ଫରିଦାବାଦ,୨୯।୪: ହରିୟାଣାର ଫରିଦାବାଦ ନିବାସୀ ଅମିତ ଭଡ଼ାନା (୩୩)ଙ୍କୁ ନେଇ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଲାଗିରହିଛି। ମୋହବ୍ବତା ଗ୍ରାମର ଅମିତ ନିଜର ବ୍ୟାଙ୍କ ଚାକିରିକୁ ଛାଡ଼ି ବିଳାସପୂର୍ଣ୍ଣ ଅଡି କାର୍ରେ ଘରକୁ ଘର ଯାଇ ଲୋକଙ୍କୁ କ୍ଷୀର ପହଞ୍ଚାଉଛନ୍ତି। ଅମିତଙ୍କର ବିଳାସପୂର୍ଣ୍ଣ କାର୍ ଏବଂ ବାଇକ ପ୍ରତି ଆଗ୍ରହ ରହିଥିଲା। ଏବେ ସେ ନିଜର ଏହି ଆଗ୍ରହକୁ ତାଙ୍କ ପୂର୍ଣ୍ଣକାଳୀନ ବୃତ୍ତିରେ ପରିଣତ କରିଛନ୍ତି।
ଗ୍ରାଜୁଏଶନ ଶେଷ ପରେ ଅମିତ ଏକ ଘରୋଇ ବ୍ୟାଙ୍କରେ ନିଯୁକ୍ତି ପାଇଥିଲେ। ସେଠାରେ ସେ ୭ ବର୍ଷ ଧରି କାର୍ଯ୍ୟ କରିଥିଲେ। ବ୍ୟାଙ୍କର କାର୍ଯ୍ୟ ଚାପ ଯୋଗୁ ଗାଡ଼ି ଚଲାଇବା ନେଇ ସେ ତାଙ୍କ ଆଗ୍ରହକୁ ପୂରା କରିପାରୁ ନ ଥିଲେ, ଯାହା ତାଙ୍କୁ ନିରାଶ କରିଥିଲା ବୋଲି ଅମିତ କହିଛନ୍ତି। କ୍ଷୀର ବ୍ୟବସାୟ ସହ ଜଡ଼ିତ ପରିବାରରୁ ଆସୁଥିବାରୁ ଅମିତ ଯାନବାହନ ପ୍ରତି ନିଜ ଆଗ୍ରହକୁ ପାରିବାରିକ ବ୍ୟବସାୟ ସହ ମିଶ୍ରଣ କରିବାକୁ ଠିକ୍ କରିଥିଲେ। ତେଣୁ ୨୦୨୧ରେ ସେ ବ୍ୟାଙ୍କ ଚାକିରିରୁ ଇସ୍ତଫା ଦେଇ ନିଜର ବିଭିନ୍ନ ବିଳାସପୂର୍ଣ୍ଣ ଗାଡ଼ି ଜରିଆରେ ଘରକୁ ଘର ଯାଇ କ୍ଷୀର ପହଞ୍ଚାଇଥିଲେ।
ପ୍ରଥମେ ସେ ନିଜ ପାଇଁ ୮ ଲକ୍ଷ ମୂଲ୍ୟର ହାର୍ଲି-ଡାଭିଡସନ୍ ବାଇକ୍ କିଣିଥିଲେ। ପରେ ଧୀରେ ଧୀରେ ଅମିତଙ୍କ ବ୍ୟବସାୟ ବୃଦ୍ଧି ପାଇଥିଲା। ତାଙ୍କ ଗ୍ରାହକଙ୍କ ସଂଖ୍ୟା ମଧ୍ୟ ବଢ଼ିଥିଲା। ଏବେ ସେ ନିଜ ୧ କୋଟି ମୂଲ୍ୟର ଅଡି କାର୍ରେ ଗ୍ରାହକଙ୍କୁ କ୍ଷୀର ଦେବା ପାଇଁ ଯାଉଛନ୍ତି। ଅମିତ କହିଛନ୍ତି, ଘରକୁ ଘର ବୁଲି କ୍ଷୀର ଦେଉଥିବା ଯୋଗୁ ସେ ଦୈନିକ ୬୦ କି.ମି. ଗାଡ଼ି ଚଲାଇବାର ସୁଯୋଗ ପାଉଛନ୍ତି। ଏହି କାର୍ଯ୍ୟକୁ ସେ ଛୋଟ ମନେ କରନ୍ତି ନାହିଁ, ବରଂ ଗାଡ଼ି ଚଲାଇ ଲୋକଙ୍କୁ କ୍ଷୀର ଯୋଗାଇବା କାର୍ଯ୍ୟକୁ ସେ ଖୁବ୍ ଉପଭୋଗ କରୁଛନ୍ତି। ଗାଡ଼ି ଚଲାଇବାକୁ ସେ ପସନ୍ଦ କରନ୍ତି ଏବଂ ସେ ଏହାକୁ ଛାଡ଼ି ପାରିବେ ନାହିଁ ବୋଲି ଅମିତ କହିଛନ୍ତି। ନିଜର ଏହି ବ୍ୟବସାୟିକ ସଫଳତା ପାଇଁ ତାଙ୍କୁ ତାଙ୍କ ପରିବାର ଦୃଢ଼ ଭାବେ ସମର୍ଥନ କରିଥିବା ଅମିତ କହିଛନ୍ତି।