କଲମ୍ବୋ,୧୫।୨: ରୁଷିଆରୁ ତେଲ ଆମଦାନୀକୁ ନେଇ ଆମେରିକା ଏବଂ ଭାରତ ମଧ୍ୟରେ ପୁଣି ଥରେ କୂଟନୈତିକ ବାକ୍ଯୁଦ୍ଧ ଦେଖିବାକୁ ମିଳିଛି। ଜର୍ମାନୀରେ ଅନୁଷ୍ଠିତ ମ୍ୟୁନିକ୍ ସୁରକ୍ଷା ସମ୍ମିଳନୀରେ ଆମେରିକା ବିଦେଶ ମନ୍ତ୍ରୀ ମାର୍କୋ ରୁବିଓଙ୍କ ଦାବିକୁ ଖଣ୍ଡନ କରି ଭାରତୀୟ ବିଦେଶ ମନ୍ତ୍ରୀ ଏସ୍. ଜୟଶଙ୍କର ଦେଶର ‘ରଣନୈତିକ ସ୍ୱାଧୀନତା’ ଉପରେ ଗୁରୁତ୍ୱାରୋପ କରିଛନ୍ତି।
ଆମେରିକା ବିଦେଶ ମନ୍ତ୍ରୀ ରୁବିଓ ଦାବି କରିଥିଲେ ଯେ, ରୁଷିଆରୁ ଅଧିକ ତେଲ ନ କିଣିବା ପାଇଁ ଭାରତ ୱାଶିଂଟନକୁ ପ୍ରତିଶ୍ରୁତି ଦେଇଛି। ୟୁକ୍ରେନ ଯୁଦ୍ଧ ଯୋଗୁଁ ରୁଷିଆ ଉପରେ ଆର୍ଥିକ ଚାପ ପକାଇବାକୁ ଆମେରିକା ଏଭଳି ପଦକ୍ଷେପ ନେଉଥିବା ସେ କହିଥିଲେ।
ରୁବିଓଙ୍କ ବୟାନର କିଛି ସମୟ ପରେ ଜୟଶଙ୍କର କହିଥିଲେ ଯେ, ଭାରତ ନିଜର ଜାତୀୟ ସ୍ୱାର୍ଥ ଅନୁଯାୟୀ ନିଷ୍ପତ୍ତି ନେବାକୁ ସମ୍ପୂର୍ଣ୍ଣ ସ୍ୱାଧୀନ। ସେ କହିଛନ୍ତି, “ଭାରତର ତେଲ କମ୍ପାନୀଗୁଡ଼ିକ ତେଲର ଉପଲବ୍ଧତା, ଦର ଏବଂ ବିପଦକୁ ଦେଖି ନିଜ ସୁବିଧା ଅନୁସାରେ ନିଷ୍ପତ୍ତି ନେବେ। ଏଥିପାଇଁ କୌଣସି ବାହ୍ୟ ଚାପକୁ ଗ୍ରହଣ କରାଯିବ ନାହିଁ।”
ସୂଚନାଯୋଗ୍ୟ ଯେ, ରୁଷିଆରୁ ତେଲ କିଣିବା ଯୋଗୁଁ ଟ୍ରମ୍ପ ପ୍ରଶାସନ ଭାରତୀୟ ସାମଗ୍ରୀ ଉପରେ ଲଗାଇଥିବା ୨୫% ଅତିରିକ୍ତ ଟାରିଫ୍ କୁ ନିକଟରେ ହଟାଇ ଦେଇଛନ୍ତି। କିନ୍ତୁ ଏଥିସହ ସର୍ତ୍ତ ରହିଛି ଯେ, ଯଦି ଭାରତ ପୁଣି ରୁଷରୁ ତେଲ ଆମଦାନୀ ବଢ଼ାଏ, ତେବେ ଏହି ଦଣ୍ଡମୂଳକ ଶୁଳ୍କ ପୁନର୍ବାର ଲାଗୁ କରାଯାଇପାରେ।
ବିଦେଶ ମନ୍ତ୍ରୀ ସ୍ପଷ୍ଟ କରିଛନ୍ତି ଯେ ଭାରତର ନିଷ୍ପତ୍ତି ପାଶ୍ଚାତ୍ୟ ଚିନ୍ତାଧାରା ସହ ସମାନ ନହୋଇପାରେ। ଭାରତ ନିଜର ଶକ୍ତି ସୁରକ୍ଷାକୁ ସର୍ବଦା ପ୍ରାଥମିକତା ଦେବ।