କେସିଙ୍ଗା,୨୮।୩(ତୁମେଶ୍ୱର ସାହୁ): ସମ୍ବଲପୁର ରେଳ ପ୍ରବନ୍ଧକ କେସିଙ୍ଗା ରେଳ ଷ୍ଟେଶନକୁ ଶନିବାର ପରିଦର୍ଶନ କରି ଷ୍ଟେଶନର ବିଭିନ୍ନ ସମସ୍ୟା ଉପରେ ତଦନ୍ତ କରିଥିଲେ। ଏହି ଷ୍ଟେଶନରେ ଯାତ୍ରୀଙ୍କ ପାଇଁ ବିଶେଷ ସୁବିଧା ନ ଥିବାରୁ ଯାତ୍ରୀମାନେ ବହୁତ ହଇରାଣ ହେଉଛନ୍ତି। ରେଳ ଷ୍ଟେଶନରେ ଥିବା ୧,୨ ପ୍ଲାଟ ଫର୍ମରେ ଭଲ ଶୌଚାଳୟ ନାହିଁ ଏବଂ ୩,୪ରେ ଶୌଚାଳୟ ନାହିଁ। ଏଥିପାଇଁ ଯାତ୍ରୀମାନେ ବହୁତ ହଇରାଣ ହେଉଛନ୍ତି। ଯାତ୍ରୀଙ୍କ ପାଇଁ ପାନୀୟ ଜଳର ସୁବିଧା ନାହିଁ। କେସିଙ୍ଗା ରେଳ ଷ୍ଟେଶନକୁ ଗତ ୨୦୨୪ରେ ଅମୃତ ଭାରତ ରେଳ ଷ୍ଟେଶନ ତାଲିକାରେ ସାମିଲ କରି ପ୍ରଥମ ପର୍ଯ୍ୟାୟରେ ପ୍ରାୟ ୨୦ କୋଟି ଟଙ୍କା ବ୍ୟୟରେ ଷ୍ଟେଶନର ବାଡା,ଟିକେଟ କାଉଣ୍ଟର, ମୁଖ୍ୟ ଗେଟ, ଶେଡ଼, ନୂତନ ଶିଡି, ଇତ୍ୟାଦି ନିର୍ମାଣାଧୀନ ରହିଛି। ଷ୍ଟେଶନର ସମସ୍ୟା ଉପରେ ଅନେକ ସମୟରେ ବିଭିନ୍ନ ଗଣମାଧ୍ୟମରେ ଷ୍ଟେଶନର ନବୀକରଣ କାମ ଠିକ ହେଉନାହିଁ, ମନ୍ଥର ଗତିରେ ଚାଲିଛି। ଏମିତି ଅନେକ ସମସ୍ୟା ଉପରେ ଖବର ପ୍ରସାରଣ ପରେ ଶନିବାର ସମ୍ବଲପୁର ରେଳ ମଣ୍ଡଳ ପ୍ରବନ୍ଧକ ସୁବାସ ଚନ୍ଦ୍ର ଚୌଧୁରୀ ଓ ବରିଷ୍ଠ ମଣ୍ଡଳ ବାଣିଜ୍ୟକ ପ୍ରବନ୍ଧକ ଗରିମା ଚୌଧୁରୀ ଅମୃତ ଭାରତ ଷ୍ଟେଶନର କାମ ଓ ଅନ୍ୟାନ୍ୟ ସମସ୍ୟା ଉପରେ ବିଭିନ୍ନ ପ୍ରକଳ୍ପର ନିରୀକ୍ଷଣ କରିଥିଲେ। ଡିଆରଏମ ଆସିବେ ବୋଲି ବାକି ଦିନ ଅପେକ୍ଷା ଶୁକ୍ରବାର ଦିନ କେସିଙ୍ଗା ରେଳ ଷ୍ଟେଶନକୁ ସୁନ୍ଦର ଭାବରେ ସଫା ସୁତୁରା କରାଯିବା ସହିତ ପ୍ଲାଟଫର୍ମଗୁଡ଼ାକୁ ଚକାଚକ କରାଯାଇଥିଲା। ଡିଆରଏମ ଶ୍ରୀ ଚୌଧୁରୀ ୧୫ ଦିନ ମଧ୍ୟରେ ସମସ୍ତ ଛୋଟ ଛୋଟ ସମସ୍ୟାକୁ ସମାଧାନ କରାଯିବା ସହିତ ଆଗକୁ କେସିଙ୍ଗା ଷ୍ଟେଶନର ସମସ୍ତ ସମସ୍ୟା ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।