ଦିଗପହଣ୍ଡି,୫।୧୦(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅଞ୍ଚଳରେ ୟୁରିଆ ସାରର ଘୋର ଅଭାବ ଦେଖାଦେଇଛି। ଚାଷୀଙ୍କୁ ମିଳୁନି ୟୁରିଆ ସାର। ଦିଗପହଣ୍ଡି ବ୍ଲକ ଚୌଧୁରୀ ଟିକରପଡ଼ା ଗ୍ରାମ ପ୍ରାଥମିକ ସେବା ସମବାୟ ସମିତି କାର୍ଯ୍ୟାଳୟ ସମ୍ମୁଖରେ ରବିବାର ସକାଳୁ ଚାଷୀଙ୍କ ଲମ୍ବା ଲାଇନ ଲାଗିଥିଲା।ସେମାନଙ୍କ ମଧ୍ୟରେ ଠେଲା ପେଲା ହେବାରୁ ଚାପା ଉତ୍ତେଜନା ପ୍ରକାଶ ପାଇଛି। ପରେ କେ.ନୂଆଗାଁ ଥାନା ନୂଆପଡ଼ା ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ନିୟନ୍ତ୍ରଣ କରିଥିଲା। ପୋଲିସ ଉପସ୍ଥିତିରେ ସାର ବଣ୍ଟନ କରାଯାଇଥିଲା।
ସମବାୟ ସମ୍ପାଦକ ଚନ୍ଦ୍ରଧଜ ସାହୁଙ୍କୁ ପଚାରିବାରୁ ପୂର୍ବରୁ ୫ଟି ଟ୍ରକରେ ଆସିଥିବା ୧୧୨୫ ବସ୍ତା ୟୁରିଆ ସାର ଉଭୟ ଭ୍ରମରପୁର ପଞ୍ଚାୟତ ଏବଂ ଚୌଧୁରୀ ଟିକରପଡ଼ା ପଞ୍ଚାୟତ ଅଧୀନ ଗ୍ରାମର ପଞ୍ଜୀକୃତ ଚାଷୀଙ୍କୁ ବିକ୍ରି କରାଯାଇଥିଲା। ଶନିବାର ପୁଣି ୩ ଟି ଟ୍ରକ ରେ ୬୭୫ ବସ୍ତା ସାର ସମବାୟ ଗୋଦାମକୁ ଆସିଥିଲା।ଚାଷୀଙ୍କୁ ବିକ୍ରି ପାଇଁ ବ୍ୟବସ୍ଥା କରିବା ବେଳେ ପୂର୍ବରୁ ସାର ନେଇ ସାରିଥିବା କିଛି ଚାଷୀ ପୁଣି ସାର ନେବା ପାଇଁ ଆସିବାରୁ ପୋଲିସ ଉପସ୍ଥିତିରେ ଦୁଇ ଗୋଷ୍ଠୀ ମଧ୍ୟରେ ମୁହାଁ ମୁହି ପରିସ୍ଥିତି ସୃଷ୍ଟି ହୋଇଥିଲା। ଗ୍ରାମର ଭଦ୍ର ବ୍ୟକ୍ତି ମାନଙ୍କ ଉପସ୍ଥିତିରେ ସମାଧାନ କରାଯାଇଥିଲେ ମଧ୍ୟ ସାର ବିକ୍ରି ବନ୍ଦ ରଖାଯାଇଥିଲା। ଦୁଇଟି ପଞ୍ଚାୟତର ୨୨ ଖଣ୍ଡ ଗାଁକୁ ନେଇ ଗଠିତ ଚୌଧୁରୀ ଟିକରପଡ଼ା ଗ୍ରାମ ପ୍ରାଥମିକ ସେବା ସମବାୟ ସମିତିକୁ ନିଅଣ୍ଟିଆ ସାର ଯୋଗାଣ ଯୋଗୁ ପରିସ୍ଥିତି ଅସମ୍ଭାଳ ହୋଇଛି। ପ୍ରାୟ ୫ ହଜାର ଚାଷୀଙ୍କୁ ବର୍ତ୍ତମାନ ସୁଦ୍ଧା ମାତ୍ର ୨ ହଜାର ୟୁରିଆ ସାର ବସ୍ତା ଯୋଗାଣ କରାଯାଇଥିବାରୁ ଚାଷୀଙ୍କୁ ଆବଶ୍ୟକ ସାର ମିଳୁନି। କିଛି ଚାଷୀ ଅନ୍ୟ ସେବା ସମବାୟ ସମିତିରୁ ସାର କ୍ରୟ କରି ଜମିରେ ପକାଇଥିବା କହିଛନ୍ତି। ଚଳିତବର୍ଷ ୟୁରିଆ ସାର ବିକ୍ରି ପାଇଁ ରେଜିଷ୍ଟ୍ରିଭୁକ୍ତ ଘରୋଇ ଡିଲର ମାନଙ୍କୁ ପର୍ଯ୍ୟାପ୍ତ ପରିମାଣର ସାର ସରକାର ଯୋଗାଇ ଦେଇ ନ ଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଜଣାପଡ଼ିଛି।