ମସ୍କୋ,୧୫।୫: ପୁଣି ୟୁକ୍ରେନ୍କୁ ରୁଷିଆ ରାଷ୍ଟ୍ରପତି ଭ୍ଲାଡ଼ିମିର ପୁଟିନଙ୍କ ଝଟ୍କା। ସେ ଗୁରୁବାର ତାଙ୍କ ୟୁକ୍ରେନୀୟ ପ୍ରତିପକ୍ଷ ଭୋଲୋଡିମିର ଜେଲେନସ୍କିଙ୍କୁ ଭେଟିବା ପାଇଁ ଇସ୍ତାନବୁଲ ଯାତ୍ରା କରିବେ ନାହିଁ। ବୁଧବାର ବିଳମ୍ବିତ ରାତିରେ କ୍ରେମଲିନ ପକ୍ଷରୁ ଏନେଇ ଘୋଷଣା କରାଯାଇଛି। ୟୁକ୍ରେନ ଏବଂ ରୁଷିଆର ନେତାଙ୍କ ମଧ୍ୟରେ ପ୍ରଥମ ସିଧାସଳଖ ଆଲୋଚନାରେ ମସ୍କୋର ପ୍ରତିନିଧିତ୍ୱ କିଏ କରିବେ ତାହା କ୍ରେମଲିନ ଘୋଷଣା କରିଛି। କ୍ରେମଲିନ କହିଛନ୍ତି ଯେ ରୁଷିଆ ପ୍ରତିନିଧିମଣ୍ଡଳର ନେତୃତ୍ୱ ପୁଟିନଙ୍କ ସହଯୋଗୀ ଭ୍ଲାଡ଼ିମିର ମେଡିନସ୍କି ନେବେ, ଯିଏ ମାର୍ଚ୍ଚ ୨୦୨୨ରେ ଇସ୍ତାନବୁଲରେ ପ୍ରଥମ ପର୍ଯ୍ୟାୟ ଆଲୋଚନାରେ ମସ୍କୋର ପ୍ରତିନିଧିତ୍ୱ କରିଥିଲେ।
ମେଡିନସ୍କିଙ୍କ ବ୍ୟତୀତ ଦଳରେ ଉପ-ବୈଦେଶିକ ମନ୍ତ୍ରୀ ମିଖାଇଲ ଗାଲୁଜିନ, ଉପ-ପ୍ରତିରକ୍ଷା ମନ୍ତ୍ରୀ ଆଲେକଜାଣ୍ଡର ଫୋମିନ ଏବଂ ରୁଷିଆର ସାମରିକ ଗୁଇନ୍ଦା ସଂସ୍ଥା (GRU)ର ମୁଖ୍ୟ ଇଗୋର କୋଷ୍ଟିୟୁକୋଭ ସାମିଲ ହେବେ। ରୁଷିଆର ବୈଦେଶିକ ମନ୍ତ୍ରୀ ସେରଗେଇ ଲାଭରୋଭ ମଧ୍ୟ ତୁର୍କୀ ଗସ୍ତ କରିବେ ନାହିଁ। ଗତ ସପ୍ତାହନ୍ତରେ, ପୁଟିନ କହିଥିଲେ ଯେ ରୁଷିଆ ଏବଂ ୟୁକ୍ରେନ ସିଧାସଳଖ ଆଲୋଚନା ପାଇଁ ବସିବା ଉଚିତ। ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସକି ତୁରନ୍ତ ପ୍ରତିକ୍ରିୟା ଦେଇ କହିଛନ୍ତି ଯେ ୟୁକ୍ରେନ ଉପରେ ରୁଷର ବିଶାଳ ଆକ୍ରମଣ ପରେ ପ୍ରଥମ ଥର ପାଇଁ ସେ ୨୦୨୨ ପ୍ରାରମ୍ଭରେ ପୁଟିନଙ୍କୁ ଭେଟିବା ପାଇଁ ବ୍ୟକ୍ତିଗତ ଭାବରେ ଇସ୍ତାନବୁଲ ଯାତ୍ରା କରିବେ।
ଭ୍ଲାଦିମିର ମେଡିନସ୍କି କିଏ?
ପୁଟିନଙ୍କ ସହଯୋଗୀ ମେଡିନସ୍କି, ୟୁକ୍ରେନ ଉପରେ ରୁଷର ଆକ୍ରମଣର ଜଣେ ଦୃଢ଼ ସମର୍ଥକ। ଜାନୁଆରୀ ୨୦୨୫ ରେ ସେ ଏକ ନୂତନ ପୁସ୍ତକ “ରୁଷିଆର ସାମରିକ ଇତିହାସ” ସମ୍ପାଦନା କରିଥିଲେ। ଯାହା ନାଜି ଜର୍ମାନୀ ବିରୁଦ୍ଧରେ ସୋଭିଏତ ଯୁଦ୍ଧର ଏକ ନିରନ୍ତରତା ଭାବରେ ମସ୍କୋର ୟୁକ୍ରେନ ବିରୁଦ୍ଧରେ ଯୁଦ୍ଧକୁ ଉପସ୍ଥାପନ କରିଥାଏ ଏବଂ ପାଶ୍ଚାତ୍ୟ ବିପଦର ଏକ ଆବଶ୍ୟକୀୟ ପ୍ରତିକ୍ରିୟା ଭାବରେ ରୁଷର ଯୁଦ୍ଧକୁ ଦର୍ଶାଏ। ସ୍କୁଲ ପିଲାମାନଙ୍କ ପାଇଁ ଉଦ୍ଦିଷ୍ଟ ଏହି ପୁସ୍ତକରେ ଦାବି କରାଯାଇଛି ଯେ ନାଟୋ ବିସ୍ତାରବାଦ ଏବଂ ୨୦୧୪ ମସିହାରେ ୟୁକ୍ରେନର ରୁଷିଆ ସମର୍ଥକ ରାଷ୍ଟ୍ରପତି ଭିକ୍ଟର ୟାନୁକୋଭିଚଙ୍କୁ ଗାଦିଚ୍ୟୁତ କରିବା ଯୋଗୁ ରୁଷିଆ ଫେବୃଆରୀ ୨୦୨୨ରେ ୟୁକ୍ରେନ ଉପରେ ଆକ୍ରମଣ କରିବାକୁ ବାଧ୍ୟ ହୋଇଥିଲା, ଯାହାକୁ ଏହା ଏକ ପାଶ୍ଚାତ୍ୟ ସମର୍ଥିତ ବିଦ୍ରୋହ ବୋଲି ବର୍ଣ୍ଣନା କରିଛି। ଏହି ତିନି ଖଣ୍ଡ ବିଶିଷ୍ଟ ପୁସ୍ତକଟି ୟୁକ୍ରେନକୁ ଏକ ଆକ୍ରମଣାତ୍ମକ ରୁଷିଆ ବିରୋଧୀ ମୋର୍ଚ୍ଚା ଭାବରେ ବର୍ଣ୍ଣନା କରେ ଏବଂ ଯୁଦ୍ଧକ୍ଷେତ୍ରରେ ସାହସିକତା ଉପରେ ଗୁରୁତ୍ୱାରୋପ କରେ।