ମୁମ୍ବାଇ,୧୨।୨: ଭାରତର ଆର୍ଥିକ ପରିସଂଖ୍ୟାନ କ୍ଷେତ୍ରରେ ଏକ ବଡ଼ ପରିବର୍ତ୍ତନ କରାଯାଇଛି। ଉପଭୋକ୍ତା ମୂଲ୍ୟ ସୂଚକାଙ୍କ (CPI) ର ନୂଆ ବେସ୍ ଇୟର ୨୦୨୪ ଆଧାରରେ ପ୍ରଥମ ଥର ପାଇଁ ତଥ୍ୟ ପ୍ରକାଶ ପାଇଛି। ୨୦୨୬ ଜାନୁଆରୀ ମାସରେ ଦେଶର ଖୁଚୁରା ମୁଦ୍ରାସ୍ଫୀତି ହାର ୨.୭୫% ରେକର୍ଡ କରାଯାଇଛି। ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ଦ୍ୱାରା ଜାରି ଏହି ନୂତନ ପଦ୍ଧତି ଦେଶର ବର୍ତ୍ତମାନର ବ୍ୟୟ ପ୍ରଣାଳୀକୁ ଅଧିକ ସଠିକ ଭାବେ ଦର୍ଶାଉଛି।
ରିପୋର୍ଟ ଅନୁଯାୟୀ ଜାନୁଆରୀ ମାସରେ ଗ୍ରାମାଞ୍ଚଳରେ ମୁଦ୍ରାସ୍ଫୀତି ୨.୭୩% ଥିବାବେଳେ ସହରାଞ୍ଚଳରେ ଏହା ସାମାନ୍ୟ ଅଧିକ ଅର୍ଥାତ ୨.୭୭% ରହିଛି। ଏହି ସମୟରେ ଜାତୀୟ ସ୍ତରରେ ଖାଦ୍ୟ ମୁଦ୍ରାସ୍ଫୀତି ୨.୧୩% ରହିଛି। ସହରାଞ୍ଚଳରେ ଖାଦ୍ୟ ଦର ୨.୪୪% ବଢ଼ିଥିବା ବେଳେ ଗ୍ରାମାଞ୍ଚଳରେ ଏହା ୧.୯୬% ରହିଛି। ଗୃହ ନିର୍ମାଣ କ୍ଷେତ୍ରରେ ମୁଦ୍ରାସ୍ଫୀତି ୨.୦୫% ରହିଛି। ଗ୍ରାମାଞ୍ଚଳରେ ଏହା ୨.୩୯% ଏବଂ ସହରାଞ୍ଚଳରେ ୧.୯୨% ରେକର୍ଡ ହୋଇଛି।
ତେବେ ସରକାର CPI ର ବେସ୍ ଇୟରକୁ ୨୦୧୨ ରୁ ୨୦୨୪ କୁ ବଦଳାଇଛନ୍ତି। ଏହି ପରିବର୍ତ୍ତନ ଫଳରେ ଏବେ ୬ଟି ବଦଳରେ ୧୨ଟି ବିଭାଗରେ ଦ୍ରବ୍ୟଗୁଡ଼ିକୁ ଶ୍ରେଣୀଭୁକ୍ତ କରାଯାଇଛି। ଏହା ବର୍ତ୍ତମାନର ଆଧୁନିକ ଜୀବନଶୈଳୀ ଏବଂ ବଦଳୁଥିବା ଖର୍ଚ୍ଚ କରିବାର ଶୈଳୀକୁ ଗୁରୁତ୍ୱ ଦେଉଛି।
ନୂତନ ବାସ୍କେଟରେ ଆଧୁନିକ ଆବଶ୍ୟକତାକୁ ସ୍ଥାନ ଦିଆଯାଇଛି। ଏଥିରେ ଅନଲାଇନ୍ ମିଡିଆ ଏବଂ ଷ୍ଟ୍ରିମିଂ ସେବା (OTT), ଗ୍ରାମାଞ୍ଚଳ ଗୃହ ନିର୍ମାଣ, ଭାଲ୍ୟୁ-ଆଡେଡ୍ ଦୁଗ୍ଧଜାତ ଦ୍ରବ୍ୟ, ପେନ୍ ଡ୍ରାଇଭ୍, ଏକ୍ସଟର୍ନାଲ ହାର୍ଡ ଡିସ୍କ, ବେବିସିଟର ଏବଂ ବ୍ୟାୟାମ ଉପକରଣକୁ ସାମିଲ କରାଯାଇଛି। ସେହିପରି ଅଚଳ ହୋଇଯାଇଥିବା ଭିସିଆର (VCR), ଭିସିଡି/ଡିଭିଡି ପ୍ଲେୟାର, ରେଡିଓ, ଟେପ୍ ରେକର୍ଡର ଏବଂ ପୁରୁଣା ପୋଷାକକୁ ତାଲିକାରୁ ବାଦ୍ ଦିଆଯାଇଛି।
ମୁଦ୍ରାସ୍ଫୀତି ଗଣନାର ଏହି ନୂତନ ପ୍ରଣାଳୀ ନୀତି ନିର୍ଦ୍ଧାରକ ଏବଂ ଆର୍ଥିକ ପ୍ରତିଷ୍ଠାନଗୁଡ଼ିକୁ ବଜାରର ସଠିକ ସ୍ଥିତି ବୁଝିବାରେ ସାହାଯ୍ୟ କରିବ। ଖାଦ୍ୟ ଏବଂ ସାମଗ୍ରିକ ମୁଦ୍ରାସ୍ଫୀତି ନିୟନ୍ତ୍ରଣରେ ଥିବାରୁ ଏହା ଅର୍ଥନୀତି ପାଇଁ ଏକ ସକାରାତ୍ମକ ସଙ୍କେତ ବୋଲି କୁହାଯାଉଛି।