ଦିଗପହଣ୍ଡି,୮।୧୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଳକ ଚଷାନିମଖଣ୍ଡି ପଞ୍ଚାୟତ କାର୍ଯ୍ୟାଳୟରେ ସୋମବାର ପଞ୍ଚାୟତସ୍ତରୀୟ ଯୁଗ୍ମ ଅଭିଯୋଗ ଶୁଣାଣି ଅନୁଷ୍ଠିତ ହୋଇଯାଇଛି । ଦିଗପହଣ୍ଡି ବିଡିଓ ଅନାମିକା ପାଣ୍ଡେଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମରେ ତହସିଲଦାର ସନ୍ତୋଷ କୁମାର ସାହୁ , ସ୍ଥାନୀୟ ସରପଞ୍ଚ ମିନତୀ କୁମାରୀ ଜାନୀ , ଗ୍ରାମ ପଞ୍ଚାୟତ ଉନ୍ନୟନ ଅଧିକାରୀ ରୋଜାଲିନ ଦଳାଇ , ବ୍ଳକ ସାମାଜିକ ସୁରକ୍ଷା ଅଧିକାରୀ ରଶ୍ମୀ ପ୍ରକାଶିନୀ ଜାନୀ ଉପସ୍ଥିତ ଥିଲେ। ସେହିପରି ସହକାରୀ ଯନ୍ତ୍ରୀ ଇଂ. ସୁନୟନା ପାଣିଗ୍ରାହୀ , ସରପଞ୍ଚ ପ୍ରତିନିଧି ରବିଚନ୍ଦ୍ର ଗୌଡ , ପଞ୍ଚାୟତ ନିର୍ବାହୀ ଅଧିକାରୀ ଧନୁଜ କୁମାର , ସହଗୋଷ୍ଠୀ ଶିକ୍ଷାଧିକାରୀ ବାଳା ମାଝୀ , ଡ୍ରେନେଜ ବିଭାଗ ସହକାରୀ ଯନ୍ତ୍ରୀ ଇଂ. ଭଗବାନ ରଥଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀବୃନ୍ଦ ଉପସ୍ଥିତ ଥିଲେ । ପଞ୍ଚାୟତ ଅଧିନସ୍ଥ ବିଭିନ୍ନ ଗ୍ରାମରୁ ଶତାଧିକ ବ୍ୟକ୍ତି ରାଶନ କାର୍ଡ , ବିଭିନ୍ନ ପ୍ରକାର ଭତ୍ତା , ଆବାସ ଯୋଜନା କାର୍ଯ୍ୟାଦେଶ ପାଇଁ ପ୍ରଶାସନିକ ଅଧିକାରୀମାନଙ୍କୁ ବ୍ୟକ୍ତିଗତ ଭାବେ ଭେଟି ଦାବି ଜଣାଇଥିଲେ। ସାମୂହିକ କିମ୍ବା ଗୋଷ୍ଠୀଗତ ସମସ୍ୟା ନେଇ କେହି ବି ଅଭିଯୋଗ କରିନଥିଲେ। ପରିବାର ସଦସ୍ୟ ସଂଖ୍ୟା ଦିନକୁ ଦିନ ବଢି ଚାଲିଥିବା ବେଳେ ରାଶନ କାର୍ଡରେ ସେମାନଙ୍କ ନାମ ଦରଜ ନଥିବାରୁ ସେମାନଙ୍କୁ ରାଶନ ଦିଆଯାଉନାହିଁ। ସେହିପରି ଗାଁ ମାନଙ୍କରେ ଅଧିକା ସଂଖ୍ୟକ ଯୌଥ ପରିବାର ଭାଙ୍ଗୁ ଥିବାରୁ ନବ ବିବାହିତମାନେ ନୂତନ ଆବାସ ଏବଂ ରାଶନ କାର୍ଡ ପାଇଁ ଆବେଦନ କରୁଛନ୍ତି। ଆବାସ ଯୋଜନା ସର୍ଭେ ସରିଥିବାରୁ ଖୁବ୍ଶୀଘ୍ର ଯୋଗ୍ୟ ହିତାଧିକାରୀଙ୍କୁ କାର୍ଯ୍ୟାଦେଶ ଦିଆଯିବ ବୋଲି ବିଡିଓ ପ୍ରତିଶ୍ରୁତି ଦେଇଛନ୍ତି। ରାଶନ କାର୍ଡ ସଂଶୋଧନ ପାଇଁ ପଦକ୍ଷେପ ନିଆଯିବା ସହ ଅଧିକା ସଂଖ୍ୟାରେ ରାଶନ କାର୍ଡ ପ୍ରଦାନ ପାଇଁ ହିତାଧିକାରୀ ତାଲିକା ପ୍ରକାଶନ କରାଯାଇ ଜିଲା ପ୍ରଶାସନର ଅନୁମୋଦନ ନିମନ୍ତେ ପଦକ୍ଷେପ ନିଆଯିବ। ସାମାଜିକ ସୁରକ୍ଷା ଯୋଜନାରେ ବିଭିନ୍ନ ଭତ୍ତା ପାଇଁ ହିତାଧିକାରୀ ଙ୍କ ତାଲିକା ପ୍ରସ୍ତୁତ କରାଯାଉଥିବା ସେ କହିଛନ୍ତି। ଏହି ଜନ ଶୁଣାଣି କାର୍ଯ୍ୟକ୍ରମରେ ବିଭିନ୍ନ ବିଭାଗର କାର୍ଯ୍ୟରତ ଅଧିକାରୀ ଓ କର୍ମଚାରୀବୃନ୍ଦ ଉପସ୍ଥିତ ରହି ସମସ୍ତ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।