କେନ୍ଦୁଝର,୨୦ା୬(ନରେଶ ଚନ୍ଦ୍ର ପଟ୍ଟନାୟକ): ରାତି ପାହିଲେ ପବିତ୍ର ଶ୍ରୀ ବଳଦେବଜୀଉଙ୍କ ପବିତ୍ର ରଥଯାତ୍ରା। ନଅ ଦିନ ବ୍ୟାପୀ ଚାଲିବାକୁ ଥିବା ଏହି ପର୍ବ ପାଇଁ ସମସ୍ତ ପ୍ରସ୍ତୁତି ସରିଛି। ଉତ୍ତାପର ହ୍ରାସ ଏବଂ ମେଘାଚ୍ଛନ୍ନ ଆକାଶ ତଥା ତାତି କମି ପାଗ ଅନୁଳୂଳ ହୋଇଛି। ପବିତ୍ର ପର୍ବରେ ଭକ୍ତଙ୍କୁ ଦର୍ଶନ ଦେବା ପାଇଁ ଭଗବାନ ମନ୍ଦିର ବାହାରକୁ ଆସିବେ। ଏ ନେଇ କେନ୍ଦୁଝରର ଆରାଧ୍ୟ ଶ୍ରୀ ବଳଦେବଜୀଉଙ୍କ ପବିତ୍ର ଗୁଣ୍ଡିଚାଯାତ୍ରା ଉପଲକ୍ଷେ ଅକ୍ଷୟ ତୃତୀୟାଠାରୁ ଆରମ୍ଭ ହୋଇଥିବା ରଥ ନିର୍ମାଣ ସରିବା ସହ ପଥ ମଧ୍ୟ ପ୍ରସ୍ତୁତ ହୋଇ ରହିଛି।
ପୁରୁଣା ସହର ଉତ୍ସବମୁଖର ହୋଇଉଠିଛି। କେବଳ ଭକ୍ତମାନେ ରଥାରୂଢ଼ ଭଗବାନ୍ଙ୍କୁ ଟାଣି ନେଇ ଗୁଣ୍ଡିଚା ମନ୍ଦିରରେ ପହଞ୍ଚାଇବାକୁ ବାକି ରହିଛି। ଭକ୍ତ ଓ ଭଗବାନ୍ ଏକ ହେବେ ଏଥିପାଇଁ ପ୍ରସ୍ତୁତି ଜୋରଦାର ହୋଇଛି। ବ୍ରାହ୍ମଣ, ସେବାୟତ, ଶ୍ରୀ ଜୀଉଙ୍କୁ ରଥ ଉପରକୁ ପହଣ୍ଡି କରି ନେବା ପାଇଁ ପହଣ୍ଡିଆ ସେବକ, ଘଣ୍ଟ ଓ ଶଙ୍ଖ ବାଦକମାନେ ଅପେକ୍ଷାରେ ଅଛନ୍ତି। ରଥରେ ଛେରାପହଁରା କରିବା ପାଇଁ ରାଜା ଓ ରଥକୁ ଆଗକୁ ଗଡ଼ାଇନେବାକୁ ଡାହୁକ ଏବଂ ରଥଯାତ୍ରାର ଧାରା ବିବରଣୀ ପ୍ରଚାର ପାଇଁ ଘୋଷକମାନେ ଉତ୍ସୁକ ହେଲେଣି। ବିଶ୍ୱର ସର୍ବୋଚ୍ଚ ରଥ ବଡ଼ଦାଣ୍ଡରେ ଗଡ଼ିବା ଅପେକ୍ଷାରେ ରହିଥିବା ବେଳେ ରଥ ଟାଣିବା ପାଇଁ ଭକ୍ତଙ୍କ ଆବେଗ ବଢ଼ିଚାଲିଛି। ଆଲୋକ ସଜ୍ଜାରେ ବଡ଼ ଦେଉଳ, ଝୋଟିରେ ବଡ଼ଦାଣ୍ଡ ଓ ଗୁଣ୍ଡିଚା ମନ୍ଦିର ପରିସର ଝଟକୁଛି। ଭକ୍ତଙ୍କ ସୁରକ୍ଷା ଏବଂ ଟ୍ରାଫିକ ନିୟନ୍ତ୍ରଣ ପାଇଁ ପୋଲିସ ବାହିନୀ ମଧ୍ୟ ପ୍ରସ୍ତୁତ। ବିଭିନ୍ନ ସଂଗଠନ, କ୍ଲବ୍ର ସଦସ୍ୟା/ସଦସ୍ୟମାନେ ଭକ୍ତଙ୍କୁ ସୁବିଧା ଯୋଗାଇଦେବା ସହ ସହାୟତା ଦେବାକୁ ପହଞ୍ଚି ଗଲେଣି। ବଡ଼ଦାଣ୍ଡ, ଏହାର ବାହାରେ ଛୋଟ ଦୋକାନୀ ଆସର ମେଲିବାକୁ ବସିଥିବା ବେଳେ ମେଳା, ମୀନା ବଜାର ଆୟୋଜନ ଚାଲିଛି। ସେହିପରି ସାଂସ୍କୃତିକ କାର୍ଯ୍ୟକ୍ରମ, ଭଜନ ସମାରୋହ ପାଇଁ ମଧ୍ୟ ବ୍ୟବସ୍ଥା ସରିଛି।