ଭାରତ ଓ କାନାଡ଼ା ସମ୍ପର୍କ ପୁଣି ବିଗିଡ଼ିବାରେ ଲାଗିଲାଣି। ୨୦୨୩ ଜୁନ୍ରେ କାନାଡ଼ାର ବ୍ରିଟିଶ କଲମ୍ବିଆସ୍ଥିତ ଏକ ଗୁରୁଦ୍ୱାରାରେ ଖଲିସ୍ତାନୀ ବିଚ୍ଛିନ୍ନତାବାଦୀ କୁହାଯାଉଥିବା ହରଦୀପ ସିଂ ନିଜ୍ଜାରଙ୍କୁ ଗୁଳିକରି ହତ୍ୟା କରାଯାଇଥିଲା। ଏହି ହତ୍ୟା ପଛରେ ଭାରତର ହାତ ରହିଛି ବୋଲି କାନାଡ଼ା କହିଆସୁଛି। ଦୁଇ ଦିନ ତଳେ ଆଲବର୍ଟାର ଏଡମଣ୍ଟନ୍ରୁ କାନାଡ଼ା ପୋଲିସ ୩ ଭାରତୀୟ କରନ୍ ବ୍ରାର୍, କମଲପ୍ରୀତ୍ ସିଂ ଓ କରନ୍ପ୍ରୀତ୍ ସିଂଙ୍କୁ ଗିରଫ କରିଥିଲା। ଏହାପରେ କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ କହିଛନ୍ତି, ତାଙ୍କ ଦେଶରେ ଆଇନର ଶାସନ ଚାଲିଛି ଓ କାନାଡ଼ା ନାଗରିକଙ୍କ ସୁରକ୍ଷା ଲାଗି ସେ ପ୍ରତିଶ୍ରୁତିବଦ୍ଧ। ଶିଖ୍ ସଂସ୍କୃତି ଓ ଐତିହ୍ୟ ନେଇ ଆୟୋଜିତ ଏକ ଉତ୍ସବରେ ଯୋଗଦେବା ଅବସରରେ ଟ୍ରୁଡୋ ଏଭଳି ମନ୍ତବ୍ୟ ଦେଇଛନ୍ତି। ଅନ୍ୟପକ୍ଷରେ ଭାରତ ବିରୋଧରେ କାନାଡ଼ାର ବାରମ୍ବାର ଅଭିଯୋଗକୁ ନେଇ ଭାରତର ବହିର୍ବ୍ୟାପାର ମନ୍ତ୍ରଣାଳୟ ଅସନ୍ତୋଷ ବ୍ୟକ୍ତ କରିଛି। ନିଜ୍ଜାରଙ୍କ ହତ୍ୟା ଘଟଣାରେ ଭାରତୀୟ ନାଗରିକଙ୍କ ସମ୍ପୃକ୍ତି ନେଇ କାନାଡ଼ା ପ୍ରମାଣ ଦେଉ ବୋଲି ଭାରତ ଦୃଢ଼ ଦାବି ଉପସ୍ଥାପନ କରିଆସୁଛି।
ଏହା ଜଣାଶୁଣା ଯେ, ପୃଥିବୀର ଅନ୍ୟ ଦେଶ ଅପେକ୍ଷା ଭାରତରୁ ଯାଇଥିବା ଅନେକ ଶିଖ୍ କାନାଡ଼ାରେ ବସବାସ କରୁଛନ୍ତି ଓ ତନ୍ମଧ୍ୟରୁ ଅଧିକାଂଶ ସେଠାକାର ନାଗରିକ ପାଲଟିଗଲେଣି। ଜଷ୍ଟିନ୍ ଟ୍ରୁଡୋଙ୍କ ପୂର୍ବ ସରକାରରେ ପ୍ରତିରକ୍ଷା ମନ୍ତ୍ରୀ ଭାବେ ଜଣେ ଶିଖ୍ ହରଜିତ୍ ସାଜନ ଥିଲେ। ତେଣୁ ଖଲିସ୍ତାନୀ ଆନ୍ଦୋଳନରେ ସାମିଲ ହୋଇ କେତେକ ଶିଖ୍ ସଙ୍ଗଠନ ଭାରତ ବିରୋଧୀ କାର୍ଯ୍ୟରେ ଲିପ୍ତ ରହିଥିବା ନେଇ ଖବର ପ୍ରକାଶ ପାଉଛି। ଏଭଳି ସ୍ଥଳେ ଭାରତର ବହିର୍ବ୍ୟାପାର ମନ୍ତ୍ରଣାଳୟ ସେହି ପ୍ରସଙ୍ଗକୁ ଠିକ୍ ଭାବେ ପରିଚାଳନା କରିପାରୁ ନ ଥିବାରୁ ବିଷମ ସ୍ଥିତି ଉପୁଜୁଛି। କାନାଡ଼ା ପ୍ରଧାନମନ୍ତ୍ରୀ ଟ୍ରୁଡୋ ଯେତେବେଳେ ନିଜ୍ଜାରଙ୍କ ହତ୍ୟା ପଛରେ ଭାରତୀୟଙ୍କ ହାତ ରହିଛି ବୋଲି କହିଥିଲେ, ସେତେବେଳେ ଭାରତ ପ୍ରତିବାଦ କରିଥିଲା। କିନ୍ତୁ ପରବର୍ତ୍ତୀ ସମୟରେ କାନାଡ଼ା ସମେତ ଆମେରିକା, ବ୍ରିଟେନ୍, ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡର ମିଳିତ ଗୋଇନ୍ଦା ସଂସ୍ଥା ‘ଫାଇଭ୍ ଆଇଜ୍’ରୁ କାନାଡ଼ା ପାଇଥିବା ତଥ୍ୟ ଅନୁଯାୟୀ ନିଜ୍ଜାରଙ୍କ ହତ୍ୟା ପଛରେ ଭାରତର ହାତ ଥିବା ସଂକ୍ରାନ୍ତ ବଳିଷ୍ଠ ପ୍ରମାଣ ବିଷୟ ଉଲ୍ଲେଖ କରିଥିଲା। ଟ୍ରୁଡୋଙ୍କ ଏଭଳି ଅଭିଯୋଗର କିଛି ମାସ ପରେ ଆମେରିକାର ନ୍ୟାୟ ବିଭାଗ ଅନ୍ୟ ଜଣେ ଖଲିସ୍ତାନୀ ବିଚ୍ଛିନ୍ନତାବାଦୀ ଗୁରପତ୍ଓ୍ବନ୍ତ ସିଂ ପନ୍ନୁଙ୍କୁ ସେହି ଦେଶ ମାଟିରେ ହତ୍ୟା କରିବା ଲାଗି ଜଣେ ଭାରତୀୟ ନାଗରିକ ଷଡ଼ଯନ୍ତ୍ର କରିଥିବା ବିଷୟ ଦର୍ଶାଇଥିଲା। ଦେଖିବାକୁ ଗଲେ ଭାରତ ତା’ର ସବୁ ଆଭ୍ୟନ୍ତରୀଣ ବିଷୟକୁ ‘ଜାତୀୟ ସୁରକ୍ଷା’ ଆଳରେ ଗୋପନୀୟ ରଖି ଜନସାଧାରଣଙ୍କୁ କୌଣସି ତଥ୍ୟ ଦେଉନାହିଁ। ଏପରିକି ଇଲେକ୍ଟୋରାଲ ବଣ୍ଡ୍ ବିଷୟକୁ ସୂଚନା ଅଧିକାର ଆଇନ ବହିଭୂର୍ର୍ତ ରଖାଯିବା ଫଳରେ ସୁପ୍ରିମ୍କୋର୍ଟଙ୍କ ଦ୍ୱାରସ୍ଥ ହୋଇ କେତେକ ନାଗରିକ ସେହି ତଥ୍ୟ ପାଇପାରିଲେ। ଅପରପକ୍ଷେ ଭାରତ ସରକାର ପ୍ରତ୍ୟେକ କଥାରେ କାନାଡ଼ା ଭଳି ବିଦେଶୀ ସରକାରଙ୍କୁ ତଥ୍ୟ ମାଗୁଥିବା ହେତୁ ସେମାନେ ତଥ୍ୟ ଦେବାକୁ ଅରାଜି ହେଉଥିବା ଯଥାର୍ଥ ମନେହେଉଛି।
ଭାରତ ଅଭିଯୋଗ କରୁଛି ଯେ, କାନାଡ଼ାରେ ଟ୍ରୁଡୋଙ୍କ ରାଜନୈତିକ ଦଳ ଲୋକପ୍ରିୟତା ହରାଇ ବସିଥିବାରୁ ଶିଖ୍ମାନଙ୍କ ଭୋଟ ହାତେଇବା ପାଇଁ ସେ ଏଭଳି ଭେଳିକି ଦେଖାଉଛନ୍ତି। ରାଜନୈତିକ ଚଷମାରେ ଦେଖିବାକୁ ଗଲେ ଭାରତର ଶାସକ ଦଳ ମଧ୍ୟ ବିଭିନ୍ନ କୌଶଳ ବ୍ୟବହାର କରି ଭୋଟ ହାତେଇବାର ଉଦ୍ୟମ କରୁଥିବା ଦେଖାଯାଉଛି। ତେଣୁ ଏହା ହେଉଛି ଗଣତନ୍ତ୍ରର ବିଶେଷତା। କାନାଡ଼ାର ଟ୍ରୁଡୋଙ୍କ ଦଳ ଯଦି ଶିଖ୍ ଭୋଟ ଟାଣିବାକୁ ଚେଷ୍ଟା କରୁଛି ତେବେ ତାହା କୌଣସି ମତେ ଖୁଣି ହେବ ନାହିଁ।
ଭାରତ ଅଭିଯୋଗ କରୁଛି ଯେ, କାନାଡ଼ାରେ ଟ୍ରୁଡୋଙ୍କ ରାଜନୈତିକ ଦଳ ଲୋକପ୍ରିୟତା ହରାଇ ବସିଥିବାରୁ ଶିଖ୍ମାନଙ୍କ ଭୋଟ ହାତେଇବା ପାଇଁ ସେ ଏଭଳି ଭେଳିକି ଦେଖାଉଛନ୍ତି। ରାଜନୈତିକ ଚଷମାରେ ଦେଖିବାକୁ ଗଲେ ଭାରତର ଶାସକ ଦଳ ମଧ୍ୟ ବିଭିନ୍ନ କୌଶଳ ବ୍ୟବହାର କରି ଭୋଟ ହାତେଇବାର ଉଦ୍ୟମ କରୁଥିବା ଦେଖାଯାଉଛି। ତେଣୁ ଏହା ହେଉଛି ଗଣତନ୍ତ୍ରର ବିଶେଷତା। କାନାଡ଼ାର ଟ୍ରୁଡୋଙ୍କ ଦଳ ଯଦି ଶିଖ୍ ଭୋଟ ଟାଣିବାକୁ ଚେଷ୍ଟା କରୁଛି ତେବେ ତାହା କୌଣସି ମତେ ଖୁଣି ହେବ ନାହିଁ ।