ନୂଆଦିଲ୍ଲୀ,୧୮।୧୨: ଯଦି ନିର୍ବାଚନ କମିଶନ(ଇସି) ଭଳି ଏକ ନିରପେକ୍ଷ ତଥା ସ୍ବତନ୍ତ୍ର ସାମ୍ବିଧାନିକ ସଂସ୍ଥା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ)ରେ ବୈଠକ କରେ, ତେବେ ନିର୍ବାଚନ କିପରି ନିରପେକ୍ଷ ହୋଇପାରିବ? ରାଜ୍ୟ ସଭାରେ ଏଭଳି ପ୍ରଶ୍ନ ଉଠାଇଛନ୍ତି ବିରୋଧୀ ନେତା ମଲ୍ଲିକାର୍ଜୁନ ଖାର୍ଗେ।
ମୁଖ୍ୟ ନିର୍ବାଚନ କମିଶନର(ସିଇସି) ସୁଶୀଲ ଚନ୍ଦ୍ରା ଏବଂ ଦୁଇ ନିର୍ବାଚନ କମିଶନର ରାଜୀବ କୁମାର ଏବଂ ଅନୁପ ଚନ୍ଦ୍ର ପାଣ୍ଡେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ)ରେ ବୈଠକ କରିଥିଲେ। ପିଏମ୍ଓର ଡାକରା ପାଇ ନିର୍ବାଚନ କମିଶନ(ଇସି) ଗତ ନଭେମ୍ବର ୧୬ରେ ଅନୌପଚାରିକ ଭାବେ ଭର୍ଚୁଆଲ ବାର୍ତ୍ତାଳାପ କରିଥିବା ଗଣମାଧ୍ୟମରେ ରିପୋର୍ଟ ପ୍ରକାଶ ପାଇବା ପରେ ଏହାକୁ ନେଇ ବିବାଦ ସୃଷ୍ଟି ହୋଇଛି। ପୂର୍ବତନ ମୁଖ୍ୟ ନିର୍ବାଚନ କମିଶନରମାନେ ଏହାକୁ ଅସାମ୍ବିଧାନିକ ବୋଲି କହିଛନ୍ତି। ବିରୋଧୀ କଂଗ୍ରେସ ଏ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛି।
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ, ନଭେମ୍ବର ୧୬ରେ ଅନୁଷ୍ଠିତ ଏହି ବୈଠକ ପୂର୍ବରୁ ନିର୍ବାଚନ କମିଶନକୁ ଆଇନ ମନ୍ତ୍ରଣାଳୟ ପକ୍ଷରୁ ଏକ ଚିଠି ଯାଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରମୁଖ ସଚିବ ପି. କେ. ମିଶ୍ର ‘ସାଧାରଣ ଭୋଟର ତାଲିକା’ ସହିତ ନିର୍ବାଚନୀ ସଂସ୍କାର ଉପରେ ଏକ ବୈଠକ କରିବେ ଏବଂ ଏଥିରେ ମୁଖ୍ୟ ନିର୍ବାଚନ କମିଶନର ଓ ଦୁଇ ନିର୍ବାଚନ କମିଶନର ଉପସ୍ଥିତ ରହିବାକୁ ଉକ୍ତ ଚିଠିରେ ଲେଖାଥିଲା। ପିଏମ୍ଓ ପକ୍ଷରୁ ଏପରି ଚିଠି ଇସିକୁ ସମନ କରାଯାଇଥିବା ଢଙ୍ଗରେ ଲେଖାଯାଇଥିବା ଏବଂ ଏହା ଦ୍ୱାରା ସମ୍ବିଧାନର ମାନଦଣ୍ଡ ଉଲ୍ଲଂଘନ ହୋଇଥିବା ଅଭିଯୋଗ ଆସିଛି। ମୁଖ୍ୟ ନିର୍ବାଚନ କମିଶନର ପ୍ରଥମେ ଏହି ବୈଠକରେ ଯୋଗଦେବେ ନାହିଁ ବୋଲି କହିଥିଲେ ମଧ୍ୟ ପରେ ଅନୌପଚାରିକ ଭାବେ ସିଇସିଙ୍କ ସମେତ ଅନ୍ୟ ଦୁଇ ଜଣ ଇସି ସଚିବ ମିଶ୍ରଙ୍କ ସହ ବାର୍ତ୍ତାଳାପ କରିଥିଲେ।
ସହ ମୁଖ୍ୟ ନିର୍ବାଚନ କମିଶନରଙ୍କ ଏଭଳି ବୈଠକକୁ ୩ ଜଣ ପୂର୍ବତନ ସିଇସି ସମାଲୋଚନା କରିଛନ୍ତି। ପୂର୍ବତନ ସିଇସି ଏସ୍. ଓ୍ବାଇ କ୍ୟୁରେଶୀ କହିଛନ୍ତି, ଏହା ଅତ୍ୟନ୍ତ ଆଶ୍ଚର୍ଯ୍ୟଜନକ। ପିଏମ୍ଓ ଏପରି ବୈଠକ କରି ନିର୍ବାଚନ କମିଶନରଙ୍କୁ ଡାକି ପାରିବେ ନାହିଁ। ନ୍ୟାୟିକ ବ୍ୟବସ୍ଥାରେ ସଂସ୍କାର ପାଇଁ କ’ଣ ସରକାର ପ୍ରଧାନ ବିଚାରପତି ଏବଂ ସୁପ୍ରିମକୋର୍ଟର ଅନ୍ୟ ବିଚାରପତିଙ୍କୁ ଡାକି ଆଲୋଚନା କରିପାରିବେ ବୋଲି ସେ ପ୍ରଶ୍ନ କରିଛନ୍ତି।