ଦୁବାଇ,୧୯।୯: ଏସିଆ କପ୍ ୨୦୨୫ରେ ଆଫଗାନିସ୍ତାନ ବିପକ୍ଷ ମ୍ୟାଚ ମଝିରେ ଶ୍ରୀଲଙ୍କାର ତାରକା କ୍ରିକେଟର ଡୁନିଥ ଓ୍ବେଲାଲାଗେଙ୍କ ପିତା ସୁରଙ୍ଗା ଓ୍ବେଲାଲାଗେଙ୍କର ହୃଦ୍ଘାତରେ ମୃତ୍ୟୁ ହୋଇଛି। ଆବୁଧାବିର ଶେଖ ଜାୟେଦ ଷ୍ଟାଡିୟମରେ ଚାଲିଥିବା ମ୍ୟାଚରେ ଶ୍ରୀଲଙ୍କା ବିଜୟୀ ହୋଇଥିଲେ ମଧ୍ୟ, ଖେଳ ଶେଷ ପରେ ଡୁନିଥଙ୍କୁ ଏହି ଦୁଃଖଦ ଖବର ଦିଆଯାଇଥିଲା। ସୋସିଆଲ ମିଡିଆରେ ପ୍ରସାରିତ ଏକ ଭିଡିଓରେ ଶ୍ରୀଲଙ୍କାର କୋଚ୍ ସନଥ ଜୟସୂରିୟା ଡୁନିଥଙ୍କୁ ଏହି ଖବର ଦେଇ ସାନ୍ତ୍ୱନା ଦେଉଥିବାର ଦୃଶ୍ୟ ଦେଖାଯାଇଛି।
ପୂର୍ବତନ ଶ୍ରୀଲଙ୍କା କ୍ରିକେଟର ରସେଲ ଆର୍ନଲ୍ଡ ସନି ସ୍ପୋର୍ଟସ ନେଟୱାର୍କରେ କମେଣ୍ଟ୍ରି କରୁଥିବା ସମୟରେ କହିଛନ୍ତି, “ଡୁନିଥଙ୍କ ପିତା ସୁରଙ୍ଗା ମଧ୍ୟ ଜଣେ କ୍ରିକେଟର ଥିଲେ ଏବଂ ପ୍ରିନ୍ସ ଅଫ୍ ୱେଲ୍ସ କଲେଜର ଅଧିନାୟକ ଥିଲେ। ଏହି ଖବର ଖୁବ୍ ଦୁଃଖଦ। ଆମେ ତାଙ୍କ ପରିବାର ପ୍ରତି ସମବେଦନା ଜଣାଉଛୁ।”
ମ୍ୟାଚରେ ଡୁନିଥଙ୍କ ପ୍ରଦର୍ଶନ ଭଲ ନଥିଲା; ସେ ୪ ଓଭରରେ ୪୯ ରନ୍ ଦେଇ ମାତ୍ର ଗୋଟିଏ ୱିକେଟ ନେଇଥିଲେ। ତଥାପି, ଶ୍ରୀଲଙ୍କା ଟିମ୍ ବିଜୟୀ ହୋଇଥିଲା। ଏହି ଦୁଃଖଦ ଘଟଣା ସତ୍ତ୍ୱେ, ଟିମର ଏକତା ଡୁନିଥଙ୍କୁ ଆଗାମୀ ମ୍ୟାଚରେ ଶକ୍ତି ଯୋଗାଇବ ବୋଲି ଆଶା କରାଯାଉଛି।