ଦିଗପହଣ୍ଡି,୧୮।୨(ଅଶେଷ ନାଥ ମିଶ୍ର) ସମଗ୍ର ଦକ୍ଷିଣ ଓଡ଼ିଶାର ପ୍ରସିଦ୍ଧ ମା’ ବାଙ୍କେଶ୍ୱରୀଙ୍କ ଦୋଳ ଯାତ୍ରା ନିମନ୍ତେ ପ୍ରସ୍ତୁତି ସଭା ଅନୁଷ୍ଠିତ ହୋଇଯାଇଛି। ଦିଗପହଣ୍ଡି ବ୍ଲକ ବଡ଼ଡୁମ୍ବୁଳା ଗ୍ରାମ ସ୍ଥିତ ମା’ଙ୍କ ମନ୍ଦିର ପରିସରରେ ଆୟୋଜିତ ସଭାରେ ଯାତ୍ରା କମିଟି ସଭାପତି ତଥା ପୂର୍ବତନ ବ୍ଲକ ଅଧ୍ୟକ୍ଷ ବିପିନ ଚନ୍ଦ୍ର ପ୍ରଧାନ ଅଧ୍ୟକ୍ଷତା କରିଥଲେ। ଆସନ୍ତା ଫାଲଗୁନ ଶୁକ୍ଳପକ୍ଷ ତ୍ରୟୋଦଶୀ ତିଥି ମାର୍ଚ୍ଚ ୧ ସନ୍ଧ୍ୟାରୁ ଚୈତ୍ର କୃଷ୍ଣପକ୍ଷ ପ୍ରତିପଦା ତିଥି ମାର୍ଚ୍ଚ ୪ ଏହି ଯାତ୍ରା ମହୋତ୍ସବ ପ୍ରତିବର୍ଷ ଭଳି ଚଳିତବର୍ଷ ଖୁବ ଧୁମଧାମରେ କରାଯିବା ପାଇଁ ସଭାରେ ସର୍ବସମ୍ମତି ନିଷ୍ପତ୍ତି ନିଆଯାଇଥିଲା।
ମାର୍ଚ୍ଚ ୨ ସୋମବାର ଶୁକ୍ଳ ଚତୁର୍ଦ୍ଦଶୀ ତିଥି ବିଳମ୍ବିତ ରାତିରେ ମନ୍ଦିର ନିକଟ ବାଉଁଶକୁଦରେ ରାଜାଗ୍ନି ହୋମପୂଜା କରାଯିବ। ମା’ ଫୁଲମଣ୍ଡାରେ ବିଜେ ହେବା ପରେ ବାଦ୍ୟ ବାଜଣା ସହକାରେ ମନ୍ଦିର ମଧ୍ୟକୁ ପାଛୋଟି ଅଣାଯିବ। ମାର୍ଚ୍ଚ ୩ ପୂର୍ଣ୍ଣିମା ତିଥିରେ କେତୁ ଗ୍ରସ୍ତୋଦୟ ଚନ୍ଦ୍ର ଗ୍ରହଣ ହେଉଥିବାରୁ ବିଶିଷ୍ଟ ଶାସ୍ତ୍ରବିତ୍ ପଣ୍ଡିତ ଅଶୋକ ପାଢ଼ୀଙ୍କ ପରାମର୍ଶ କ୍ରମେ ଭୋର ୬ ଟା ୪୭ ମିନଟରୁ ସନ୍ଧ୍ୟା ୬ ଟା ଯାଏ ମନ୍ଦିରର ମୁଖ୍ୟଦାର ବନ୍ଦ ରହିବା ସହ ଦେବନୀତି ନିଷେଧ ରହିବ। ଗ୍ରହଣ ମୋକ୍ଷ ହେବା ପରେ ସନ୍ଧ୍ୟା ୬ ଟାରେ ମା’ଙ୍କ ମହାସ୍ନାନ କରାଯାଇ ସେବା ପୂଜା ନୀତି କାନ୍ତି ସରିବା ପରେ ଭକ୍ତଙ୍କ ଦର୍ଶନ ପାଇଁ ମନ୍ଦିର ଦ୍ୱାର ଖୋଲାଯିବା ପାଇଁ ସଭାରେ ନିର୍ଦ୍ଧାରଣ କରାଯାଇଥିଲା। ସନ୍ଧ୍ୟାରୁ ମାନସିକଧାରୀ ଶ୍ରଦ୍ଧାଳୁ ସେମାନଙ୍କ ଶିଶୁମାନଙ୍କୁ ଯାତ୍ରା ପୀଠରେ ମୁଣ୍ଡନ କରାଇପାରିବେ ବୋଲି ଯାତ୍ରାକମିଟି ପକ୍ଷରୁ ନିଷ୍ପତ୍ତି ନିଆଯାଇଥିଲା।
ପ୍ରତିବର୍ଷ ଭଳି ଯାତ୍ରାରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ଭିଡ଼ ନିୟନ୍ତ୍ରଣ ପାଇଁ ବ୍ୟାପକ ପୋଲିସ ଓ ସ୍ବେଚ୍ଛାସେବୀମାନଙ୍କୁ ମୁତୟନ କରାଯିବା ନିମନ୍ତେ ସବିଶେଷ ଆଲୋଚନା କରାଯାଇଥିଲା। ଶ୍ରଦ୍ଧାଳୁମାନେ ଯେଭଳି ମା’ଙ୍କୁ ସୁବିଧାରେ ଦର୍ଶନ କରିପାରିବେ ସେ ନେଇ ବାରିକେଟ କରାଯିବା ସହ ଶୃଙ୍ଖଳିତ ଧାଡ଼ି ଦର୍ଶନ ପାଇଁ ଯାତ୍ରା କମିଟି ପକ୍ଷରୁ ସମସ୍ତ ବନ୍ଦୋବସ୍ତ ପାଇଁ ସଭାରେ ଆଲୋଚନା କରାଯାଇଥିଲା।
ସଭାରେ ଯାତ୍ରା କମିଟି ଉପସଭାପତି ତଥା ପୂର୍ବତନ ସରପଞ୍ଚ କେ.ସଞ୍ଜୀବ କୁମାର ରେଡ୍ଡୀ,ସମ୍ପାଦକ ତଥା ପୂର୍ବତନ ସରପଞ୍ଚ ଉପେନ୍ଦ୍ର ପ୍ରଧାନ,କୋଷାଧ୍ୟକ୍ଷ ସୁଦାମ ଦୋରା, ସହ କୋଷାଧ୍ୟକ୍ଷ ଭୀମସେନ ପ୍ରଧାନ, ଅଡିଟର ବଳରାମ ପ୍ରଧାନ, ଦିଗପହଣ୍ଡି ଥାନା ଭାରପ୍ରାପ୍ତ ଆଇଆଇସି ତଥା ଡିଏସପି ପ୍ରଶାନ୍ତ ପାତ୍ର,ବଡ଼ଡୁମ୍ବୁଳା ପଞ୍ଚାୟତ ସରପଞ୍ଚ ଗୀତାଞ୍ଜଳୀ ଜାନି,ସମିତିସଭ୍ୟ ରମେଶ ଚନ୍ଦ୍ର ପାଢ଼ୀ, କାର୍ଯ୍ୟକର୍ତ୍ତା ସନ୍ତୋଷ କୁମାର ଜାନି, ହରିକୃଷ୍ଣ ପଟ୍ଟନାୟକ, ରମେଶ ଗୌଡ଼, ସୁବାସ ଗୌଡ଼, ଦୁର୍ଯ୍ୟୋଧନ ରେଡ୍ଡୀ,ରଙ୍କ ଗୌଡ଼, ପୂର୍ଣ୍ଣଚନ୍ଦ୍ର ପାତ୍ର, ସୀମାଞ୍ଚଳ ରେଡ୍ଡୀ, ତ୍ରିପତି ପାତ୍ର, ରଙ୍କ ନାୟକ,ଗୋପାଳ ଦାସ,କୃଷ୍ଣ ଗୌଡ଼,ରାଜେନ୍ଦ୍ର ପାତ୍ର, ଭଗବାନ ସାହୁ, ସୁରେନ୍ଦ୍ର ଗୌଡ଼, ସନ୍ତୋଷ ବେହେରା,ରବୀନ୍ଦ୍ର ପ୍ରଧାନ, କୃତ୍ତିବାସ ପ୍ରଧାନ, କେ.ଦେବରାଜଙ୍କ ସମେତ କରପଡ଼ା, ବଡ଼ଡୁମ୍ବୁଳା, ବି. ତୁରୁବୁଡ଼ି, ଗୋକର୍ଣ୍ଣପୁର,ବାସୁଦେବପୁର, କଇଠଡ଼ା, ପଦ୍ମନାଭପୁର, ଜକର, ବମକେଇ ପ୍ରଭୃତି ବିଭିନ୍ନ ପଞ୍ଚାୟତ ଅଧିନ ଗାଁଗୁଡିକରୁ ବହୁ ଗଣ୍ୟମାନ୍ୟ ବ୍ୟକ୍ତି ସଭାରେ ଉପସ୍ଥିତ ରହି ବିଭିନ୍ନ ଆଲୋଚନାରେ ଅଂଶଗ୍ରହଣ କରିଥିଲେ।