ଓ୍ବାଶିଂଟନ୍,୨୦।୮: ଯୁଦ୍ଧ ସମାପ୍ତ କରିବା ପାଇଁ ରୁଷିଆ ଏବଂ ୟୁକ୍ରେନ ଉଭୟ ପ୍ରୟାସ କରୁଛନ୍ତି। ଟ୍ରମ୍ପ-ଜେଲେନସ୍କି ବୈଠକ ପରେ, ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ମଙ୍ଗଳବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଫୋନରେ କଥାବାର୍ତ୍ତା କରିଥିଲେ। ରିପୋର୍ଟ ଅନୁଯାୟୀ, ପୁଟିନ ରୁଷିଆରେ ଜେଲେନସ୍କିଙ୍କୁ ଭେଟିବାକୁ ପ୍ରସ୍ତାବ ଦେଇଥିଲେ। ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏବଂ ୟୁରୋପୀୟ ନେତାମାନଙ୍କର ଏକ ପ୍ରତିନିଧିମଣ୍ଡଳ ଟ୍ରମ୍ପଙ୍କୁ ଭେଟିବା ପାଇଁ ୱାଶିଂଟନରେ ପହଞ୍ଚିବା ପରେ ଏହି ପ୍ରସ୍ତାବ ଦିଆଯାଇଥିଲା।
ଏହି ବିଷୟ ସହିତ ଜଡିତ ପ୍ରାସଙ୍ଗିକ ସୂତ୍ର ସ୍ପଷ୍ଟ କରିଛି ଯେ ପୁଟିନ-ଜେଲେନସ୍କି ବୈଠକ ସହ ଜଡିତ ଆଲୋଚନାକୁ ଗମ୍ଭୀରତାର ସହ ନିଆଯିବା ଉଚିତ୍ ନୁହେଁ। ଜଣେ ଅଧିକାରୀ କହିଛନ୍ତି ଯେ ଗତକାଲି ସମସ୍ତେ ଏହି ପରାମର୍ଶକୁ ପ୍ରତ୍ୟାଖ୍ୟାନ କରିଥିଲେ ଏବଂ ଏହାକୁ ଅଣଦେଖା କରିଥିଲେ, କିନ୍ତୁ ଆଜି ଗଣମାଧ୍ୟମ ଏହାକୁ ଏକ ବଡ଼ ପ୍ରସଙ୍ଗ କରୁଛି।
ହ୍ବାଇଟ ହାଉସ ପ୍ରେସ ସଚିବ କାରୋଲିନ ଲେଭିଟ ମଙ୍ଗଳବାର ଏକ ଖବର ସମ୍ମିଳନୀରେ ନିଶ୍ଚିତ କରିଛନ୍ତି ଯେ ପୁଟିନ ଏବଂ ଜେଲେନସ୍କିଙ୍କ ବୈଠକ ବିଷୟରେ ଆଲୋଚନା ଚାଲିଛି ଏବଂ ଅନେକ ବିକଳ୍ପ ବିଚାର କରାଯାଉଛି। ଲେଭିଟ କହିଛନ୍ତି ଯେ ଉଭୟ ନେତା ପରସ୍ପରକୁ ଭେଟିବାକୁ ଇଚ୍ଛା ପ୍ରକାଶ କରିଛନ୍ତି ଏବଂ ଆମର ଦଳ ଏହି ଦିଗରେ କାମ କରୁଛି। ଡୋନାଲ୍ଡ ଟ୍ରମ୍ପ ଆହୁରି ଆଗକୁ ଯାଇ ପୁଟିନ ଏବଂ ଜେଲେନ୍ସକିଙ୍କ ସହ ଏକ ତ୍ରିପାକ୍ଷିକ ଶିଖର ସମ୍ମିଳନୀର ଧାରଣା ରଖିଛନ୍ତି। ହ୍ବାଇଟ ହାଉସ ବୈଠକ ସମୟରେ, ଟ୍ରମ୍ପ ପୁଟିନଙ୍କ ସହ ଫୋନରେ କଥା ହୋଇଥିଲେ ଏବଂ ଉପସ୍ଥିତ ନେତାମାନଙ୍କୁ କହିଥିଲେ ଯେ ଏହି ବୈଠକ ପାଇଁ ପ୍ରସ୍ତୁତି ଆରମ୍ଭ ହୋଇଗଲାଣି।