ନୂଆପଡ଼ା,୨୧ା୨ (ମକାରୁ ବେମାଲ): ନୂଆପଡ଼ା ଜିଲା ପୋଲିସ ୬ଜଣ ସାଇବର ଠକଙ୍କୁ ଗିରଫ କରି ସେମାନଙ୍କଠାରୁ ୬ଟି ମୋବାଇଲ, ୩ ଆକାଉଣ୍ଟ୍ସ ଡିଟେଲ୍ ପାଇଛି। ସେଥିରେ ୨ କୋଟି ୯୪ ଲକ୍ଷ ୫୦ ହଜାର ଟଙ୍କା ଟ୍ରାଞ୍ଜାକ୍ସନ ହୋଇଥିବା ଜଣାପଡିଛି ବୋଲି ଶନିବାର ଜିଲା ପୋଲିସ ମୁଖ୍ୟାଳୟରେ ଆୟୋଜିତ ଖବରଦାତା ସମ୍ମଳନୀରେ ଜିଲା ଆରକ୍ଷୀ ଅଧୀକ୍ଷକ ଅମ୍ରିତ ପାଲ ସିଂ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ୨୦୨୪ଠାରୁ ନୂଆପଡ଼ା ଜିଲାରେ ସାଇବର ଅପରାଧ ଚାଲିଥିବା ସୂଚନା ମିଳିଥିଲା। ସିଆଇଡି ସିବି ଓଡିଶା ଦ୍ୱାରା ମୂଳ ଆକାଉଣ୍ଟ ବିରୋଧରେ ଆରମ୍ଭ ହୋଇଥିବା ସ୍ବତନ୍ତ୍ର ସାଇବର କବଚ ଅଭିଯାନରେ ନୂଆପଡା ଥାନା ସାଇବର ସେଲ ସହାୟତାରେ ଆଇସି ଏମ୍ଏଚ୍ଏରୁ ମିଳିଥିବା ସୂଚନା ଅନୁଯାୟୀ, ବିଭିନ୍ନ ବ୍ୟାଙ୍କ ଓ ଏହା ଅଧୀନରେ ଥିବା ସନ୍ଦିଗ୍ଧ ବ୍ୟାଙ୍କ ଆକାଉଣ୍ଟଗୁଡିକ ଯାଞ୍ଚ କରି ସାଇବର ଅପରାଧର ପର୍ଦ୍ଦାଫାଶ କରିଛି।
ଏଥିରେ ସ୍ଥାନୀୟ ଲୋକଙ୍କ ହାତ ରହିଥିବା ଅନୁମାନ କରାଯାଉଛି । ତଦନ୍ତ ଚାଲିଥିବାରୁ ସମସ୍ତଙ୍କ ନାମ ଗୋପନ ରଖାଯାଇଛି। ନୂଆପଡ଼ା ଓ ଖରିଆର ରୋଡ ଅଞ୍ଚଳର ୬ ଜଣ ଅପରାଧୀ ଗିରଫ ହୋଇଛନ୍ତି। ଆଗକୁ ଏହି ସାଇବର କବଚ ଅଭିଯାନ ଜାରି ରହିବ ବୋଲି ଏସ୍ପି ସିଂ କହିଛନ୍ତି। ଏ ନେଇ ନୂଆପଡା ଥାନା କେସ ନଂ.୧୩/୨୦୨୬ରେ ଏକ ମାମଲା ରୁଜୁ କରାଯାଇ ଗିରଫ ଅପରାଧୀଙ୍କୁ ଶନିବାର ସନ୍ଧ୍ୟାରେ କୋର୍ଟ ଚାଲାଣ କରାଯାଇଛି