ବଲାଙ୍ଗୀର,୮ା୧(ବୀରେନ୍ଦ୍ର କୁମାର ଝାଙ୍କର): ଆଉଟ୍ସୋର୍ସିଂ କର୍ମଚାରୀଙ୍କୁ ଶୋଷଣ ଅଭିଯୋଗରେ ପଶ୍ଚିମାଞ୍ଚଳ ବିଜୁଳି ଶ୍ରମିକ ସଂଘ ବଲାଙ୍ଗୀର ପକ୍ଷରୁ ବୁଧବାର ଟାଟା ପାୱାର କମ୍ପାନୀ ବିରୋଧରେ ବୁଧବାର ଧାରଣା ଦିଆଯାଇଛି। ଆଉଟ୍ସୋର୍ସିଂ କର୍ମଚାରୀଙ୍କୁ ଠିକ୍ ସମୟରେ ପାଉଣା ଏବଂ ସାଲାରୀ ସ୍ଲିପ୍ ଦିଆଯାଉନାହିଁ। ଏଥିସହ ମନଇଚ୍ଛା କେତେଜଣ କର୍ମଚାରୀଙ୍କୁ ଛଟେଇ କରାଯାଉଥିବା ଅଭିଯୋଗ ହୋଇଛି। ଫଳରେ ସଂଘ ପକ୍ଷରୁ ୧୦ ଦଫା ଦାବିପତ୍ର ନେଇ ବୁଧବାର ସ୍ଥାନୀୟ ବିଦ୍ୟୁତ୍ ବିଭାଗ ଅଧୀକ୍ଷଣ ଯନ୍ତ୍ରୀଙ୍କ ଅଫିସ ସମ୍ମୁଖରେ ଧାରଣା ଦିଆଯାଇଥିଲା। ଏହି ଅବସରରେ ଅନୁଷ୍ଠିତ ସଭାରେ ପଶ୍ଚିମାଞ୍ଚଳ ବିଜୁଳି ଶ୍ରମିକ ସଂଘ ସଭାପତି ତଥା କୋଶଲବାଦୀ ନେତା ପ୍ରମୋଦ କୁମାର ମିଶ୍ର, ଉପସଭାପତି ରବିଶଙ୍କର ମିଶ୍ର, ସାଧାରଣ ସମ୍ପାଦକ ବିଭୂତି ଶଙ୍କର ବିନ୍ଧାଣୀ, ସହସାଧାରଣ ସମ୍ପାଦକ ଜ୍ୟୋତି ରଞ୍ଜନ ମହାନ୍ତି, ଟ୍ରେଡ୍ ୟୁନିଅନ୍ ନେତା ରଣରାଜ ସିଂଦେଓ ଓ ଅନ୍ୟମାନେ ଉପସ୍ଥିତ ଥିଲେ। ସଭାପତି ମିଶ୍ର କହିଛନ୍ତି, ଟାଟା ପାୱାରରେ କାମ କରୁଥିବା ଆଉଟସୋର୍ସିଂ କର୍ମଚାରୀଙ୍କ କିଛି ସାଧାରଣ ସମସ୍ୟା ରହିଛି। ତାହାକୁ ଦୂର କରିବା ପାଇଁ କର୍ମଚାରୀମାନେ ବାରମ୍ବାର ଅନୁରୋଧ କରୁଥିଲେ ମଧ୍ୟ କମ୍ପାନୀ କର୍ତ୍ତୃପକ୍ଷ କୌଣସି କଥା ଶୁଣୁନାହାନ୍ତି। କର୍ମଚାରୀଙ୍କୁ ନିର୍ଦ୍ଧାରିତ ସମୟରେ ମାସିକ ପାଉଣା ପ୍ରଦାନ କରାଯାଉ ନ ଥିବାରୁ ସେମାନେ ସମସ୍ୟାର ସମ୍ମୁଖୀନ ହେଉଛନ୍ତି। ଆଉଟସୋର୍ସିଂ କର୍ମଚାରୀଙ୍କ କୌଣସି ସାମାଜିକ ସୁରକ୍ଷା ରହୁନାହିଁ। ଏଭଳି ୧୦ ଦଫା ଦାବିପତ୍ର ଦିଆଯାଇଛି। ଖୁବ୍ଶୀଘ୍ର ଦାବି ପୂରଣ ନ ହେଲେ ସେମାନେ ବାଧ୍ୟହୋଇ ଆନ୍ଦୋଳନକୁ ଓହ୍ଲାଇବେ ବୋଲି ମିଶ୍ର କହିଛନ୍ତି।