କଲମ୍ବୋ,୫।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତିନି ଦିନିଆ ଗସ୍ତରେ କଲମ୍ବୋରେ ପହଞ୍ଚିଛନ୍ତି। ଶ୍ରୀଲଙ୍କାର ବୈଦେଶିକ ମନ୍ତ୍ରୀ ବିଜିତା ହେରାଥ, ସ୍ବାସ୍ଥ୍ୟ ମନ୍ତ୍ରୀ ନଲିଣ୍ଡା ଜୟତିସା ଏବଂ ମତ୍ସ୍ୟ ସମ୍ପଦ ମନ୍ତ୍ରୀ ରାମଲିଙ୍ଗମ ଚନ୍ଦ୍ରଶେଖରଙ୍କ ସମେତ ପାଞ୍ଚ ଜଣ ପ୍ରମୁଖ ମନ୍ତ୍ରୀ ତାଙ୍କୁ ସ୍ବତନ୍ତ୍ର ସ୍ବାଗତ କରିବା ପାଇଁ ବିମାନବନ୍ଦରରେ ଉପସ୍ଥିତ ଥିଲେ। ପ୍ରଧାନମନ୍ତ୍ରୀ ମୋଦିଙ୍କୁ ରାଷ୍ଟ୍ର ସମ୍ମାନ ସହିତ ସ୍ବାଗତ କରାଯାଇଥିଲା। ତାଙ୍କୁ ସ୍ବତନ୍ତ୍ର ଚୌକରେ ଗାର୍ଡ ଅଫ ଅନର ଏବଂ ୨୧ ତୋପ ସଲାମୀ ଦିଆଯାଇଥିଲା। ଏହା ତାଙ୍କର ଶ୍ରୀଲଙ୍କା ଚତୁର୍ଥ ଗସ୍ତ ଥିଲା। ଏଥର ପ୍ରଧାନମନ୍ତ୍ରୀ ମୋଦିଙ୍କୁ ଶ୍ରୀଲଙ୍କା ମିତ୍ର ବିଭୂଷଣ ପୁରସ୍କାର ପ୍ରଦାନ କରାଯାଇଥିଲା। ଏହା ଶ୍ରୀଲଙ୍କା ସରକାରଙ୍କ ସର୍ବୋଚ୍ଚ ନାଗରିକ ସମ୍ମାନ, ଯାହା ଶ୍ରୀଲଙ୍କା ସହିତ ଏକ ବିଶେଷ ବନ୍ଧୁତା ବଜାୟ ରଖିଥିବା ବିଦେଶୀ ବିଶିଷ୍ଟ ବ୍ୟକ୍ତିମାନଙ୍କୁ ପ୍ରଦାନ କରାଯାଏ।
ଶ୍ରୀଲଙ୍କା ସରକାରଙ୍କ ସର୍ବୋଚ୍ଚ ନାଗରିକ ସମ୍ମାନ ପାଇବା ପରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ଏହି ସମ୍ମାନ ୧୪୦ କୋଟି ଭାରତୀୟଙ୍କର। ଏହା ଶ୍ରୀଲଙ୍କା ଏବଂ ଭାରତ ମଧ୍ୟରେ ଗଭୀର ବନ୍ଧୁତା ଏବଂ ସମାନ ମୂଲ୍ୟବୋଧକୁ ପ୍ରତିଫଳିତ କରେ। ଏହି ସମ୍ମାନ ଦର୍ଶାଉଛି ଯେ, ଭାରତ କେବଳ ଏକ ପଡ଼ୋଶୀ ନୁହେଁ ବରଂ ଏକ ‘ପ୍ରକୃତ ବନ୍ଧୁ’।
ଭାରତ ଏବଂ ଶ୍ରୀଲଙ୍କା ମଧ୍ୟରେ କେବଳ କୂଟନୈତିକ ସମ୍ପର୍କ ନାହିଁ, ବରଂ ଭୂମିସ୍ତରୀୟ ବିକାଶ ପ୍ରକଳ୍ପ ମଧ୍ୟ ଚାଲିଛି। ପ୍ରଧାନମନ୍ତ୍ରୀ ମୋଦି ତାଙ୍କ ଭାଷଣରେ ଅନେକ ଗୁରୁତ୍ୱପୂର୍ଣ୍ଣ ବିକାଶମୂଳକ ପ୍ରକଳ୍ପ ବିଷୟରେ ଉଲ୍ଲେଖ କରିଥିଲେ। ସେ କହିଥିଲେ, ଭାରତ ଶ୍ରୀଲଙ୍କାର ଚାଷୀମାନଙ୍କୁ ସିଧାସଳଖ ସହାୟତା ଯୋଗାଇବ। ସେ ଭାରତୀୟ ବଂଶୋଦ୍ଭବ ତାମିଲ (IOT) ସମ୍ପ୍ରଦାୟ ପାଇଁ ୧୦,୦୦୦ କୋଟି ଟଙ୍କାର ଗୃହ ଏବଂ ସାମାଜିକ ଯୋଜନା ଘୋଷଣା କରିଥିଲେ। ଏହା ବ୍ୟତୀତ, ସେ ଶ୍ରୀଲଙ୍କା ସରକାରଙ୍କ ସହିତ ନୂତନ ଚୁକ୍ତିନାମା କରିଛନ୍ତି, ଯେଉଁଥିରେ ଭିତ୍ତିଭୂମି, ଡିଜିଟାଲ ସଂଯୋଗୀକରଣ ଏବଂ ସବୁଜ ଶକ୍ତି ଭଳି କ୍ଷେତ୍ର ଅନ୍ତର୍ଭୁକ୍ତ।
ପ୍ରଧାନମନ୍ତ୍ରୀଙ୍କ ଶ୍ରୀଲଙ୍କା ଗସ୍ତ ଏପରି ଏକ ସମୟରେ ହେଉଛି ଯେତେବେଳେ ଦ୍ୱୀପ ଦେଶ ଆର୍ଥିକ ସଙ୍କଟରୁ ପୁନରୁଦ୍ଧାରର ସଙ୍କେତ ଦେଖାଉଛି। ତିନି ବର୍ଷ ପୂର୍ବେ, ଶ୍ରୀଲଙ୍କା ଏକ ବଡ଼ ଆର୍ଥିକ ସଙ୍କଟର ସମ୍ମୁଖୀନ ହେଉଥିଲା ଏବଂ ଭାରତ ତାକୁ ୪.୫ ବିଲିୟନ ଆମେରିକୀୟ ଡଲାରର ଆର୍ଥିକ ସହାୟତା ଦେଇଥିଲା।