ମୁମ୍ବାଇ,୨୬।୬: ଭାରତୀୟ କ୍ରିକେଟରେ ପ୍ରତିଭାବାନ ଓପନର ପୃଥ୍ୱୀ ଶ’ଙ୍କ କ୍ୟାରିଅର ବିଗତ କିଛି ବର୍ଷରେ ନାଟକୀୟ ଭାବେ ହ୍ରାସ ପାଇଛି। ୨୦୨୪-୨୫ ସିଜନରେ ତାଙ୍କୁ ମୁମ୍ବାଇର ଘରୋଇ ଦଳରୁ ବାଦ ଦିଆଯାଇଥିଲା ଏବଂ ଆଇପିଏଲ ୨୦୨୫ର ମେଗା ନିଲାମରେ ମଧ୍ୟ ସେ ବିକ୍ରି ହୋଇ ନଥିଲେ। ତଥାପି, ଏହି ସମସ୍ତ ପ୍ରତିକୂଳତା ମଧ୍ୟରେ ପୃଥ୍ୱୀ ଖୁଲାସା କରିଛନ୍ତି ଯେ ଭାରତୀୟ କ୍ରିକେଟର ମହାନାୟକ ସଚିନ ତେନ୍ଦୁଲକର ତାଙ୍କ ପ୍ରତି ବିଶ୍ୱାସ ରଖିଛନ୍ତି ଏବଂ ତାଙ୍କୁ ପୁନରାଗମନ କରିବାରେ ପ୍ରେରଣା ଦେଉଛନ୍ତି।
ଏକ ସାକ୍ଷାତକାରରେ ପୃଥ୍ୱୀ କହିଛନ୍ତି, “ମୋର ବାପା ମୋର ସବୁଠାରୁ ବଡ଼ ସମର୍ଥକ, କିନ୍ତୁ ତାଙ୍କ ପରେ ସଚିନ ସାର ଅନେକ କିଛି ଜାଣନ୍ତି। ମୁଁ ଓ ଅର୍ଜୁନ (ସଚିନଙ୍କ ପୁଅ) ୮ କିମ୍ବା ୯ ବର୍ଷ ବୟସରୁ ବନ୍ଧୁ। ସାର ମଧ୍ୟ ସେତେବେଳେ ଥାଆନ୍ତି। ସେ ମୋତେ ଦେଖିଛନ୍ତି।”
ପୃଥ୍ୱୀ ପ୍ରକାଶ କରିଛନ୍ତି ଯେ ମାତ୍ର ଦୁଇ ମାସ ପୂର୍ବେ ସଚିନ ଇଣ୍ଟରନ୍ୟାସନାଲ ମାଷ୍ଟର୍ସ ଲିଗ ପାଇଁ ଏମଆଇଜିରେ ଅଭ୍ୟାସ କରୁଥିବା ବେଳେ ସେ ମଧ୍ୟ ସେଠାରେ ଥାଆନ୍ତି। “ଏପରି ସମୟରେ ଜଣେ ମେଣ୍ଟର ଦରକାର, ଯିଏ ପ୍ରେରଣାର ଏକ ସାହାସ ଦେଇପାରେ,” ବୋଲି ସେ କହିଛନ୍ତି।
ସଚିନ ତାଙ୍କୁ ନିରନ୍ତର ପରାମର୍ଶ ଦେଉଛନ୍ତି ଏବଂ ତାଙ୍କ ଉପରେ ବିଶ୍ୱାସ ରଖିଛନ୍ତି। ପୃଥ୍ୱୀ କହିଛନ୍ତି, “ସେ ଏବେ ମଧ୍ୟ ମୋ ଉପରେ ବିଶ୍ୱାସ ରଖନ୍ତି। ‘ପୃଥ୍ୱୀ, ମୋର ବିଶ୍ୱାସ ଅଛି ଏବଂ ମୁଁ ବିଶ୍ୱାସ ରଖିବି।’ ସେ ମୋତେ ଦେଖିଛନ୍ତି। ତାଙ୍କର ଭରସା ଅଛି। ‘ଟ୍ରାକକୁ ଫେରି ଆସ। ସବୁ ସମ୍ଭବ।’ ଏହି ବିଶ୍ୱାସ ମୋ ପାଇଁ ବହୁତ ମୂଲ୍ୟବାନ। ମୋ ବାପା ଓ କିଛି ବନ୍ଧୁଙ୍କ ପରି ସେ ମଧ୍ୟ ବିଶ୍ୱାସ କରନ୍ତି।”