ନୂଆଦିଲ୍ଲୀ,୨୩।୧୧: ଆଇପିଏଲ୍ ମେଗା ଅକ୍ସନ ଆରମ୍ଭ ହେବାକୁ ଆଉ କିଛି ଘଣ୍ଟା ବାକି। ଏହାପରେ ଅନେକ ଖେଳାଳିଙ୍କ ଭାଗ୍ୟର ଫଳାଫଳ ଆସିବ। ନଭେମ୍ବର ୨୪ରୁ ଆରମ୍ଭ ହେବାକୁ ଥିବା ଅକ୍ସନରେ ୫୭୭ଜଣ ଖେଳାଳିଙ୍କ ଉପରେ ନିଲାମ ଡ଼କାଯିବ। ହେଲେ କିଛି ଖେଳାଳିଙ୍କ ଉପରେ ସମସ୍ତଙ୍କ ନଜର ରହିବ। ସେଥିରେ ସବୁଠାରୁ ବଡ଼ ନାମ ହେଲା ଋଷଭ ପନ୍ତ। ଦିଲ୍ଲୀ କ୍ୟାପିଟାଲ୍ସର ପୂର୍ବତନ ଅଧିନାୟକ ସବୁଠାରୁ ମହଙ୍ଗା ଖେଳାଳି ହେବେ ବୋଲି ଅନୁମାନ କରାଯାଉଛି। ହେଲେ ଅକ୍ସନ ପୂର୍ବରୁ ପନ୍ତଙ୍କୁ ନେଇ ନିଲାମ ଡକା ଯାଇଛି। ପନ୍ତଙ୍କୁ ୩୩ କୋଟି ଟଙ୍କାରେ ପଞ୍ଜାବ କିଙ୍ଗ୍ସ କିଣିଛି। କେବଳ ଫରକ ଏତିକି ଯେ ଏହି ନିଲାମ ଏକ ମକ୍ ଅକ୍ସନ ଅର୍ଥାତ ନକଲି ଅକ୍ସନରେ ଲାଗିଛି।
ମେଗା ଅକ୍ସନରେ ପନ୍ତ, କେ ଏଲ୍ ରାହୁଲ, ଶ୍ରେୟାସ ଆୟାର ଭଳି ଖେଳାଳି ନଜର ଆସିବେ। ଏମାନେ ୨୦୨୪ ଆଇପିଏଲ୍ରେ ଅଧିନାୟକ ଥିଲେ। ଏଣୁ ଏମାନଙ୍କୁ ନେଇ ଉତ୍କଣ୍ଠା ବଢ଼ିଛି।
ମେଗା ଅକ୍ସନ ପୂର୍ବରୁ ଭିନ୍ନ ଭିନ୍ନ ପ୍ଲାଟଫର୍ମରେ ଅନେକ ପ୍ରକାର ମକ୍ ଅକ୍ସନ ଆୟୋଜିତ ହେଉଛି। ଏହି କ୍ରମରେ ନଭେମ୍ବର ୨୩ରେ ଜିଓ ସିନେମାରେ ଏକ ଏଭଳି ଅକ୍ସନ କରାଯାଥିଲା। ଏଥିରେ ସୁରେଶ ରାଇନା, ମାର୍କ ବାଉଚର, ରବିନ ଉତ୍ଥପା ପ୍ରମୁଖ ଖେଳାଳି ଫ୍ରାଞ୍ଚାଇଜ୍ ମୁଖ୍ୟ ଭାବେ ନଜର ଆସିଥିଲେ। ଏଥିରେ ପନ୍ତଙ୍କ ନାମ ଆସିବା ପରେ ଜୋରଦାର ନିଲାମ ଲାଗିଥିଲା। ଶେଷରେ ୩୩ କୋଟିରେ ସବୁଠାରୁ ବଡ଼ ନିଲାମ ଲାଗିଥିଲା। ପଞ୍ଜାବ ଟିମ୍ ତାଙ୍କୁ କିଣିଥିଲା।
ଏହା ମକ୍ ଅକ୍ସନ ଥିଲେ ହେଁ ମେଗା ଅକ୍ସନରେ ମଧ୍ୟ ଏଭଳି କିଛି ଦୃଶ୍ୟ ଦେଖିବାକୁ ମିଳିପାରେ ବୋଲି କହାଯାଉଛି। ପନ୍ତଙ୍କ ଭଳି କେ ଏଲ୍ ରାହୁଲଙ୍କୁ ମଧ୍ୟ ବଡ଼ ଦାମ ମିଳିବ ବୋଲି ଅନୁମାନ କରାଯାଉଛି। ସବୁର ଚିତ୍ର ରବିବାର ସ୍ପଷ୍ଟ ହୋଇଯିବ।