ଅହମଦାବାଦ, ୪।୬-ଦୀର୍ଘ ୧୮ ବର୍ଷ ପ୍ରତୀକ୍ଷାର ଅବସାନ ଘଟିଛି। ଇଣ୍ଡିଆନ ପ୍ରିମିୟର ଲିଗ୍ର ୧୮ତମ ସଂସ୍କରଣରେ ନୂଆ ଚାମ୍ପିୟନ ହୋଇଛି ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆର୍ସିବି)। ମଙ୍ଗଳବାର ଅନୁଷ୍ଠିତ ମେଗା ଫାଇନାଲରେ ଆର୍ସିବି ୬ ରନ୍ରେ ପଞ୍ଜାବ କିଙ୍ଗ୍ସକୁ ପରାସ୍ତ କରିଛି। ଏଥିସହ ଦୀର୍ଘ ୧୮ ବର୍ଷ ଧରି ଗୋଟିଏ ଫ୍ରାଞ୍ଚାଇଜ୍ ଦଳରୁ ଖେଳି ଆସୁଥିବା ବିରାଟ କୋହଲିଙ୍କ ସ୍ବପ୍ନ ସାକାର ହୋଇଛି। କୋହଲିଙ୍କ ଜର୍ସି ନମ୍ବର ୧୮। ତେଣୁ ୧୮ତମ ସଂସ୍କରଣ ଆର୍ସିବି ପାଇଁ ସ୍ମରଣୀୟ ହୋଇଯାଇଛି। କୌଣସି ବ୍ୟାଟର ଅର୍ଦ୍ଧଶତକ ହାସଲକରି ନ ଥିଲେ ହେଁ ଆର୍ସିବି ୨୦ ଓଭରରେ ୯ ଉଇକେଟ ହରାଇ ୧୯୦ ରନ ସଂଗ୍ରହ କରିଥିଲା। ୧୯୧ ରନ ବିଜୟ ଲକ୍ଷ୍ୟରେ ପଞ୍ଜାବ ୨୦ ଓଭରରେ ୭ ଉଇକେଟ ହରାଇ ୧୮୪ ରନରେ ସୀମିତ ରହିଥିଲା। ୬୧ ରନ୍ରେ ଅପରାଜିତ ରହିଥିବା ଶଶାଙ୍କ ସିଂ ଶେଷ ୪ ବଲ୍ରୁ ୨୨ ରନ୍ ସଂଗ୍ରହ କରିଥିଲେ ହେଁ ପଞ୍ଜାବ ୬ ରନ୍ ଦୂରରେ ରହିଯାଇଥିଲା। ୨୦୦୯, ୨୦୧୧ ଓ ୨୦୧୬ରେ ରନରଅପ୍ରେ ସନ୍ତୁଷ୍ଟ ହୋଇଥିବା ଆର୍ସିବି କିନ୍ତୁ ଏଥର ପିନ୍ଧିଛି ବିଜୟ ମୁକୁଟ। ଅନ୍ୟପକ୍ଷରେ ଦୀର୍ଘ ୧୧ ବର୍ଷ ପରେ ଫାଇନାଲରେ ପ୍ରବେଶ କରିଥିବା ପଞ୍ଜାବର ପ୍ରତୀକ୍ଷା ବଢ଼ିଛି। ଦଳର ଆରମ୍ଭ ଭଲ ହୋଇଥିଲେ ହେଁ ମିଡିଲ ଅର୍ଡର ବିଫଳତା ଯୋଗୁ ଇନିଂସ ଦିଗହରା ହୋଇ ଯାଇଥିଲା। ପ୍ରିୟାଂଶ ଆର୍ଯ୍ୟ (୨୪) ଓ ପ୍ରଭସିମରନ ସିଂ (୨୬) ଓପନିଂ ଯୋଡ଼ିରେ ୪୩ ରନ ସଂଗ୍ରହକରି ଭଲ ପ୍ଲାଟ୍ଫର୍ମ ପକାଇଥିଲେ। ଜୋସ୍ ଇଂଲିଶ୍ ମଧ୍ୟ ୨୩ ବଲ୍ରୁ ୩୯ ରନ କରି ଇନିଂସକୁ ଆଗେଇ ନେଇଥିଲେ। ମାତ୍ର ଅଧିନାୟକ ଶ୍ରେୟସ ଆୟର(୧), ନେହାଲ ଓ୍ବାଧେରା (୧୫), ମାର୍କୁସ ଷ୍ଟୋଇନିଂସ (୬) ଓ ଆଜମତୁଲ୍ଲା ଓମାରଜାଇ (୧)ଙ୍କ ବିଫଳତା ଦଳ ପାଇଁ ମହଙ୍ଗା ପଡ଼ିଥିଲା। ଶଶାଙ୍କ ୩୦ ବଲ୍ରୁ ୬୧ ରନରେ ଅପରାଜିତ ରହିଥିଲେ ହେଁ ତାହା ପର୍ଯ୍ୟପାପ୍ତ ହୋଇ ନ ଥିଲା। ଆର୍ସିବି ବୋଲରଙ୍କ ମଧ୍ୟରେ ଭୁବନେଶ୍ୱର କୁମାର ଓ କୃନାଲ ପାଣ୍ଡ୍ୟା ୨ଟି ଲେଖାଏ ଏବଂ ଜୋସ୍ ହାଜେଲଉଡ୍, ୟଶ ଦୟାଲ ଓ ରୋମାରିଓ ଶେଫର୍ଡ ଗୋଟିଏ ଲେଖାଏ ଉଇକେଟ ନେଇଥିଲେ।
ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲେ ପଞ୍ଜାବ ଅଧିନାୟକ ଶ୍ରେୟସ ଆୟର। ଆର୍ସିବିର ଆରମ୍ଭ ଭଲ ହୋଇ ନ ଥିଲା। ବିସ୍ଫୋରକ ଓପନର ଫିଲ୍ ସଲ୍ଟ ମାତ୍ର ୧୬ ରନକରି ଆଉଟ ହେବାରୁ ୧୮ ରନରେ ପ୍ରଥମ ଝଟକା ଖାଇଥିଲା ଆର୍ସିବି। ବିରାଟ କୋହଲି ଓ ମୟଙ୍କ ଅଗ୍ରଓ୍ବାଲ ଇନିଂସ ସଜାଡ଼ିବାକୁ ଉଦ୍ୟମ କରିଥିଲେ। ମାତ୍ର ଦ୍ୱିତୀୟ ଉଇକେଟରେ ୩୮ ରନ ଯୋଗ ହେବାପରେ ଅଗ୍ରଓ୍ବାଲ ୨୪ ରନକରି ଆଉଟ ହୋଇଯାଇଥିଲେ। କୌଣସି ଉଇକେଟରେ ବଡ଼ ଭାଗୀଦାରି ନ ହୋଇପାରିବାରୁ ଆର୍ସିବି ଆଶାନୁରୂପ ସ୍କୋର କରିପାରି ନ ଥିଲା। ମିଡିଲ ଅର୍ଡରରେ ସମସ୍ତ ବ୍ୟାଟର ଭଲ ଆରମ୍ଭ କରିଥିଲେ। ମାତ୍ର ତାହାକୁ କେହି ଜଣେ ହେଲେ ବଡ଼ ସ୍କୋରରେ ପରିଣତ କରିପାରି ନ ଥିଲେ। ପୂର୍ବ ମ୍ୟାଚଗୁଡ଼ିକ ଭଳି ଆଙ୍କର ଭୂମିକା ଗ୍ରହଣ କରିଥିବା କୋହଲି ଆକ୍ରମଣାତ୍ମକ ହୋଇ ଆସିବା ସମୟରେ ଆଉଟ ହୋଇ ଯାଇଥିଲେ। ସେ ୩୫ ବଲ୍ରୁ ୪୩ ରନ କରିଥିଲେ। ଅନ୍ୟମାନଙ୍କ ମଧ୍ୟରେ ଅଧିନାୟକ ରଜତ ପଟିଦାର ୧୬ ବଲ୍ରୁ ୨୬, ଲିଆମ ଲିଭିଂଷ୍ଟୋନ ୧୫ ବଲ୍ରୁ ୨୫, ଜୀତେଶ ଶର୍ମା ୧୦ ବଲ୍ରୁ ୨୪ ଓ ରୋମାରିଓ ଶେଫର୍ଡ ୯ ବଲ୍ରୁ ୧୭ ରନକରି ପ୍ୟାଭିଲିୟନ ଫେରିଥିଲେ। ଇନିଂସର ଶେଷ ଓଭରରେ ଅର୍ଶଦୀପ ସିଂ ମାତ୍ର ୩ ରନ ଦେଇ ୩ଟି ଉଇକେଟ ନେବାରୁ ଆର୍ସିବି ୧୯୦ରେ ସୀମିତ ରହିଯାଇଥିଲା। ଅନ୍ୟ ବୋଲରଙ୍କ ମଧ୍ୟରେ କାଏଲ ଜେମିସନ ୩ଟି ଏବଂ ଆଜମତୁଲ୍ଲା ଓମାରଜାଇ, ବିଜୟ କୁମାର ବ୍ୟଶକ ଓ ୟୁଜବେନ୍ଦ୍ର ଚହଲ ଗୋଟିଏ ଲେଖାଏ ଉଇକେଟ ନେଇଥିଲେ।
ଆଇପିଏଲ୍ ୨୦୨୫ ପୁରସ୍କାର ବିଜେତା
* ଚାମ୍ପିୟନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ: ୨୦ କୋଟି ଟଙ୍କା
* ରନରଅପ୍ ପଞ୍ଜାବ କିଙ୍ଗ୍ସ: ୧୨.୫ କୋଟି ଟଙ୍କା
* ତୃତୀୟ ଓ ଚତୁର୍ଥ ସ୍ଥାନ ଅଧିକାର କରିଥିବା ଦଳକୁ ଯଥାକ୍ରମେ ୭କୋଟି ଓ ୬.୫ କୋଟି ଲେଖାଏଁ।
* ଫେୟାର ପ୍ଲେ ଆଓ୍ବାର୍ଡ: ଚେନ୍ନାଇ ସୁପର କିଙ୍ଗ୍ସ।
ବ୍ୟକ୍ତିଗତ ସମ୍ମାନ
* ଅରେଞ୍ଜ କ୍ୟାପ୍: ସାଇ ସୁଦର୍ଶନ (୭୫୯ ରନ)।
* ପର୍ପଲ କ୍ୟାପ୍: ପ୍ରସିଦ୍ଧ କ୍ରିଷ୍ଣା (୨୫ ଉଇକେଟ)।
*ମୋଷ୍ଟ ଭ୍ୟାଲୁଏବଲ ପ୍ଲେୟର : ସୂର୍ଯ୍ୟକୁମାର ଯାଦବ।
* ଏମର୍ଜିଂ ପ୍ଲେୟର ଅଫ୍ ଦି ସିଜନ: ସାଇ ସୁଦର୍ଶନ।
* ଷ୍ଟ୍ରାଇକର ଅଫ୍ ଦି ସିଜନ: ବୈଭବ ସୂର୍ଯ୍ୟବଂଶୀ
* ଫାଣ୍ଟାସି ପ୍ଲେୟର ଅଫ୍ ଦି ସିଜନ: ସାଇ ସୁଦର୍ଶନ
* ସବୁଠାରୁ ଅଧିକ ଛକା: ନିକୋଲାସ ପୁରନ
* ସବୁଠାରୁ ଅଧିକ ଚୌକା: ସାଇ ସୁଦର୍ଶନ
* ଗ୍ରୀନ ଡଟ୍ ବଲ୍ ଅଫ୍ ଦି ସିଜନ: ମହମ୍ମଦ ସିରାଜ
* କ୍ୟାଚ ଅଫ୍ ଦି ସିଜନ: କାମିନ୍ଦୁ ମେଣ୍ଡିସ।
(ଏହି ସମସ୍ତ ଖେଳାଳିଙ୍କୁ ବ୍ୟକ୍ତିଗତ ୧୦ ଲକ୍ଷ ଟଙ୍କା ଲେଖାଏଁ ପୁରସ୍କାର)