ଭୁବନେଶ୍ୱର,୧୩।୧୧: ଆଇପିଏଲ୍ ୨୦୨୬ ପାଇଁ ଖେଳାଳି ରିଟେନ୍ସନ୍ର ଡେଡ୍ଲାଇନ୍ (ନଭେମ୍ବର ୧୫) ପାଖେଇ ଆସୁଥିବା ବେଳେ, ମୁମ୍ବାଇ ଇଣ୍ଡିଆନ୍ସ (MI) ଶିବିରରୁ ଏକ ବଡ଼ ଖବର ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକରଙ୍କୁ ମୁମ୍ବାଇ ଇଣ୍ଡିଆନ୍ସ ଛାଡ଼ିପାରେ।
‘କ୍ରିକବଜ୍’ ରିପୋର୍ଟ ଅନୁସାରେ, ମୁମ୍ବାଇ ଇଣ୍ଡିଆନ୍ସ ଏବଂ ଲକ୍ଷ୍ନୌ ସୁପର ଜାଏଣ୍ଟ୍ସ (LSG) ମଧ୍ୟରେ ଅର୍ଜୁନ ତେନ୍ଦୁଲକର ଏବଂ ଅଲରାଉଣ୍ଡର ଶାର୍ଦ୍ଦୁଲ ଠାକୁରଙ୍କୁ ନେଇ ଆଲୋଚନା ଚାଲିଛି।
ତେବେ ଏହା ସିଧାସଳଖ ଖେଳାଳି ଅଦଳବଦଳ ନ ହୋଇ, ଉଭୟ ଖେଳାଳିଙ୍କୁ ନଗଦ ଅର୍ଥ ମାଧ୍ୟମରେ ନେବା ପାଇଁ ଦଳଗୁଡ଼ିକ ଚାହୁଁଛନ୍ତି। ଅର୍ଜୁନ ତେନ୍ଦୁଲକର ୨୦୨୩ରେ ଆଇପିଏଲ୍ରେ ଡେବ୍ୟୁ କରିବା ପରଠାରୁ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ମାତ୍ର ୫ଟି ମ୍ୟାଚ୍ ଖେଳି ୩ଟି ୱିକେଟ୍ ନେଇଛନ୍ତି। ଆଇପିଏଲ୍ ୨୦୨୫ର ମେଗା ଅକ୍ସନରେ ତାଙ୍କୁ ମୁମ୍ବାଇ ୩୦ ଲକ୍ଷ ଟଙ୍କାରେ କିଣିଥିଲା।
ଶାର୍ଦ୍ଦୁଲ ଠାକୁରଙ୍କୁ ଆଇପିଏଲ୍ ୨୦୨୫ ନିଲାମରେ କୌଣସି ଦଳ କିଣି ନଥିଲେ, କିନ୍ତୁ ପରେ ସେ ଆହତ ମୋହସିନ ଖାନଙ୍କ ବଦଳରେ LSG ଦଳରେ ସାମିଲ ହୋଇଥିଲେ। ସେ LSG ପାଇଁ ୧୦ଟି ମ୍ୟାଚ୍ ଖେଳି ୧୩ଟି ୱିକେଟ୍ ନେଇଥିଲେ। ନଭେମ୍ବର ୧୫ ରେ ରିଟେନସନ୍ ତାଲିକା ଜମା ହେବା ପରେ ଏହି ‘ଟ୍ରେଡ୍’ର ଚୂଡ଼ାନ୍ତ ନିଷ୍ପତ୍ତି ସାମ୍ନାକୁ ଆସିବ।