା ପକ୍ଷରୁ ପୋଲିସ ଫୋର୍ସ ମୁତୟନ କରାଯାଇଛି। ପ୍ରବେଶ ଗେଟ୍ ପାଖରୁ କୌଣସି ଲୋକଙ୍କ ଯାନ ବାହନ ପର୍ଯ୍ୟଟନସ୍ଥଳୀକୁ ଛଡାଯାଇ ନଥିବା ବେଳେ ଭକ୍ତ ଓ ଶ୍ରଦ୍ଧାଳୁ ମନ୍ଦିର ବେଢ଼ାରେ ବୁଲାବୁଲି କରି ନିରାଶରେ ଫେରିଥିବା ଦେଖିବାକୁ ମିଳୁଛି। ବର୍ଷ ବର୍ଷ ଧରି ଗୁଡହାଣ୍ଡି ଡୋକରୀ ଚଞ୍ଚରାଠାରେ ପାଳିତ ହୋଇ ଆସୁଥିବା ଶ୍ରୀରାମ ନବମୀ ଓ ଗୁଡ଼ହାଣ୍ଡି ମହୋତ୍ସବ ଅଞ୍ଚଳବାସୀଙ୍କ ହୃଦୟରେ ସ୍ଥାନିତ ହୋଇଛି। ହେଲେ ବନବିଭାଗ ଦ୍ବାରା ଏକ ସମାନ୍ତରାଳ କମିଟି ଗଠନ କରିବା ପରେ ଏହି ଧାର୍ମିକ ପୀଠରେ ଏବେ ବିଶୃଙ୍ଖଳିତ ପରିବେଶ ସୃଷ୍ଟି ହୋଇଛି।
ଦୀର୍ଘ ୫୦ ବର୍ଷର ପରମ୍ପରା ଭାଙ୍ଗିଥିବାରୁ ଏବଂ ମନ୍ଦିର ଭିତରକୁ ପ୍ରବେଶ ମନା ହୋଇଥିବାରୁ ସ୍ଥାନୀୟ ଅଞ୍ଚଳବାସୀ ଓ ଶ୍ରଦ୍ଧାଳୁଙ୍କ ମଧ୍ୟରେ ଘୋର ଅସନ୍ତୋଷ ଦେଖାଦେଇଛି। ଭକ୍ତି ଭାବାବେଗକୁ ଆଘାତ ଦିଆଯାଇଛି ବୋଲି ସାଧାରଣରେ ମତ ପ୍ରକାଶ ପାଇଛି।
Dharitri – Odisha’s No.1 Odia Daily