ନବରଙ୍ଗପୁର,୨୯।୧୧(ସଦାଶିବ ପ୍ରହରାଜ):ନବରଙ୍ଗପୁର ଜିଲା କୋଷାଗୁମୁଡ଼ା ବ୍ଲକ୍ କୋକଡ଼ି ସେମଲା ଆଶ୍ରମ ବିଦ୍ୟାଳୟ ହଷ୍ଟେଲ ରୋଷେଇଘରେ ଗତ ୨୦ ତାରିଖରେ ପ୍ରେସରକୁକର ଫାଟି ସପ୍ତମ ଶ୍ରେଣୀ ଛାତ୍ର ଧନେଶ୍ୱର ଭତ୍ରାଙ୍କ ମୁହଁ କ୍ଷତିବିକ୍ଷକ୍ତ ହୋଇଥିଲା। ସ୍କୁଲ ଓ ହଷ୍ଟେଲ କର୍ତ୍ତୃପକ୍ଷ ତାଙ୍କୁ ଡାକ୍ତରଖାନା ନ ନେଇ ହଷ୍ଟେଲ ଭିତରେ ଦୀର୍ଘ ୯ ଦିନ ଧରି ତାଲା ପକାଇ ରଖିଥିଲେ। ତେବେ ଶୁକ୍ରବାର କୌଣସି ସୂତ୍ରରୁ ଖବର ପାଇ ନବରଙ୍ଗପୁର ପୂର୍ବତନ ଏମ୍ପି ତଥା ବିଜେଡି ବରିଷ୍ଠ ସାଧାରଣ ସମ୍ପାଦକ ପ୍ରଦୀପ ମାଝୀ ହଷ୍ଟେଲ ପାଚେରି ଡେଇଁ ତାଙ୍କୁ ଉଦ୍ଧାର କରିଥିଲେ। ଏଥିସହ ରାତି ୧୦ଟାରେ ଜିଲାପାଳଙ୍କ ଆବାସିକ କାର୍ଯ୍ୟାଳୟକୁ ଆସି ଛାତ୍ରଙ୍କୁ ଜିଲାପାଳଙ୍କୁ ହସ୍ତାନ୍ତର କରିଥିଲେ। ଗଣଶିକ୍ଷା ବିଭାଗ ପକ୍ଷରୁ ବିଦ୍ୟାଳୟ ଓ ମଙ୍ଗଳ ବିଭାଗ ପକ୍ଷରୁ ହଷ୍ଟେଲ ପରିଚାଳନା ହେଉଥିବା ବେଳେ ଏ ବିଷୟରେ କୌଣସି ଅଧିକାରୀ କିପରି ଜାଣିପାରିଲେ ନାହିଁ ବୋଲି ପ୍ରଦୀପ ପ୍ରଶ୍ନ କରିଥିଲେ। ଜିଲାପାଳ ମଧ୍ୟ ସମାନ ପରିମାଣର ଦାୟୀ ବୋଲି ପ୍ରଦୀପ ତାଙ୍କୁ ସିଧାସଳଖ କହିଥିଲେ। ଜିଲାପାଳଙ୍କ ନିର୍ଦ୍ଦେଶକ୍ରମେ ଏହି ଘଟଣାରେ ରାତିଅଧିଆ ବିଦ୍ୟାଳୟ ପ୍ରଧାନ ଶିକ୍ଷକ କାଙ୍ଗାଳି ଚରଣ ସେଠୀ ଓ ହଷ୍ଟେଲ ପରିଚାଳକ କପିଲ ସରାବୁଙ୍କୁ କୋଷାଗୁମୁଡ଼ା ବିଇଓ ନିଲମ୍ବିତ କରିଛନ୍ତି। ପିଏଆଇଟିଡି ରାଜୀବ କୁମାର ସାହୁ ହଷ୍ଟେଲ ରୋଷେୟା ଡମ୍ବରୁ ଭତରାକୁ କର୍ଯ୍ୟଚ୍ୟୁତ କରିଛନ୍ତି । ଜିଲାପାଳ ଏହି ଘଟଣା ସମ୍ପର୍କରେ ଶିକ୍ଷା ଓ ମଙ୍ଗଳ ବିଭାଗକୁ ନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ରଖିଛନ୍ତି । ବାରମ୍ବାର ବିଦ୍ୟାଳୟ ଓ ହଷ୍ଟେଲ ମାନଙ୍କରେ ଛାତ୍ରୀଛାତ୍ର କୌଣସି କାରଣରୁ ସ୍ବାସ୍ଥ୍ୟ ଖରାପ ହେବ ଓ ଆହତ ହେଲେ ତୁରନ୍ତ ଚିକିତ୍ସା କରାଇବା ଓ ଅଧିକାରୀଙ୍କୁ ଜଣାଇବା ପାଇଁ ଜିଲ୍ଲାପାଳ, ଜିଲା ଶିକ୍ଷା ଅଧିକାରୀ ଓ ଜିଲା ମଙ୍ଗଳ ଅଧିକାରୀ ନିର୍ଦ୍ଦେଶ ଦେବା ସତ୍ତ୍ୱେ ଏହିଭଳି ଘଟଣାଗୁଡ଼ିକ ଘଟୁଛି । ଏନେଇ ଜିଲାପାଳ ବିରକ୍ତି ଭାବ ମଧ୍ୟ ପ୍ରକାଶ କରିଛନ୍ତି।
ସୂଚନାଯୋଗ୍ୟ, ଛାତ୍ରଙ୍କୁ ଚିକିତ୍ସା ନ କରି ୯ ଦିନ କାଳ ବନ୍ଦ ରଖି ହତ୍ୟା ଉଦ୍ୟମ କରାଯାଇଛି ବୋଲି ପ୍ରଦୀପ କହିଛନ୍ତି। ଧନେଶ୍ୱରଙ୍କର କୌଣସି କ୍ଷତି ହେଲେ ଜିଲାରେ ଆନ୍ଦୋଳନ ହେବ ବୋଲି ସେ କହିଛନ୍ତି। ଏଥିସହ ଘଟଣାସ୍ଥଳରେ ଉପସ୍ଥିତ ଥିବା ଜିଲା ମଙ୍ଗଳ ଅଧିକାରୀ ପାଲକା ରବୀନ୍ଦ୍ରଙ୍କୁ ଏଥିପାଇଁ ଦାୟୀ କରିବା ସହ ଧନେଶ୍ୱରଙ୍କ କ୍ଷତି ହେଲେ ଫାୟାରିଂ କରିଦେବେ ବୋଲି ପ୍ରଦୀପ କହିଛନ୍ତି। ତେବେ ପ୍ରଧାନଶିକ୍ଷକ ଏଯାଏ ଘଟଣା ସମ୍ପର୍କରେ ଅବଗତକରି ନାହାନ୍ତି ବୋଲି ମଙ୍ଗଳ ଅଧିକାରୀ କହିଛନ୍ତି। ଏନେଇ ଜିଲାପାଳ ମହେଶ୍ବର ସ୍ବାଇଁ କହିଛନ୍ତି, ଘଟଣା ଜଣାପଡିବା ପରେ ଡିଇଓ ଏବଂ ଜିଲା ମଙ୍ଗଳ ଅଧିକାରୀଙ୍କୁ ଡକାଯାଇଛି। ଘଟଣାର ତଦନ୍ତ ହେବ। ଛାତ୍ର ଜଣକ କେଉଁ ପରିସ୍ଥିତିରେ ରୋଷେଇଘରକୁ ଯାଇଥିଲେ, ପ୍ରଧାନ ଶିକ୍ଷକ କାହିଁକି ଜଣାଇ ନ ଥିଲେ ତାହାର ତଦନ୍ତ ସହ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅତିରିକ୍ତ ଜିଲାପାଳ ବିଶ୍ୱଜିତ ବର୍ମନ ଛାତ୍ରଙ୍କୁ ଚିକିତ୍ସା ପାଇଁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତିକରିଛନ୍ତି। ଘଟଣାସ୍ଥଳରେ ଡିଇଓ ଛତ୍ରପତି ସାହୁ, ବିଜ୍ଞାନ ପରିଦର୍ଶକ ଚିତ୍ତରଞ୍ଜନ ପଟ୍ଟନାୟକ, ପୋଲିସ ଏସ୍ଆଇ ସବିର ଅହମ୍ମଦ, ଏଏସ୍ଆଇ ତୁଳସୀରାମ ପୂଜାରୀ, ଶିବଶଙ୍କର ସ୍ବାଇଁ, ବିଜେଡି ନଗର ସଭାପତି ପ୍ରମୋଦ ରଥ, ସୂର୍ଯ୍ୟକାନ୍ତ ଲେଙ୍କା, ସଞ୍ଜୟ ନାୟକ, କୁନା ପାଢ଼ୀ, ସନୁଜ ତ୍ରିପାଠୀ, ରାମ ମହାପାତ୍ର, ଶୁଭ୍ରାଂଶୁ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।
ଛାତ୍ର ଜଣକ କହିଛନ୍ତି,ତାଙ୍କ ବାପା ନାହାନ୍ତି। ସେ ଗୁରୁତର ଆହତ ହେବା ପରେ ମଧ୍ୟ ଚିକିତ୍ସା କରି ରଖିଥିଲେ। ଜିଲା ମଙ୍ଗଳ ଅଧିକାରୀ ପାଲକା ରବୀନ୍ଦ୍ର କହିଛନ୍ତି ଏହି ବିଦ୍ୟାଳୟ ଶିକ୍ଷା ବିଭାଗ ପକ୍ଷରୁ ପରିଚାଳିତ, ହଷ୍ଟେଲ ମଙ୍ଗଳ ବିଭାଗ ପକ୍ଷରୁ ପରିଚାଳିତ ହେଉଛି । ତେବେ ପ୍ରଧାନ ଶିକ୍ଷକ ଏଯାଏ ଛାତ୍ର ଗୁରୁତର କଥା କହି ନ ଥିଲେ। ଏବେ ଖବର ପାଇଛୁ । ପ୍ରଦୀପ ମାଝୀ ଫାୟରିଂ କରିଦେବି ବୋଲି ଯେଉଁ କଥା କହିଲେ ସେଥିରେ ମୁଁ କୌଣସି ଟିପ୍ପଣୀ ଦେଇ ପାରିବି ନାହିଁ ବୋଲି କହିଛନ୍ତି।